МАН-ын 31 дүгээр их хурал өнөөдөр болж байна. Энэ үеэр Монгол Улсын Ерөнхий сайд Г.Занданшатар “Эрхэм журмын нөхөд, их хурлын хүндэт төлөөлөгчдөө, эх орны өнцөг булан бүрээс 317 мянган намын гишүүдийн итгэл, сэтгэл, хүсэл эрмэлзлэлийг тээж ирсэн  эрхэм хүндэт хурлын төлөөлөгчид та бүхэндээ 31 дүгээр их хурлын баярын мэндийг хүргэе. Монгол Улсын тусгаар тогтнол, үндэсний аюулгүй байдлын баталгаа, үндэсний хөдөлгөгч хүч, тулгуур багана болсон МАН-ын 31 дүгээр их хурал ёслол төгөлдөр эхэлж байна. Өнөөдөр энэ түүхэн цаг үеийн хариуцлагыг бид хамтдаа хүлээж, ирэх он жилүүдийн ялалтыг бүтээхээр цуглараад байна. 2027, 2028 оны сонгуулиудад бид заавал ялах ёстой. Энэ бол зөвхөн улс төрийн зорилго биш Монголын ирээдүйд, монгол хүний амьдралд бидний хойч үеийн өмнө хүлээх түүхэн хариуцлага юм. Манай нам, манай засаг олон түмний төлөө оршин байдаг. Бид бүх зүрх сэтгэлээрээ ард түмэндээ үйлчлэх нь манай намын гараа төдийгүй барианы цэг юм. Энэ удаад бид аргаар биш ард түмнийхээ амьдралыг сайжруулсан бодит ажил хэргээр ялалтыг байгуулж чадна. Ард түмэн шударга ёсыг хүсэж байна. Эрх тэгш хүнлэг төрийг хүсэж байна. Засгийн газрын ажлын зарим бодит үр дүнгээс та бүхэнд танилцуулъя. Нүүрсний үнэ хоёр дахин унаж, экспорт хумигдаж, төсвийн нөөц тасарч, валютын нөөц суларч, инфляц эрчимжиж, эдийн засгийн өсөлт саарсан эдийн засгийн бодит эрсдэлтэй бид нүүр тулсан. Ингээд Засгийн газар байгуулагдсан өдрөө төсөвт хяналтын тодотгол хийх шийдвэр гаргаж, төсвийн үрэлгэн зарлагыг танаж, төсвийн зарлагыг түүхэндээ анх удаа 2.2 их наядаар бууруулах хяналтын тодотголыг өргөн барьж батлуулсан. Энэ бол зүгээр нэг тоо биш, төр өөртөө хатуу шаардлага тавьсан, бодит үйлдэл байлаа. Мөн Засгийн газраас  “Эрдэнэс Төвантолгой” баялгийн хулгайтай тэмцэх онцгой дэглэм тогтоож, ердөө гуравхан сарын дотор тээвэр 1.6 дахин өсөж, орлого ашиг бодитой нэмэгдсэн. Энэ мэтчилэн Засгийн газрын ажлын бодит үр дүн гарч байна” гэв.