Засгийн газраас баталсан хөл хорионы үед мөрдөгдөх түр журмыг танилцуулж байна. Энэ үеэр Нийслэлийн мэргэжлийн хяналтын газрын дарга Л.Эрдэнэчулуун сэтгүүлчдийн асуултад хариуллаа. Тэрбээр "Худалдааны төв болон үйлчилгээний байгууллагын үүдэнд байрлуулсан хаалга нь мэргэжлийн хяналтын байгууллагын зөвшөөрлөөр байрлуулсан хаалга байгаа. Энэ нь халууныг автоматаар үзэх, халдваргүйжүүлэх боломжтой. Ариутгал нь эмнэлгийн салбарт хийгддэг. Мөн саун, халуун ус, бассейн зэрэг эрсдэлтэй аж ахуйн нэгжийн үйл ажиллагааг нээж байгаа. Эдгээр газар нь хүний бөөгнөрөл үүсгэхгүй байх бөгөөд заавал цаг авч үйлчлүүлнэ. Үйлчлүүлсний дараа заавал халдваргүйжүүлэлтийг сайтар хийх ёстой. Бид аж ахуйн нэгжүүдтэй өмнө уулзсаны дагуу бидний тавьж буй тусгай нөхцөлийг хангаж ажиллах боломжтой гэж үзсэн учраас  үйл ажиллагааг нь нээхээр болсон.

Ер нь үйлчилгээний байгууллагуудад салбар бүр дээр харьяа байгууллага нь хяналт тавих юм. Тухайлбал, кино театр, үзвэр үйлчилгээний газруудад Нийслэлийн соёл урлагийн газар, спорт заал, зэрэг бусад байгууллагад Биеийн тамир спортын газар гэх мэтээр эхний ээлжинд харьяа байгууллагууд хянах зохицуулалт хийж байгаа" гэлээ.