-ТОМ БОЛООД ШҮЛЭГ БИЧИЖ, ЗОХИОЛЧ БОЛОХЫГ МӨРӨӨДДӨГ-

         Монгол Улсын гурван сая дахь иргэн 2015 оны нэгдүгээр сарын 24-ний 08:27 цагт мэндэлсэн билээ. Манай улсын гурван сая дахь иргэнээр Өмнөговь аймгийн Даланзадгад сумын иргэн Энхтүвшингийн Хатанболд, Ганбатын Аззаяа нарын ууган охин Х.Монголжин албан ёсоор бүртгэгдэж байсан юм. Тухайн үед Ерөнхийлөгч асан Ц.Элбэгдорж охинд Монголжин хэмээх нэр хайрласан билээ. Тэрбээр өнөөдөр долоон нас хүрч байгаа юм. Бид Х.Монголжинд төрсөн өдрийн мэнд хүргэж, цөөн хором ярилцлаа.

-Сайн уу, төрсөн өдрийн мэнд хүргэе. Сайхан баярлаж байна уу?

     -Баярлалаа. Миний төрсөн өдрийг тэмдэглэх гээд ээж завгүй байна. Би “Ямар бэлэг өгөх юм бол доо” гэж хүлээгээд л сууж байна. Ээж "Нууц" гээд ямар бэлэг өгөхөө хэлэхгүй байгаа юм. Удахгүй баярынхаа лааг үлээж, бялуугаа зүснэ дээ. Сургууль амарчихсан болохоор жаахан уйтгартай байна.Одоо би зураг зурж, будах гээд сууж байна.

-Ангийнхантайгаа холбогдсон уу. Чамд төрсөн өдрийн баярын мэнд хүргэсэн үү?

     -Би Өмнөговь аймгийн улсын тэргүүний гуравдугаар сургуулийн нэгдүгээр ангид сурдаг. Одоохондоо ангийнхантайгаа холбогдож чадаагүй байна. Ангийн багш цахимаар төрсөн өдрийн мэнд хүргэсэн байна лээ. Багшдаа танай сайтаар дамжуулаад дахин “Баярлалаа” гэж хэлье. Найзуудаа их санаж байна. Ангийнхантайгаа хурдан уулзмаар байна.

-Монгол Улсын гурван сая дахь иргэн гэдгээ мэддэг үү. Чиний нэрийг хэн өгснийг бас мэдэх үү?

     -Би өөрийгөө Монгол Улсын гурван сая дахь иргэн гэдгээ мэддэг. Би гурван найзтай. Найзууддаа энэ тухайгаа хэлсэн. Тэд намайг “Ямар гоё нэртэй юм бэ” гэж байна лээ. Миний нэрийг Монгол Улсын Ерөнхийлөгч асан Ц.Элбэгдорж өгсөн. Би нэрэндээ маш дуртай.

-Өнгөрсөн жил төрсөн өдрөө хэрхэн тэмдэглэсэн бэ?

     -Өнгөрсөн жил баярын ширээ засаж, бялуугаа голдоо тавьж тэмдэглэсэн. Ээж удахгүй дэлгүүр рүү явж, бялуу авна гэсэн.

-Төрсөн өдрөөр нь хүмүүс ямар бэлэг өгч байсан бэ?

    -Ном, тэмдэглэлийн дэвтэр, өнгийн будаг, чихэр өгч байсан. 

-Ямар баярт хамгийн дуртай вэ?

     -Би шинэ жилд дуртай. Бялуу зүсдэг болохоор гоё санагддаг.

-Чи бялуунаас өөр ямар амттанд дуртай вэ?

     -Би бялуунд их дуртай. Мөн алим, лийр, лууванд дуртай.

-Хичээлийн амралтаараа юу хийж байна вэ?

     -Намар бүжгийн дугуйланд явж эхэлсэн. Одоохондоо явж амжихгүй байна. Амралтаараа телевизээр хүүхэлдэйн кино үзэж, ээждээ туслаж байгаа.

-Ямар хичээлдээ дуртай вэ. Чиний мөрөөдөл юу вэ?

    -Би монгол хэлний хичээлдээ дуртай. Хагас үсгээ үзээгүй байгаа. Бас 1-20 хүртэл тоог нэмж, хасаж чадна. Том болоод шүлэг бичиж, зохиолч болохыг мөрөөддөг. Өөр зөндөө мөрөөдөл бий. Тухайлбал, зураач, бүжигчин, цэцэрлэгийн багш, дуучин болно гэж боддог.  

-Хэдүүлээ амьдардаг вэ?

    -Би ээж, дүүтэйгээ амьдардаг. Дүү маань цэцэрлэгт явдаг.