НҮБ-ын хүний эрхийн алба “Мьянмарын төрийн эргэлтийг эсэргүүцсэн жагсаалд цагдаа нар гал нээж, 17 хүний амь эрсэдсэн” хэмээн мэдээлжээ. Мьянмарын Янгон, Давей, Мандалай зэрэг хотод цагдаа нар жагсагчид руу гал нээж, нулимс асгаруулагч хэрэглэсэн нь үхэлд хүргэсэн гэв.

Өнгөрсөн хоёрдугаар сарын 1-ний өдөр Мьянмарт цэргийн хүчнийхэн Аун Сан Су Чи тэргүүтэй эрх баригчдыг унагааж, төрийн эргэлт хийснээр иргэд тайван жагсаал өрнүүлсэн юм. /төрийн эргэлтийн тухай эндээс уншаарай/

Харин өнгөрсөн бямба гарагаас жагсаал хүчирхийллийн шинжтэй болжээ. Ням гарагт цагдаа нар босогчид руу хүч хэрэглэж байгаа бичлэг цацагдсанаар олон нийт дургүйцлээ илэрхийлж байна.

АНУ-ын Ерөнхийлөгч Жо Байден төрийн эргэлт гарахад Мьянмар Улсад эдийн засгийн хориг тавьсан юм. Харин түүний аюулгүй байдлын зөвлөх Жак Сулливан энэхүү явдалд нэмэлт үйлдэл хийхийг зөвлөжээ. НҮБ хамгийн багадаа 17 хүн нас барж, 30 гаруй хүн бэртэл авсан энэхүү хэрэгт цэргийнхнийг буруутгаж байгаа бөгөөд “Мьянмар Улсын иргэд тайван жагсаалаар ардчиллыг сэргээхийг шаардах эрхтэй. Хүчирхийлэлгүй жагсаалын эсрэг хүч хэрэглэх нь олон улсын хүний эрхэд хэзээ ч зөвшөөрөгдөхгүй” хэмээн хэвлэлийн төлөөлөгч Равина Шамдасани хэлжээ.