Мянга мянган хүний догдлон байж, хоног тоолон хүлээдэг хамгийн чамин баяр бол шинэ жил. Бид хайртай хүмүүстэйгээ баярын ширээгээ тойрон сууж, ирээдүйн нандин мөчөө халуун сэтгэл, хайр энэрэл, аз жаргал, хорвоогийн хамгийн сайхан бүхнээр төсөөлж, хуучин оноо үдэж, шинэ онтойгоо учран золгодог. 

Бидний баяр дээр баяр нэмж, инээд хөөр бэлэглэж чаддаг, үзэгч олонд хөгжилтэй дүрээрээ танил болсон чадварлаг, авьяаслаг, “ТВ коктейль” хамтлагийн жүжигчин А.Өнөржаргал буюу Өөскөтэй ярилцаж, шинэ жилийн баярын дурсамжаар нь аяллаа.

-Шинэ жил гэхээр танд хамгийн түрүүнд юу санаанд ордог вэ?

-Миний хамгийн дуртай баяр бол шинэ жил. Өнгөрсөн ондоо хийсэн, бүтээсэн бүхнээ үнэлж, дүгнэн дурсамж болгон нандигнан хадгалдаг. Тэгээд шинэ хэмээх тодотголтой он цаг эхэлдэг болохоор ихэд баярлаж, амжилт бүтээл, аз жаргал, инээд хөөрөөр дүүрэн байх бэлгэ дэмбэрэлтэй сайхан ерөөлийг бие биедээ хэлж, бэлгэшээдэг. Уран бүтээлчдийн  хувьд олон түмнээ баярлуулдаг, цэнгүүлдэг, хөгжөөдөг. Шинэ жилийн баярын үед ажил маань ид оргилдог.

-Хүүхэд байхдаа өвлийн өвгөн, цасан охин байдагт итгэдэг байв уу?

-Цэцэрлэгт байхдаа өвлийн өвгөн, цасан охин байдагт итгэдэг байсан. Өвлийн өвөөгөөс бэлэг авах гэж хичээдэг хүүхэд байлаа. Нэгдүгээр ангидаа өвлийн өвөөгөөс бэлэг аваад л бөөн баяр болсон. Гэхдээ энэ үеэс л өвлийн өвгөн байдаг эсэхэд эргэлзсэн. Яагаад гэвэл манай сумын биеийн тамирын багш өвлийн өвгөн болсон юм. Тэгээд би багшийгаа таниад маш их гайхаж эргэлзээд, итгэл алдарч байсан даа.

-Сэтгэлд хамгийн тод үлдсэн, хамгийн гоё бэлгийг хэн өгч байсан бэ?

-2007 онд шинэ жилийн болох гээд ид ажилтай байх үед анхны хүү маань төрж, манай гэр бүл аз жаргалаар бялхаж, цалгиж байлаа. Бяцхан үрдээ зориулж гацуур засаж, гэрээ чимэглээд их романтиклаж билээ. Тэр үед би энэ хорвоогийн хамгийн нандин, мартагдашгүй бэлэг авсан гэж боддог.

-Сурагч байхдаа шинэ жилд орж, урлагийн номер үзүүлдэг байв уу?

-Сурагч байхдаа алиалагч, 12 жилийн амьтан болж шинэ жилд идэвхтэй оролцдог байсан. Багаасаа л дуу, хөгжим, баяр, наадамд дуртай жаал байж дээ.

-Шинэ жилийн баяраа хэрхэн тэмдэглэх бодолтой байна вэ?

-Энэ жил их онцлогтой шинэ жил болж байна. Дэлхий нийтэд цар тахал гарсантай холбоотойгоор гэр бүлийнхээ хүрээнд  шинэ жилийн баяраа тэмдэглэнэ. Урьд жилүүдийн өдийд ундарсан их ажлаа хийгээд, хамт олонтойгоо хөгжилдөж мэргэжлээ мэдэрч, эрч хүч цуглуулж шинэ онтой учран золгодог байж. Гэхдээ энэ жил зөвхөн гэр бүлийнхэнтэйгээ тэмдэглэх болохоор нандин, эрхэм санагдаж байна.

-Ярилцсан танд баярлалаа. Шинэ оноо сайхан угтаарай.

-Баярлалаа. Өвчин зовлон өнгөрсөн ондоо үлдэж, шинэ жилдээ амжилт, бүтээл, аз жаргалаар дүүрэн байхыг монгол түмэндээ хүсэн ерөөе. Та бүхэнд шинэ жилийн баярын мэнд хүргэе.