Нийслэлийн лавлагаа, мэдээллийн 1800-1200 тусгай дугаарын утсанд өчигдөр буюу гуравдугаар сарын 15-нд 355 дуудлага ирүүлжээ. Уг дуудлагын 123 буюу 34.6 хувь нь машин ачилт,  69 буюу 19.4 хувь нь төрийн байгууллагын үйлчилгээ, хаяг, утас, байршлын талаар лавлажээ. Мөн иргэд коронавирусийн вакцины үр дүн, аюулгүй байдлын талаар асуух нь түгээмэл байгаа аж. Иймд Нийслэлийн лавлагаа, мэдээллийн төвөөс иргэдийн асуултад дараах хариултыг өглөө.

-Коронавирусийн эсрэг вакциныг заавал хийлгэх ёстой юу?

-Вакциныг сайн дурын үндсэн дээр хийж байгаа. Гэвч коронавирусийн халдвараас сэргийлэх үүднээс вакциныг заавал хийлгэх хэрэгтэйг мэргэжлийн байгууллагууд зөвлөж байна. Учир нь уг вакцин таныг коронавирусээр өвдөхөөс хамгаална. Мөн вакцин хийлгэсний дараа халдвар авсан ч өвчин хүндрэхээс хамгаалах ач холбогдолтой. Түүнчлэн вакцин хийлгэснээр ойр дотны хүмүүсээ халдвар авахаас сэргийлэх юм.

-Коронавирусийн вакцинаас халдвар авах уу?

-Үгүй. Одоогоор хүн амд хэрэглэхээр баталгаажсан вакцинууд нь амьд вирус агуулаагүй тул вакцинаас ямар нэгэн халдвар авахгүй.

-Вакцин хийлгээд дархлаа тогтож амжаагүй байхад халдвар авч болох уу?

-Вакцин хийлгэснээс хойш 14 хоногийн дараагаас дархлаа тогтоно гэж үзэж байгаа. Тиймээс вакцин хийлгэхийн өмнө, эсвэл дөнгөж хийлгэсний дараа дархлаа тогтох хүртэлх хугацаанд вирусийн халдвар авах боломжтой.

-Хэрэв би халдвар аваад эдгэрсэн бол заавал вакцин хийлгэх ёстой юу?

-Тийм. Халдвар аваад эдгэрсэн хүн дахиад халдварлах магадлалтай тул вакцин хийлгэх нь зөв. Халдвар аваад эдгэрсний дараах дархлаа хэр удаан хугацаанд хамгаалдаг тухай одоогоор мэдээлэл байхгүй, судлагдаагүй байна.

НИЙСЛЭЛИЙН ҮЙЛЧИЛГЭЭНИЙ НЭГДСЭН ТӨВ