НИТХ-ын дарга асан, 60 тэрбумын хэрэгт холбогдсон улс төрийн хоригдол асан Ц.Сандуйг хүн төрөлхтний бэлэг тэмдэг болсон "Бээжин-2022" өвлийн олимпод туг барьж явааг хараад монголчууд үнэндээ мэл гайхаж, зарим нь "Монголд үүнээс өөр туг барьчих тамирчин, дарга, цэрэг олдохгүй байна гэж үү. Л.Оюун-Эрдэнэд үүнээс өөр хүн олдоогүй гэж үү дээ" хэмээн ундууцаж байлаа. Учир нь, тэрбээр МАН-ын “автор” мэт болсон 60 тэрбумын хэрэгт холбогдож, 2019 оны хоёрдугаар сард намаасаа хөөгдөж, дөрвөн жилийн ял сонсож явсан улс төрийн "хоригдол" нэгэн билээ. 

       Цагтаа Ц.Сандуйг өнөөгийн Ерөнхий сайд Л.Оюун-Эрдэнэ нарын фракц М.Энхболдын фракцтай нь хамт олны өмнө "60 тэрбумын схемчин, төсвийн мөнгийг хууль бусаар хулгайлагсдын нэг" хэмээн цоллож, нүүр хийх газаргүй болгож явсан билээ. Гэтэл өдгөө дэлхий нийтийн эв нэгдлийн бэлгэ тэмдэг олимпын тугаа түүгээр бариулан алхуулж, өөрөө түүнийг нь стадионы суудлаас харж сууна. Улс төрд битгий хэл төрийн албанд багтах шингэх завсаргүй болтол нь түүнийг гэм буруу, худал хуурмагийг илчилж, хууль, хяналтын байгууллагаас "Оргон зайлж болзошгүй тул саатуулан шалгана" хэмээн баривчилж асан түүнд хэн Монголын үндэсний олимпын хорооны гүйцэтгэх зөвлөлийн гишүүн хэмээх албан тушаал олгосон нь олон нийтийн сонирхлыг ихээхэн татаж буй. Ямартай ч Монголын улс төр нэгэн цагт Монгол төрийн босгоор алхуулж болохгүй эсэргүү, төрд тэрслэгч мэтээр шалгаж, ярьж, цоллож, шийтгэж асан хүмүүсээ эргээд төрийн хийгээд томоохон албан тушаалд томилсоор байгаа цагт шинэчлэл, шударга ёс мөд тогтохгүй биз ээ. 

ЦЭНДСҮРЭНГИЙН САНДУЙ ГЭЖ ХЭН БЭ

          Ц.Сандуй 1970 онд Улаанбаатар хотод төрсөн. Нийслэлийн нэгдүгээр сургууль, 31 дүгээр сургууль, ОХУ-ын Москва хотын Эдийн засаг, Статистикийн дээд сургуулийг инженер, эдийн засагч мэргэжлээр төгссөн. Эдийн засгийн ухааны магистр, Англи, Орос хэлтэй. 1997-2012 онд Нийслэлийн газрын албанд төрийн байцаагч, ахлах мэргэжилтэн, хэлтсийн дарга, дэд дарга, албаны дарга, Нийслэлийн Засаг даргын орлогчоор ажиллаж байжээ. Мөн 2012 оны наймдугаар сараас Нийслэлийн Монгол Ардын намын даргаар, 2016 оноос НИТХ-ын Тэргүүлэгчдийн даргаар ажиллаж байв. Тэрбээр өдгөө Монголын үндэсний олимпын хорооны гүйцэтгэх зөвлөлийн гишүүн, Монголын триатлоны холбоог удирдаж байгаа аж. Түүнийг УИХ-ын дарга асан М.Энхболдын хүн гэх.

Ц.САНДУЙН ХӨРӨНГӨ ОРЛОГЫН МЭДҮҮЛЭГТЭЙ ТАНИЛЦ

          Тэрбээр 2019 онд хөрөнгө орлогын мэдүүлэгтээ “38 сая 940 мянган төгрөгийн орлоготой. Тэрбум 487 сая төгрөгийн дөрвөн орон сууцтай, нэг зуслангийн байшинтай, 174 сая 200 мянган төгрөгийн автомашин, мотоциклтой, 11 сая төгрөгийн малтай, 45 сая төгрөгийн газартай, “Гүнтүшан хаан” ХХК, “Алтан тойг” ХХК, Эрдэнэс тавантолгой ХХК-аас хувьцаа эзэмшдэг” гэжээ.

      Ц.Сандуй өвлийн олимпод туг барьж явахаас гадна олимпод оролцох баг тамирчдад наадмын нээлт болон тэмцээн уралдааны үеэр өмсөх хувцас, хэрэглэлийг гардуулан өгсөн юм.