Хууль зүй, дотоод хэргийн сайд Б.Энхбаяр мэдээлэл хийлээ.

       Тэрбээр "Өнөөдөр би гурван асуудлын талаар мэдээлэл хийнэ. Миний бие 2025 оны есдүгээр сарын 24-ний өдөр NTV телевизийн "Лхагвын тойм" нэвтрүүлэгт орох үеэр УИХ-ын дарга Д.Амарбаясгалан, Монгол Улсын Ерөнхий сайд асан Л.Оюун-Эрдэнэ, түүний ах Баатар нартай холбогдох тодорхой асуудлын талаар мэдээлэл хийсэн. Ингэхдээ зарим асуудлыг ярьсан. Тухайлбал, УИХ-ын дарга Д.Амарбаясгалан руу нэр андуурч, "Эрдэнэс Тавантолгой"-н захирлаар ажиллаж байсан Б.Ганхуяг мессеж бичиж байсан бөгөөд энэ гэрчийг хамгаалалтанд авах тухай асуудал ярьсан. Мөн  "Админерал" гэх ХХК-тай холбоотой асуудлаар УИХ-ын дарга Д.Амарбаясгалан Орчны бохирдлыг бууруулах үндэсний хорооны даргаар ажиллаж байх үедээ үүнтэй холбогдох хурлын протокол, шийдвэрүүд устгагдсан тухай асуудлыг ярьсан. Монгол Улсын Ерөнхий сайд асан Л.Оюун-Эрдэнэ, түүний ах Херо Баатар нарын 50, 50 хувийн өмчлөлтэй Херо энтертаймент ХХК-ийн зүгээс "Гэрэгэ" таурын 14, 15 давхартай холбоотой хууль бус өөрийн эзэмшилд шилжүүлсэн байж болзошгүй үйл баримтын тухай ярьсан. Миний бие одоогоос 17 хоногийн өмнө Хууль зүй, дотоод хэргийн сайдаар томилогдоод ажиллаж байна. Үүнээс хойших хугацаанд өөрийн өмнө ярьсан асуудлын араас уйгагүй ажиллаж байгаа гэдгийг нотлох баримттайгаар өнөөдөр та бүхэнд танилцуулах гэж байгаа юм. Юуны өмнө УИХ-ын дарга Д.Амарбаясгалантай холбоотой гэмт хэргийн шинжтэй асуудлыг Монгол Улсын Прокурорын байгууллагаас яллах дүгнэх үйлдэж, яллагдагчаар татсан бөгөөд Д.Амарбаясгалан яллах тогтоолтойгоо танилцаж гарын үсэг зурсан гэх мэдээлэл авагдсан. "Лхагвын тойм" нэвтрүүлэгт дурдсан "Эрдэнэс Тавантолгой" ХХК-ийн дарга асан Б.Ганхуягийн зүгээс УИХ-ын дарга Д.Амарбаясгалан руу бичсэн мессежийг та бүхэнд үзүүлж байна. Энэхүү нотлох баримт нь Мөрдөн шалгах ажиллагааны хавтаст хэрэгт одоогоор байхгүй бөгөөд авагдаагүй байгаа. Энэ баримтыг би хууль хяналтын байгууллагад нотлох баримтын бүрдэл хангаж хүлээлгэж өгнө" гэв.