Өвчилсөн зургаан иргэн бүгд Франкфуртын нисэх буудлын ачаа тээш, карго хариуцсан талбайн ажилчид байжээ. Тэд ажлаа хийж байхдаа онгоцны ачааны хэсгээс гарч ирсэн шумуулд хатгуулсан гэж таамаглаж байгаа аж. Ажилчдын хэн нь ч ойрын хугацаанд хумхаа өвчний эрсдэлтэй бүс нутаг руу аялаагүй байсан тул халдварыг нисэх буудал дээр авсан нь батлагджээ.

     Ажилчид хумхаа өвчний хамгийн хүнд, амь насанд аюултайд тооцогддог халуун орны хумхаагаар өвчилсөн бөгөөд Роберт Кохын хүрээлэнгийн (RKI) мэдээлснээр “Өвчтөнүүд хилийн чанадаар аялаагүй байсан тул эмч нар оношийг хоцорч тогтоосон байна. Энэ нь өвчнийг хүндрүүлэх гол шалтгаан болсон” гэжээ.

    Эхний ажилтан долдугаар сарын эхээр нас барсан бөгөөд хумхаа өвчнөөс болсон гэдгийг нь нас барсны дараа  олж тогтоосон байна. Хоёр дахь ажилтан наймдугаар сард нас барсан. Үлдсэн дөрвөн ажилтан эмчилгээ хийлгэж, биеийн байдал нь сайжирч байгаа.

            Германд хамгийн сүүлд 2023 онд Франкфуртын нисэх буудалд хумхаа өвчний тохиолдол бүртгэгдэж байжээ.

    Одоогоор нисэх буудлын удирдлагууд шумуул барих тусгай урхинуудыг талбайгаар байрлуулжээ. Баригдсан шумуулуудыг Бельгийн Антверпен хотын Халуун орны анагаах ухааны хүрээлэн рүү илгээн, генетикийн шинжилгээ хийж, аль улсаас ирсэн, онгоцоор дамжсан эсэхийг нь тогтоохоор ажиллаж байна.

    Эрүүл мэндийн газраас Франкфурт хотын оршин суугчдад “Ямар нэгэн аюул байхгүй, хумхаа нь хүнээс хүнд халдварладаггүй тул халдвар цааш тархах эрсдэл маш бага” гэдгийг мэдэгдлээ.

ЭХ СУРВАЛЖ: Euronews