Нийслэлийн Засаг дарга бөгөөд Улаанбаатар хотын Захирагч Д.Сумъяабазар БНСУ-ын Сөүл хотноо албан томилолтоор ажиллаж буй билээ. Энэ хүрээнд Хан мөрний бүтээн байгуулалттай танилцан, туршлага судалж, Туул голын тохижилтод нэвтрүүлэх талаар туршлага судалж байгаа билээ. Энэ үеэр Нийслэлийн Засаг даргын Захиргаа, хууль эрх зүйн асуудал хариуцсан ахлах зөвлөх Д.Мөнх-Эрдэнэ мэдээлэл хийлээ.

                Тэрбээр “БНСУ-ын Сөүл хот иргэдийнхээ амар тайван амьдрах, бизнес эрхлэх боломжийг хангах тал дээр олон ажил хийсэн байна. Хан мөрний бүтээн байгуулалт нь  нэг талаасаа иргэдийн амрах газар, нөгөө талаасаа бизнесийн орчин бүрдүүлсэн байна. Жилд 60 сая хүн цуглуулдаг, хотынхоо дундуур урсаж байгаа 41 километр орчим урт голыг бизнесийн төв болгож хөгжүүлсэн байна. Улаанбаатар хотын  Сэлбэ, Туул зэрэг голуудын ойр орчмыг Хан мөрөн шиг болгох ажлыг судлах шаардлагатай байна. Бид өнөөдөр Хан мөрний бүтээн байгуулалтад оролцдог ААН-ын төлөөлөлтэй уулзсан. БНСУ-аас мэргэжлийн хүмүүсийг Улаанбаатар хотод урьж, хотынхоо нөхцөл байдлыг танилцуулах, туршлага судлах зүйлс их байна. Агаарын бохирдлыг арилгах ажлын хүрээнд хуучны орон сууцын дулаан алдагдлыг багасгах арга хэмжээ авсан. Уур амьсгалын өөрчлөлтийн эсрэг авч байгаа арга хэмжээ юм. Нийтийн тээвэр болон автомашины хорт утаа ялгарлыг бууруулах вэ гэдэг чухал байгаа” гэв.