Йордан Улсын Амман хотод сонирхогчдын боксын “U15”, “U17” хүртэлх насны Ази тивийн аварга шалгаруулах тэмцээн дөрөвдүгээр сарын 19-30-ны өдрүүдэд болж байна.

       Тэмцээнд 18 орны хөвгүүд 250, охид 155, нийт 405 тамирчин өрсөлдөж байгаа юм. Манай улсаас Р.Жоланман, Ж.Бат-Отгоны удирдлага дор долоон тамирчин тулалдсанаас хоёр тамирчин медаль хүртэх нь тодорхой болов.

      Тэмцээний хөвгүүдийн 75 кг-ын жинд Т.Даваажав хүрэл медаль хүртсэн бол охидын 46 кг-ын жинд А.Алтанзул мөнгөн медалийн болзол хангалаа. А.Алтанзул нөгөөдөр алтан медалийн төлөө Энэтхэгийн тамирчинтай тулалдана. Тэрбээр залуучуудын УАШТ-ий хошой алт, өсвөрийн УАШТ-ий хошой алтан медальтай тамирчин юм.