Цар тахлын улмаас БНАСАУ-ын хил хаалттай байгаа тул Пхеньян дахь ОХУ-ын элчин сайдын яамны ажилтнууд гэр бүлийн хамт түрдэг тэргээр хил гарч, эх орондоо иржээ.

БНАСАУ  тийм ч нээлттэй улс биш  бөгөөд цар тахлын улмаас улс руу орж, гарах боломжгүй болжээ. ОХУ-ын дипломатчид хоёр улсыг тусгаарладаг Түмэн голын километр гаруй гүүрийг түрдэг тэргээр цаг хэртэй туулсан байна. Тэд ОХУ-ын хил хүртэл 32 цаг галт тэргээр явж, Түмэн гол руу хоёр цаг хэртэй автобусаар явж очжээ.

Ачаа болон хүүхдүүдээ тэргэнд суулган түрж, ОХУ-ын хил рүү ороход тэднийг Гадаад хэргийн яамны ажилчид угтаж авсан байна. Тэндээс Владивосток хот руу автобусаар хүрч, үүнээс цааш онгоцоор гэртээ очих аж.