Өмнөд Африкт илэрсэн шинэ төрлийн B.1.1.529 буюу Омикрон хувилбар дэлхийн 100 орчим оронд бүртгэгдэж, олон улсын зах зээл, эдийн засагт их хэмжээний нөлөө үзүүлээд байна. Омикрон хувилбар анх илэрхэд "Үнэхээр вакцин нөлөөлдөггүй хувилбар уу. Вакцин нөлөөлөх байсан ч, бид нөлөөлөхгүй гэж бодож, дотроо айдас төрүүлээд байна уу" гэсэн асуултууд хөвөрч байсан ч, одоо дэлхий даяар Омикрон хувилбарыг "Аймшигтай" гэдэгт санал нэгдэн хязгаарлалтаа чангатгаж, зарим орон хатуу хөл хорио тогтоожээ.

Омикрон хувилбар ихэвчлэн 20-30 насны залуус дунд тархаж байна

          Өмнөд Африкийн Анагаах ухааны ассоциацын тэргүүн Анжелик Кутзе шинэ төрлийн коронавирусийн Омикрон хувилбарт хийсэн судалгааны урьдчилсан дүнгээр өмнөх хувилбаруудаас ялгарах гол онцлог нь халдварласан хүнд сульдах шинж тэмдэг ихээр ажиглагдаж байгаа талаар “The Daily Telegraph”-д өгсөн ярилцлагадаа дурджээ.

          Тухайлбал, эхний ээлжид Омикрон хувилбараар өвчилсөн хүнд сульдах шинж тэмдэг илэрч, өндөр халуурах, зүрхний цохилт нь хурдсах шинж тэмдэг, зовиур илэрсэн. Харин амтлах, үнэрлэх мэдрэмжид ямарваа нэгэн өөрчлөлт гараагүй бөгөөд ихэвчлэн 20-30 насныхан өвчилж байгаа талаар ярьсан байна.

          Мөн доктор Анжелик Кутзегийн мэдээлснээр коронавирусийн шинэ төрлийн Омикрон хувилбар нь цөөн шинж тэмдэгтэй илэрч байгаа нь судалгаагаар илэрснийг танилцуулав. Австрали Улсад батлагдсан Омикрон хувилбарын гурван хувилбарын хоёр тохиолдол нь коронавирусийн эсрэг вакцины бүрэн тунд хамрагдсан, шинж тэмдэггүй 20-30 насны залуус байжээ.

“Омикрон хувилбар Дельта хувилбараас 3-6 дахин олон хүнд халдварлах чадвартай”

          Омикрон хувилбарын судалгааны багийн судалгааны ажил одоог хүртэл дуусаагүй учир дэлгэрэнгүй мэдээлэл ховор. Гэсэн ч олон улсын эрдэмтэн, судлаачид Омикрон хувилбартай холбоотой таамаг, өөрийн судалгааг олон нийтэд дэлгэж, сэрэмжлүүлсээр байна.

Шинэ төрлийн Омикрон хувилбарын талаар Лондонгийн их сургуулийн генетикийн хүрээлэнгийн захирал, профессор Франсуа Баллу “Бид олж авсан урьдчилсан мэдээллээр Омикрон хувилбар өмнө нь коронавирусийн халдвар аваад эдгэсэн бол тодорхой хэмжээний эсрэг дархлаатай болсон хүнд дахин халдварлах чадвартай байна” хэмээн мэдэгджээ.

          Тэгвэл Бельгийн Левенийн Католик их сургуулийн хувьслын биологчим Том Венселерс мөн дээр дурдсан мэдээлэлтэй санал нэгдэж, “Омикрон хувилбар нэг ижил хугацаанд Дельта хувилбараас 3-6 дахин олон хүнд халдварлах боломжтой” гэж тооцоолсноо “Nature” сэтгүүлд хэвлүүлсэн байна.

Нөгөөтээгүүр 30 гаруй мутациас үүссэн Омикрон хувилбарыг “хэт аймшигтай” гэж итгэж, хатуу хөл хорио тогтоох, хилээ хаах зэрэг шийдвэр гаргахгүй байхыг мөн зарим эрдэмтдийн баг зөвлөсөөр байгаа юм.

          Үүнтэй холбоотойгоор Лондонгийн Империал коллежийн профессор Питер Опеншоу “Омикрон хувилбар вакцинаас бүрэн зайлсхийх магадлал тун бага” байгааг баталгаажуулснаа зарласан. Харин ДЭМБ-ын эрдэмтдийн зөвлөлийн эрдэмтэн Сумья Сваминатан “Бид бэлтгэлтэй, болгоомжтой байхаас сандарч, тэвдэж болохгүй” гэж мэдэгдээд байна.

Омикрон хувилбарыг өргөн хэрэглэж буй тестээр илрүүлж, гэрээр эмчлэх боломжтой

          ДЭМБ-ын Вирусийн эволюц хариуцсан техникийн группээс олон нийтэд Омикрон хувилбарын талаар мэдээлэл хүргэх үеэрээ дэлхийн орнуудад өргөн хэрэглэж буй PCR тестээр илрүүлэх боломжтой талаар мэдэгдсэн. Харин бусад тестэд ямар нөлөө үзүүлэх эсэх болон илрүүлж чадах эсэх тал дээрх судалгаа үргэлжилж байна.

          Тэгвэл Өмнөд Африкт илэрсэн Омикрон хувилбарын анхны өвчтөнүүдийг эмчилж байсан эмч "Омикрон хувилбарын шинж тэмдэг нь хөнгөн тул гэрээр эмчлэх боломжтой” талаар мэдэгджээ. Энэ талаар Өмнөд Африкийн Анагаах ухааны нийгэмлэгийн дарга Анжелик Коетзи “Дельта хувилбараас өөр шинж тэмдэг илэрсэн долоон өвчтөний биеийн байдал хэвийн, шинж тэмдэг маш хөнгөн байгаа” гэсэн байна. Харин ижил шинж тэмдэгтэй байсан өөр нэг өвчтөн эмнэлэгт хоёр өдрийн турш бие, толгой нь өвдөж, маш их ядарч байсан аж.

-Омикрон хувилбарын улмаас нас барсан анхны тохиолдол бүртгэгдэж, Их Британийн нөхцөл байдал хүндрэв-

          Омикрон хувилбарын улмаас нас барсан анхны тохиолдол Их Британид бүртгэгдсэн талаар тус улсын Ерөнхий сайд Борис Жонсон мэдээлсэн. Тэрбээр “Бид Омикрон хувилбар хүн амын дунд хурцадтай тархаж байгааг хүлээн зөвшөөрөх хэрэгтэй. Омикрон хувилбар “зөөлөн” хувилбар гэх бодлоосоо салах ёстой” хэмээсэн юм.

          Энэ мэдэгдлийн дараа Их Британид өдөрт бүртгэгдэх ихэнх халдварын тохиолдлын тоог коронавирусийн Омикрон хувилбар эзэлж, одоогийн байдлаар Их Британид 40 мянга орчим хүн Омикрон хувилбараар халдварлаад байна.

-Омикрон хувилбарын эсрэг ямар вакцин үр дүн сайн байгаа вэ-

АНУ-ын Вашингтоны их сургуулийн судалгааны баг коронавирусийн вакцинуудын Омикрон хувилбарын эсрэг ямар нөлөө үзүүлж байгааг судалж, үр дүнг нь тодорхойлсон.

          Судалгаагаар “Пфайзер/БиоНТех”-ийн пфайзер вакцины Омикрон хувилбарын эсрэг өндөр дархлаа тогтоож байгааг илрүүлсэн байна. Харин АНУ-ын жонсон ба жонсон, БНХАУ-ын синофарм, ОХУ-ын спутник-в вакциныг Омикрон хувилбарын эсрэг муу нөлөө үзүүлж байгааг тогтоосон аж.

 “Ковид-19” цар тахлын төгсгөл нь Омикрон хувилбар байх уу

Коронавирусийн шинэ төрлийн Омикрон хувилбар “Ковид-19” цар тахлын төгсгөл болох боломжтой эсэх тухай мэдээлэл олон нийтийн сүлжээнд гарсан.

          Тэгвэл уг мэдээлэл нь дээр дурдсан зах зээлийн тогтворгүй байдал үнийн хөөрөгдөлтэй холбоотой аж. Энэ талаар “Deutsche Welle” агентлаг эдийн засгийн хувьд алдагдал хүлээж, зах зээл дэх хувьцаа нь уналтад орж байгаа компаниуд хөрөнгө оруулагчдаа тайвшруулах гэж “Омикрон хувилбар цар тахлын төгсгөл болно” гэх мэдээлэл түгээж байгаа талаар мэдэгсэн байна.

          Үүний нэгэн жишээ нь, АНУ-ын хөрөнгө оруулалтын “JP Morgan” банкны хувьцаа Омикрон хувилбар дэгдсэнээс хойш огцом унасан. Түүний дараа “JP Morgan” банкны стратегич Марко Коланович, Брам Каплан нар “Омикрон хувилбар бусад хувилбараас илүү халдварлах ч, хор хөнөөл, үхэлд хүргэх аюул бага байж магад. Энэ нь цар тахлын төгсгөлийн үе ирснийг илтгэж байна” гэсэн мэдээлэл үйлчлүүлэгчиддээ түгээжээ.