Тээврийн цагдаагийн албаны жижүүрийн шуурхай удирдлагын хэлтэст энэ сарын 14-17-ны хооронд  959 дуудлага мэдээлэл хүлээн авсан байна. Зам тээврийн ослын шинжтэй 792 дуудлага мэдээлэл бүртгэгдэж, ноцтой зам тээврийн ослын улмаас 20 хүн гэмтэж, ноцтой зам тээврийн ослын улмаас орон нутаг гурван хүн амиа алджээ.

Ноцтой зам тээврийн ослоос дурдвал:

Дорноговь аймгийн, Сайншанд сум хоёрдугаар багийн нутагт энэ сарын 15-ны өдөр дөрвөн  замын уулзвар дээр асфальтан замд Hyundai starex маркийн автомашины жолооч нь Б явган зорчигч 72 настай, эмэгтэй, Ц-г мөргөж амийг хохироосон байна.

Ховд аймаг, Дөргөн сум Аргалант баг “Улаанбураа” гэх газар энэ сарын 16-ны өдөр сумын төвөөс зүүн урагшаа 50 км шороон замд улсын дугааргүй Мустанг-5 маркийн мотоцикл онхолдож зорчигч 27 настай, эмэгтэй Ж амиа алджээ.

Дорнод аймаг, Чойбалсан сум хоёрдугаар баг “216” гэх газар энэ сарын 16-ны өдөр аймгийн төвөөс зүүн хойш 30км шороон замд хувийн эзэмшлийн Toyota mark 2 автомашины жолооч У нь согтууруулах ундааны зүйл хэрэглэсэн үедээ тээврийн хэрэгсэл жолоодон хөдөлгөөнд оролцсоны улмаас онхолдож, зорчигч 32 настай эрэгтэй Х-н амь нас хохирсон байна.

Хөл хорионы дэглэмтэй холбоотойгоор хөдөлгөөн сийрэг үед жолооч нар хурд хэтрүүлэх, улирал, цаг агаарын нөхцөлд тохироогүй зуны дугуйтай хөдөлгөөнд оролцож яваад зам, замын байгууламж мөргөж гэмтээх, бусдын болон өөрийн эд хөрөнгөнд хохирол учруулах явдал гарсаар байна.