УИХ-ын гишүүн Ж.Баясгалан мэдээлэл өглөө. Тэрбээр "Ерөнхий сайд Г.Занданшатар, УИХ-ын дарга Д.Амарбаясгалан тэргүүтэй дарга нар руу шат шатанд нь шаардлага хүргүүлсэн. Өнгөрсөн баасан гарагийн чуулганаар хөгжлийн бэрхшээлтэй иргэдийн халамж, тэтгэврийг нэмэх асуудал ороод, эхний удаад 66 гишүүн дэмжиж, 33 гишүүн татгалзсанаар босож ирсэн. Харин дахиад Шадар сайд гүйцээн боловсруулах чиглэл авья гэсний дагуу гүйцээн боловсруулах чиглэл аваад, өнгөрсөн амралтын өдөр тасралтгүй энэ талаар ярилаа. Энэ хүрээнд бид тодорхой хэмжээнд тохиролцолд хүрч чадлаа. Хөгжлийн бэрхшээлтэй иргэдийн тэтгэмж дотроо хэдхэн төрөл байдаг. Хөгжлийн бэрхшээлтэй иргэн, хөгжлийн бэрхшээлтэй 16 хүртэлх насны хүүхдийн асаргааны тэтгэмж уг нь зургаан хувь гэж ярьсан. Үүнийг 8.6 хувь болгосон байсан. Ингээд үүнийгээ 20 хувь нэмэхээр ямар ч байсан Ажлын хэсэг дээр тооцоолол оруулсан байна. Өөрөөр хэлбэл, зам, барилгатай холбоотой төсвөөс 30 тэрбум төгрөгийг хасаад, хөгжлийн бэрхшээлтэй хүний, хүүхдийн асаргааны тэтгэмж дээр 20 хувь нэмэгдэл буюу 80 мянган төгрөг эхний ээлжид нэмэхээр боллоо" гэв.