Төв аймгийн хойд болон зүүн талын сумдын нутгаар их хэмжээний цас орж, цасан шуурга шуурсны улмаас Улаанбаатараас зүүн аймгуудыг чиглэсэн замд халтиргаа гулгаа үүсэн зорчих хөдөлгөөнд эрсдэл үүсээд байсан билээ. Тэгвэл өчигдөр буюу аравдугаар сарын 30-ны өдөр Улаанбаатар-Хэнтий, Улаанбаатар-Сүхбаатар, Хэнтий-Улаанбаатар чиглэлийн зорчигч тээврийн гурван автобус шөнийн цагаар замаа үргэлжлүүлэх боломжгүй болж, Багануурт саатсан юм. Үүний улмаас гурван автобусны 125 зорчигчийн 70 зорчигчийг Багануур ХК-ны уурхайчин спорт зааланд байрлуулж, шаардлагатай гудас хөнжил гэх мэт зүйлээр хангаад байсан билээ.

      Энэ талаар Багануур дүүргийн Засаг даргын орлогч Б.Балжиннямаас тодруулахад “Бид үүссэн нөхцөл байдлыг харгалзан үзээд ойролцоох аймгуудын удирдлага руу холбогдож, иргэдийг байрлуулах байр, бусад шаардлагатай зүйлсээр хангах боломжтой эсэхийг асуусан. Ингэхэд боломжгүй хариу авсан тул, иргэдийг зайлшгүй Багануур дүүрэгт байрлуулахаар болж, Багануур ХК компанийн Уурхайчин спорт цогцолбортоо буудаллуулан ор дэвсгэрээр ханган хонуулж, хөнжил гудас шаардлагатай зүйлсээр хангасан. Мөн замын хөдөлгөөнийг албан ёсоор хаасан мэдэгдэл ирээгүй учраас цаашид зорчих боломжтой эсэхийг судалж, иргэдийн аюулгүй байдлыг ханган ажиллана” гэв.