Бахрейн Улсын Манама хотод холимог тулааны залуучуудын Ази тивийн аварга шалгаруулах тэмцээн 2025 оны наймдугаар сарын 27-31-ний өдрүүдэд зохион байгуулагдаж өндөрлөсөн билээ. Энэ удаагийн залуучуудын Азийн аваргад 19 орны 300 гаруй тамирчин оролцсон байна. Азийн аваргын “U18” ангиллын сонирхогчдын холимог тулааны охидын 60 кг-ын жинд  Б.Өлзийтнаран хүрэл медаль хүртэж, Азийн залуучуудын наадамд оролцох эрх хүртсэн юм. Азийн аваргын хүрэл медальт  жүдо бөхийн “Женко” клубийн тамирчин, ерөнхий боловсролын “Ган зам” 20-р дунд сургуулийн сурагч Бат-Эрдэнийн Өлзийтнарантай ярилцлаа.

-Холимог тулааны Азийн аваргаас хүрэл медаль хүртсэнд баяр хүргэе.

         -Баярлалаа.

-Холимог тулааны Азийн аваргын хэдэн кг-ын жинд тулалдав?

     -Холимог тулааны залуучуудын Ази тивийн аваргын тулааны уламжлалт төрлийн эмэгтэйчүүдийн 60 кг-ын жинд тулалдаж хүрэл медаль авсан.

 - Хэдэн  тулаан хийж хүрэл медаль хүртсэн бэ?

       -Энэ удаагийн холимог тулааны залуучуудын аварга шалгаруулах тэмцээний 60 кг-ын жинд нэг ялалт, нэг ялагдалтайгаар хүрэл медаль хүртсэн. Анх удаа тулааны Ази тивийн аваргад оролцсон учраас надад тулааны туршлага, техник, тактик дутсан тал бий. Холимог тулааны УАШТ-ээс өөр тулааны тэмцээнд оролцож байгаагүй.

-Жүдочин охин маань яагаад тулааны тамирчин болчихсон бэ?

      -Би уг нь тулааны спортыг сонирхож байгаагүй л дээ. Жүдо бөхөөр л барилдаж сонирхолтой байсан.  Анх МУГД Шархүүгийн Цэвэлмаа багш маань “Чамд барилдаж, тулалддаг, холимог тулааны  спортод амжилт гаргах боломж бий шүү” гэсэн. Тэгээд л холимог тулааны улсын аварга шалгаруулах тэмцээнд оролцох санал тавьсан юм. Багшийн хүсэлт, зөвлөгөөг дагаад л холимог тулааны УАШТ-д анх удаа оролцож, өрсөлдөөд  мөнгөн медаль хүртсэн.

 -Цаашид жүдо бөх, холимог тулааныг хослуулан хичээлэх юм уу?

       -Тийм ээ, жүдо бөх маань тулааны спортын нэг төрөл шүү дээ. Өрсөлдөгчийг өчих, боох мэхээр цэвэр ялалт авдаг. Тийм болохоор холимог тулаан болон жүдо бөхийн спортоо хослуулан хичээллэнэ гэж бодож байгаа.

-Миний дүү өөрийгөө манай уншигчдад танилцуулахгүй юу?

       -Намайг Бат-Эрдэнэ овогтой Өлзийтнаран гэдэг.  Нийслэлийн ерөнхий боловсролын лаборатори “Ган зам” 20-р дунд сургуулийн 12-ын “В” ангийн сурагч. Айлын дунд охин байгаа.

-Аль аймаг, хотод төрсөн хүүхэд вэ?

        -Би Улаанбаатар хотод төрж, өссөн. Унаган хотын хүүхэд.

 -Одоо хэдэн настай вэ?

        -Би одоо 17 настай.

-“Женко” клубийн хэн багшийн шавь бэ?

        -Жүдо бөхийн спортын Монгол Улсын гавьяат дасгалжуулагч  Шархүүгийн Цэвэлмаа болон ОУХМ Саранзаяа багш нарын шавь.  

-Жүдо бөхөөр хэд дэх жилдээ хичээллэж байгаа вэ?

     -Жүдо бөхийн спортоор зургадугаар ангид байх үеэсээ хойш хичээллэсэн гэхээр одоо зургаа  дахь жилдээ хичээллэж байгаа.

-Жүдо болон тулааны спортын ямар зэрэг, цолтой тамирчин бэ?

      -Одоогоор жүдо бөх болон холимог тулааны спортын ямар нэгэн улсын зэрэг, цол аваагүй байгаа.

-Тулааны спортоор хэзээнээс хичээллэх болов?

       -Холимог тулааны 2025 оны УАШТ-д оролцож медаль хүртээд, тэр  цагаас хойш хичээллэж байгаа. Нэг жил ч болоогүй байна.

–Холимог тулааны босоо болон хэвтээ барилдаанд жүдо бөхийн ямар мэх техникийг голчлон хийдэг вэ?

     -Холимог тулаанд миний давуу тал барилдаан болдог. Тийм болохоор босоо тулаанд  ихэвчлэн тонгорох, тохох  мэхийг хийдэг. Харин хэвтээ тулааны үед боох, өчих мэхийг голчлон хийдэг.

-Тулааны спортоор хичээллэсэн үеэс хойших томоохон амжилтаасаа сонирхуулахгүй юу?

      -Сая оролцсон  холимог тулааны залуучуудын Азийн аварга шалгаруулах тэмцээний хүрэл медаль байна. Мөн 2025 оны холимог тулааны Монгол Улсын аварга шалгаруулах тэмцээний  мөнгөн медаль бий.

-Самбо, жүдо бөхийн хэдэн кг-ын жинд барилддаг вэ?

      -Би самбо, жүдо бөхийн тэмцээнд 70 кг-ын жинд барилддаг.

-Самбо, жүдо бөхийн томоохон ямар тэмцээнүүдэд оролцож, ямар амжилт гаргаж байсан бэ?

      -Жүдо бөхийн улсын аварга шалгаруулах тэмцээний хошой аварга. Харин самбо бөхийн улсын аваргын хүрэл медальтай. Олон улсын тэмцээний хоёр алт, нэг мөнгөн медальтай. Ирэх аравдугаар сарын 22-31-ний өдрүүдэд Бахрейн Улсад зохион байгуулагдах Азийн залуучуудын III  их наадамд оролцох эрхийг хүртсэн байгаа. Манай улсаас зургаан тамирчин эрх авч оролцохоор болсон.