Америкийг эдгээх цаг

Х. Одончимэг:
Дэлхий дахинд- Улс төр

2020-11-09, 917

АНУ-ын Төрийн тэргүүнээр Ардчилсан намаас нэр дэвшигч Жо Байден тодорлоо. Сонгогчдын коллегиос ялалт байгуулахад хангалттай хэмжээний санал авсан Жо Байден ард түмэндээ хандаж хэлсэн үгэндээ нэн тэргүүнд цар тахалтай тэмцэхэд анхаарлаа хандуулахаа онцлов. Бүгд найрамдах намаас нэр дэвшсэн, одоогийн Ерөнхийлөгч Дональд Трамп санал хураалтын дүнг хүлээн зөвшөөрөхгүйгээ мэдэгдсэн.

Хуваагдсан америкчууд

АНУ-ын Сенат бүгд найрамдахчуудын хяналтад, харин Төлөөлөгчдийн танхимд Ардчилсан намынхан олонх байна. Конгресс ийнхүү хуваагдсан нь Ерөнхийлөгч Байдены хувьд нэг талаар сорилт болох ч, нөгөө талаар олон боломж авчирна гэж ажиглагчид үзэж буй. Тухайлбал, байгаль орчинд ээлтэй эрчим хүчний салбарыг хөгжүүлэх, эрүүл мэндийн салбарын шинэчлэлийг үргэлжлүүлэхэд дөхөм болно. Нөгөө талаас Трамп, Байден нарын саналын зөрүү тийм их биш байсныг ажиглагчид онцолж байна. Д.Трамп ч, түүнийг дэмжигчид ч сонгуулийн дүнг эсэргүүцэж байгаа нь, зарим хотод эсэргүүцлийн жагсаал болсон нь нэгэн зүйлийг илтгэнэ.

Энэ нь АНУ-ын 46 дахь Ерөнхийлөгч Жо Байден өөрийг нь дэмжсэн нэг хэсгийг төдийгүй мөн өөрийг нь хууль ёсоор сонгогдсон гэдэгт эргэлзэж буй нэг хэсгийг ч удирдах болж байна.

Сонгуулийн дүн үнэн хэрэгтээ Конгрессыг ч бус, ард түмнийг бас хоёр өөр итгэл үнэмшил, бодолтой хэсэгт хуваасан гэж Массачусетсийн их сургуулийн улс төр судлалын профессор Алекс Теодорис онцолж байгаа юм. Үнэндээ энэхүү хуваагдал бусдад хүлээцтэй ханддаг, олон соёлыг нэгтгэсэн, олон ургальч үзэлтэй, либераль Америк уламжлалт үнэт зүйлдээ үнэнч, глобаль өөрчлөлтийг төдий л хурдан хүлээж авдаггүй, америк мөрөөдөлд итгэдэг, консерватив Америктай нүүр тулснаас үүдэлтэй гэж тэрбээр хэлжээ.

Сонгуулийн өмнө “You gov” компаниас явуулсан санал асуулгаас харвал иргэдийн 51 хувь нь сонгуулийн дүнд эргэлзсэн, саналын хуудсыг шударга тоолно гэж бодохгүй буйгаа илэрхийлжээ. Мөн санал асуулгад оролцогчдын 42 хувь нь сонгуулийн дараа эсэргүүцлийн арга хэмжээ өрнөж, эмх замбараагүй байдал үүсэж магадгүй гэж болгоомжилж буйгаа хуваалцсан.

“Сүүдэрт байсан” Ерөнхийлөгч

Америкийн түүхэнд хамгийн их шүүмжлэл дагуулсан, үг үйлдлээрээ ард түмнээ төдийгүй дэлхийг гайхашруулсан Ерөнхийлөгч бол Дональд Трамп. Харин түүний халааг авахаар болсон Жо Байден төдий л танил бус, зарим талаараа “үлбэгэр” нэр дэвшигч байв. Гэхдээ тэрбээр дундаж америк сонгогчийн хувьд хэт зүүний үзэлт Берни Сандерсаас ч, дэд Ерөнхийлөгчөөр тодроод буй Камала Харрисаас ч илүү ойлгомжтой нэр дэвшигч, центрист үзэлт, өөрөөр хэлбэл “Либералын арьс нөмөрсөн консерватив” байв. Америкчуудын дунд чамгүй нэр хүндтэй байсан Ерөнхийлөгч Барак Обамагийн нэр нөлөө ч түүнийг Ерөнхийлөгчөөр сонгогдоход тодорхой хэмжээгээр нөлөөлсөн нь лавтай.

Америкийг эдгээх цаг

Шинээр сонгогдсон Ерөнхийлөгч Жо Байден нэн тэргүүнд цар тахалтай тэмцэж, ард олноо хагалан бутаргах бус, нэгтгэхийн төлөө ажиллана гэдгээ мэдэгдсэн. Дэлхий даяар сая гаруй хүний амийг авч одоод буй коронавирусийн халдвар АНУ-д хамгийн их байна. Цар тахлаас үүдсэн нийгмийн ялгарал, тэгш бус байдал, айдас нь хүчирхийлэл, эмх замбараагүй байдалд хүргэж ч магадгүй эгзэгтэй цаг үед Жо Байден Төрийн тэргүүнээр сонгогдлоо. АНУ-ын олон хот, мужийг хамарсан BLM хөдөлгөөн, сонгуулийн дүнг эсэргүүцсэн жагсаал ч хурдан намжих төлөвгүй.

Тэгэхээр цар тахлаас гадна хуваагдсан, хэдэн зууны турш амь бөхтэй оршсоор буй арьс өнгөөр ялгаварлах үзлийг эсэргүүцэн бухимдсан, нийгмийн тэгш бус байдалд эгдүүцсэн Америкийг эдгээх амаргүй сорилттой Жо Байден тулгарах нь.

Тэрбээр мөн гадаад бодлогын хувьд Европын холбоо, Умард Атлантын цэргийн эвсэлтэй харилцаагаа сайжруулах, ДЭМБ-д Америкийг буцаан авчрах, Ойрхи Дорнодын орнуудад тавьсан Трампын хоригуудыг цуцлах, эсэх зэрэг олон асуудлыг шийдэх хэрэгтэй болно.

Америкийн тэрбумтнууд одоо Холбооны засгийн газрын төсөвт орлогынхоо 21 хувийг өгдөг. Харин Жо Байден энэхүү татварыг 28 хувь хүртэл өсгөж магадгүй. Улмаар нэг цагийн ажлын хөлсний доод хэмжээг 15 ам.доллар болгох, эрүүл мэнд, боловсролын үйлчилгээг үнэ төлбөргүй болгох зэрэг амлалт, зорилтоо биелүүлэх хэрэгтэй болж байна.

Америкийг эдгээх цаг

Шинэ мэдээ

Нийтлэлчид