• Өнөөдөр 2026-09-06

ААВ Н.ЭНХБАЯРААСАА 17 КОМПАНИ ӨВӨЛЖ АВСАН ХОВДОД УУРХАЙТАЙ Э.БАТШУГАР

2026-04-15,   940

Ерөнхийлөгч асан Н.Энхбаяр хүү Э.Батшугарыгаа Төрийн ордон руу зүтгүүлсээр 2021 оны нөхөн сонгуулиар МАХН-ыг МАН-тай нэгтгэж, гишүүн болгосноор санаагаа амраасан. Улмаар Э.Батшугар 2024 онд мөн л Сонгинохайрхан дүүрэгт горилж, УИХ-д улирч суусан. Н.Энхбаярыг Монголын хаан байх үед “Э.Батшугар ахлах сургуулиа АНУ-д төгсөж, банкны эдийн засагч мэргэжил эзэмшсэн. Сургуулиа төгсөөд АНУ-ын Хөрөнгө оруулалтын банканд гурван жил ажиллаж, 2011 онд Монголд ирмэгцээ Монголбанкны Дэд ерөнхийлөгчөөр заларч, 2016 онд Монголбанкны Дэд ерөнхийлөгчөөс чөлөөлөгдөж, тэр даруйдаа аав Н.Энхбаяраасаа 17 компани өвлөж авсан.

     Тодруулбал, тэрбээр “Милленниум групп” ХХК, “Миллнниум капитал интернейшнл” ХХК, “Милленниум энтертэйнмент” ХХК, “Момиэд” ХХК, “Милленниум финанс” ХХК, “Сод маргад” ХХК, “ЗГМС” ХХК, “Засгийн мэдээ” ХХК, “Эс Си Эн Майнинг” ХХК, “Рескон” ХХК, “Медиахолдинг” ХХК, “Ремиф технложис” ХХК, “Монсамил” ХХК, “Монфарм трейд” ХХК, “И эл Лимитэд” ХХК-д хувьцаа эзэмшдэг. Н.Энхбаяр Ерөнхий сайд байхдаа “Засгийн газрын мэдээ” сониныг хувьчилж аваад “Зууны мэдээ” сонин болгон өөрчилж, “Эскон” ХХК-д харьяалуулсан. “Media холдинг” компанийн 500 ширхэг хувьцааг эзэмшдэг байсан УИХ-ын гишүүн Ц.Мөнх-Оргил өөрийн хувиа Н.Энхбаярын дүү Н.Энхтуяагийн нэр дээр шилжүүлснээр Н.Энхтуяа нь “Эскон” компаниа “Media холдинг”-д нэгтгэж ТV9 телевиз, Зууны мэдээ сонинд тус тус хөрөнгө оруулалт хийсэн. “Media холдинг” ХХК нь ТВ9 телевиз, Зууны мэдээ сонин), 103.6 FM радиог эзэмшдэг. Өдгөө “Эскон” ХХК нь “Милленниум” группт харьяаллагддаг аж.
     
     Ийн Ерөнхийлөгч асан Н.Энхбаяр бизнесээ хүү Э.Батшугартаа шилжүүлж, зүс хувиргаснаар олны анхаарлаас холдоод байгаа. Э.Батшугарыг хэвлэлийн, хөрөнгө оруулалтын бизнестэй мэт харагддаг боловч уул уурхайн бизнес ч түүнд бий. Тодруулбал, Н.Энхбаяраас Э.Батшугарт шилжсэн “Сод маргад” ХХК нь Ховд аймгийн Дуут сумын Шивэр багийн нутагт XV-014066 дугаартай, 11575.72 га талбайтай Дуут хэмээх хайгуулын тусгай зөвшөөрлийг 2008 оноос хойш эзэмшиж ирсэн. Нэг ёсондоо Н.Энхбаяр “Хаан” гэгдэж байхдаа тусгай зөвшөөрөл авч, хожим хүүдээ шилжүүлсэн гэсэн үг.
      Хамгийн ноцтой нь, XV-014066 дугаартай энэхүү тусгай зөвшөөрөлтэй талбай нь Дуут сумынхны тахилгат уул болох Бүргэдтэй хайрханы бэлд олгогдсон. Тиймээс Н.Энхбаяр улс төрийн карьераа бодолцож, хайгуул хийхгүй хав дарж хадгалж үлдээсэн. Харин 2019 оны намар Э.Батшугар хайгуул эхлүүлэхээр шийдэж, “Сод маргад” ХХК-ийн ажилчид нь Ховдын Дуут сумын Бүргэдтэй хайрхан бэлд очиж, кемпээ байгуулж, олон тооны өрөм зоож, хайгуулын ажлаа эхлүүлсэн байгаа юм. Үүнийг нь нутгийн иргэд эсэргүүцэж, энэ эсэргүүцэл өндрөө авч, Ховд аймгийн ИТХ-аас Ажлын хэсэг байгуулагдснаар “Сод маргад” ХХК-ийн үйл ажиллагааг зогсоосон. Бүргэдтэй хайрхан уул нь Буянт голын эх ундаргыг бүрдүүлдэг, зэрлэг амьтдын өлгий нутаг учраас нутгийн иргэд эсэргүүцэх нь тодорхой байсан. Гэхдээ Н.Энхбаяр, Э.Батшугар хоёрт улс төрд орох төлөвлөгөө хэрвээ байгаагүй бол нутгийн малчдын ая талыг харж, 10 гаруй жил хадгалсан тусгай зөвшөөрлөө “түр“ хаяхгүй байх байсан биз.
 
    Цаашлаад УИХ-ын гишүүн Э.Батшугарын гаднын хөрөнгө оруулагчидтай сүлбэлдсэн баримтыг танилцуулъя.
 
Э.Батшугарын эзэмшдэг “Эс Си Эн майнинг”, “Сод маргад” “Милленниум финанс ББСБ”, “Монсамил”, “И Эл лимитэд ассэт”, “Монфарм трейд” компанийн гүйцэтгэх захирлаар Дариагийн Цэнгэл гэгч бүртгэлтэй. Мөн тэрбээр Э.Батшугарын “Милленниум групп”-ийг удирдаж байв. Д.Цэнгэл нь Э.Батшугарын 2024 оны сонгуулийн зардалд 10 сая төгрөг хандивласан. Тэрбээр “Эрдэнэт үйлдвэр”, “Дун өргөө” ХХК, Гадаад харилцааны яамны дипломат төлөөлөгчийн газарт ажиллаж байсан гэх намтартай. Улмаар Н.Энхбаярыг “Эскон” компаниараа дамжуулан “Өргөө” зочид буудал, “Улаанбаатар таймс” сониныг хувьчлахад нь тус компанийн захирлаар байсан аж. Тэгэхээр Н.Энхбаяр, Э.Батшугар нарын бизнесийн халаас нэгтэй хамтрагч, хамгийн ойрын хүмүүсийнх нь нэг Д.Цэнгэл болж байна. Тэгвэл Д.Цэнгэл нь Э.Батшугарын эзэмшлийн компаниудад гүйцэтгэх захирлаар бүртгэлтэйгээс гадна “Лотто энтертайнмент” компанид 40 хувийн хувьцаа эзэмшдэг аж.
 
        Тус компанийн үлдсэн 60 хувийг “Eurobet” гэх Болгар Улсын хөрөнгө оруулалттай гаднын хуулийн этгээд эзэмшдэг. Ноцтой нь, “Eubrobet” компанийг үүсгэсэн байгуулагчид нь зохион байгуулалттай хууль бус мөрийтэй тоглоом ажиллуулдаг гэдгийг гаднын хэвлэлүүд удаа дараа онцолж байжээ.
 
     Эндээс Ерөнхийлөгч асан Н.Энхбаяр болон түүний хүү Э.Батшугар нь халаас нэгтэй хамтрагчаараа дамжуулан гаднын компаниудаас хөрөнгө оруулалт татаж, хууль бус мөрийтэй тоглоомын компанитай сүлбэлдсэн байж болзошгүй сэжим гарч ирж байна. Ийн Э.Батшугар аавынхаа компанийг өвлөөд зогсохгүй улс төрийн замналыг нь үргэлжлүүлж, хууль тогтоох дээд байгууллагад үе дамжсан эрх ашгаа хамгаалж сууна.

ААВ Н.ЭНХБАЯРААСАА 17 КОМПАНИ ӨВӨЛЖ АВСАН ХОВДОД УУРХАЙТАЙ Э.БАТШУГАР
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3
  • Сэтгэгдэл үлдээсэн: 2026-04-15 12:35:46
    Зочин: Сэтгүүлч ЭМЯ- ны хуучин сайд дарга нарын захиалгаар ийм хачин юм бичдэгээ болиоч ээ. Тэгээд төрд хэн ажиллах ювм. Гудамжаар гүйж явсан Нара гэгч шиг хүмүүс дүүрэх болж байна уу. Нөгөө хулгайч олигорхиуд нь буцаж ажиллах уу. Арай дэндэж байна даа.
  • Сэтгэгдэл үлдээсэн: 2026-04-15 08:46:23
    еэ: Н.Энхбаярын үүсгэсэн хаанчлал ийм л төрийг бий болгосон. Цаг чинь дууснаа.
  • Сэтгэгдэл үлдээсэн: 2026-04-15 08:46:14
    еэ: Н.Энхбаярын үүсгэсэн хаанчлал ийм л төрийг бий болгосон. Цаг чинь дууснаа.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.