Ерөнхий сайд асан Ж.Эрдэнэбат нарын таван хүнийг улс төрд нөлөө бүхий этгээд өөртөө болон бусдад давуу байдал бий болгож, эрх мэдэл, албан тушаалын байдлаа урвуулан ашиглах гэмт хэрэг үйлдсэн хэмээн сонгуулийн сурталчилгааны үеэр баривчилж, 461 дүгээр ангид цагдан хориод байсан юм.

 

Улмаар хоёр шатны шүүхийн шийдвэрээр түүнийг гэм буруутайд тооцож нийтийн албанд томилогдох эрхийг зургаан жилээр хасаж, 6.6 жилийн хорих ялаар шийтгэсэн. Түүнд холбогдох хэргийг Улсын Дээд шүүхийн эрүүгийн хэргийн танхимын шүүх хуралдаанаар 2021 оны нэгдүгээр сарын 15-нд хянан хэлэлцэж, анхан болон давж заалдах шатны шүүхийн шийдвэр магадлалыг хүчингүй болгож, хэргийг прокурорт буцаах шийдвэр гаргасан.  Ингэснээр анхан болон давж заалдах шатны шүүхээс оноосон 6.6 жилийн хорих ялыг хүчингүй болгож, түүний хэргийг дахин мөрдөн шалгахаар болсон юм. Тэгвэл өнөөдөр түүнийг хорих ангиас суллагдаж, Сэлэнгэ аймаг дахь амралтын газарт байгаа гэх мэдээлэл цахим орчинд гараад байна. Хэрвээ хорих ангиас суллагдвал түүнийг УИХ-ын гишүүний тангаргаа өргөх боломжтой гэж үзэж байгаа юм.