Архангай аймгийн Цэцэрлэг хотод баригдаж байгаа 22 мВт-ын хүчин чадал бүхий дулааны цахилгаан станцын шав тавих ёслол өнөөдөр боллоо. Энэхүү төсөл нь төрийн бодлого, хувийн хэвшлийн хөрөнгө оруулалтаар эхлүүлж буй нийгэм, эдийн засгийн онцгой ач холбогдолтой бүтээн байгуулалт болж байна. Төсөл нь зөвхөн нэг бүтээн байгуулалтын төсөл бус Архангай аймгийн ирээдүйн тогтвортой хөгжил, иргэдийн ажиллаж, амьдрах таатай орчныг бүрдүүлэх томоохон дэд бүтцийн ажил юм.

   Энэхүү төсөл баригдсанаар Архангай аймгийн төвийн цахилгаан болон дулааны өсөн нэмэгдэж буй хэрэгцээг олон жилийн турш тасралтгүй, найдвартай хангах боломж бүрдэх юм. Төвлөрсөн дулаан хангамж нь олон тооны жижиг зуух, нам даралтын зуухнаас гарах утаа, агаарын бохирдлоос үүдэлтэй өвчлөлийг бууруулах болно. Найдвартай эрчим хүчний эх үүсвэр нь аймгийн үйлдвэрлэл, бизнес, шинэ хөрөнгө оруулалтын суурь нөхцөлийг бүрдүүлэх юм.

   Барилга угсралтын шатнаас эхлэн ашиглалтад орох хүртэл орон нутгийн иргэдийг ажлын байраар хангаж, нутаг орныхоо хөгжилд өөрсдийн хувь нэмрийг оруулах боломжийг нээх гэх мэт олон давуу тал, ач холбогдолтой болно. Уг хосолсон станц нь төр, хувийн хэвшлийн түншлэлийн хамтын ажиллагааны хүрээнд хийгдэж байгаа нийгмийн хөгжлийн үнэ цэнийг бүтээх ач холбогдолтой төсөл болж байна.

    Төрөөс станцын дэд бүтэц болох шугам сүлжээний 80 орчим тэрбум төгрөг, хувийн хэвшлээс 150 орчим тэрбум төгрөгийн өртөгт ажлыг хариуцан ажиллах юм. Энэ дашрамд энэхүү төслийг хэрэгжүүлэгч, хөрөнгө оруулагч “АПП Энержи” ХХК болон “Энержи Девелопмент” ХХК-ий мэргэжлийн зөвлөх инженер, мэргэжилтнүүдэд талархал илэрхийлье.