Монгол Улсад орогнож байсан Өвөрмонгол зохиолч А.Лхамжавыг, нууцаар хил давуулжээ. Тодруулбал, өнгөрсөн гуравдугаар сард орогнол хүсэн Монголын хил давж, Улаанбаатарт амьдарч байсан Өвөрмонгол зохиолч А.Лхамжавыг энэ сарын 3-ны өдөр БНХАУ-ын тусгай албаныхан баривчилж, нууцаар хил давуулсан байна. Тэрбээр БНХАУ-ын Засгийн газар, эрх баригчдын эсрэг зогсдог цөөн Өвөрмонгол зохиолчийн нэг бөгөөд баривчлагдахаасаа өмнө Хятадын коммунист намын Өвөрмонгол дахь монгол, соёлыг дарангуйлж, үгүй хийсэн бодлогын талаар гурван боть ном хэвлүүлэх гэж байсныг эх сурвалж мэдээлжээ.

                    Өвөрмонгол зохиолч А.Лхамжав өмнө нь Хятадын коммунист нам, БНХАУ-ын Засгийн газар жижиг үндэстнийхээ соёлыг хавчин боож байгаа тухай бичсэн номноосоо болж 2019 онд Хятадын хуулийн байгууллагаас хорих ял сонсоод байжээ. Одоогоор зохиолч А.Лхамжавыг ямар нөхцөл байдалд хоригдож байгаа талаарх мэдээлэл ил болоогүй байгаа бөгөөд эх сурвалжийн мэдээллээр БНХАУ-ын тусгай албаныхан зохиолчийн хэвлүүлэхээр бэлтгэж байсан гурван боть номны эхийг олоогүй байгаа гэнэ.

Эх сурвалж: "Bitter Winter" цахим сэтгүүл