БАЯН-ӨЛГИЙ АЙМГИЙН ИТХ-ЫН ТӨЛӨӨЛӨГЧ К.ЖАНДОС ГАДААДЫН АНЧИДТАЙ НИЙЛЖ ХОВОР АМЬТДЫГ ХОМОРГОЛОН ХӨНӨӨЖ БАЙНА, С.ОДОНТУЯА САЙД АА 

    Баян-Өлгий аймгийн ИТХ-ын төлөөлөгчид төсвийн мөнгө хэрхэн завшдаг, аргаль, янгир агнах агнуурын бизнесийг хэрхэн гардаж мөнгө олдог болохыг манай сайтын сурвалжлах баг өмнө нь мэдээлсэн билээ. Ялангуяа Баян-Өлгий аймгийн ИТХ-ын төлөөлөгч К.Жандос ан агнуурын компаниудаараа дамжуулан гадаадын мөнгөтэй анчдыг аймагтаа залж, аргаль, янгир, тэх агнуулж, дундаас нь их хэмжээний ашиг хүртдэг гэнэ. Тодруулбал, К.Жандос нь өнгөрсөн наймдугаар сард ангийн компанийн захирлуудтай нийлж, 2024 онд агнах ёстой амьтдын тоог нэмж батлуулжээ. Мөн өндөр дээд хэмжээний зочин анчдад соёлын зориулалтаар агнуулах 12 амьтны зөвшөөрлыг “Мармара интернешнл” болон хамаарал бүхий “Влук Монгол” компанийнхаа дунд хаалттай дуудлага худалдаагаар шалгаруулсан гэх ноцтой баримтыг хүргэж байна.

    2024 онд тусгай зориулалтаар агнах аргаль, угалз, тэх, буга зэрэг ховор амьтан агнах хуваарийг Засгийн газар баталж, хуучин нэршлээр Байгаль орчин, аялал жуулчлалын яамныхан хэчнээн амьтан агнаж болохыг хувиарладаг байжээ. Үүний хүрээнд БОАЖ-ын сайд асан Б.Бат-Эрдэнэ өнгөрсөн гуравдугаар сард 89 дүгээр тогтоол гаргаж, 2024 онд Баян-Өлгий аймагт 14 угалз, 24 тэх, зургаан халиун бугыг тусгай зориулалтаар агнах зөвшөөрөл олгосон байжээ. Харин шинэ Засгийн газар байгуулагдаж, Байгаль орчин, уур амьсгалын өөрчлөлтийн сайдаар С.Одонтуяа томилогдсон. Баян-Өлгий аймгийн ИТХ-ын төлөөлөгч К.Жандос нь 2024 оны УИХ-ын сонгуульд Ардчилсан намаас жагсаалтаар нэр дэвшиж, намынхандаа их хэмжээний хандив өгсөн гэдэг. Тиймээс Байгаль орчин, уур амьсгалын өөрчлөлтийн сайд С.Одонтуяад нөлөөлж, Баян-Өлгий, Баянхонгор, Өвөрхангай, Увс аймагт агнах амьтдын тоог нэмүүлж, өөрийнхөө хоёр компанид давуу эрх олгосон хэмээн ангийн компанийнхан ам уралдан ярьцгааж байна. Тодруулбал, сайд С.Одонтуяа өнгөрсөн наймдугаар сарын 7-нд БОАЖ-ын сайд асан Б.Бат-Эрдэнийн гуравдугаар сард гаргасан 89 дүгээр тогтоолыг, 26 дугаар тогтоол болгон өөрчилсөн байдаг. Ингэхдээ, тусгай зориулалтаар агнах 70 угалзыг 81 болгож, 115 тэхийг 127 болгон нэмж өөрчилжээ

ЗАСГИЙН ГАЗАР, БОУА-ЫН ЯАМ ЛОББИД АВТАЖ, ХУУЛЬ ЗӨРЧСӨН ТОГТООЛ ГАРГАЖ, ЭКОЛОГИ, ХОВОР АМЬТНЫ НӨӨЦӨД НОЦТОЙ ХОХИРОЛ УЧРУУЛЖ БАЙГАА ЮУ

    Тодруулбал, Баян-Өлгий аймгийн 11 суманд агнах 14 угалзыг 20 болгож, 24 тэхийг 30 болгосон байдаг. Мөн Баянхонгор аймагт агнах ёстой зургаан угалзыг найм болгож, 21 тэхийг 24, Өвөрхангай аймагт агнах таван угалзыг зургаа болгож, найман тэхийг 11 болгон нэмэгдүүлсэн бол Увс аймагт агнах ёстой байсан долоон угалзыг ес болгожээ. Уг нь, тусгай зориулатаар агнах ховор ангийн нөөцөд тохирсон тоог БОУАЯ-ны дэргэдэх Мэргэжлийн зөвлөлөөс урьдчилсан судалгаар тогтоож, яам, Засгийн газарт зөвлөмж хүргүүлдэг байсан. Зөвлөмжийн дагуу жил бүр агнах ёстой амьдтын тоог гаргаж, Засгийн газар тогтоолоороо баталдаг байсан. Гэтэл өнгөрсөн наймдугаар сарын тогтоолыг гаргахдаа мэргэлжийн зөвлөлийнхний саналыг үл харгалзан аймгуудын Байгаль орчны газар болон ангийн компаниудаас санал авахгүйгээр Засгийн газрын өмнөх тогтоолд өөрчлөлт оруулж, Баян-Өлгий аймгийн ИТХ-ын төлөөлөгч К.Жандосын Мармара интернешнл” болон хамаарал бүхий “Влук Монгол” компанид давуу байдал олгож, Шударга өрсөлдөөний хууль болон Амьтны тухай хууль ноцтойгоор зөрчсөн байж болзошгүй байгаа. Нэг эзэний хоёр компанид амьтан агнах тусгай зөвшөөрөл олгосон нь Засгийн газар, БОУА-ын яам лоббид автан хууль зөрчсөн тогтоол гаргаж, экологи, ховор амьтны нөөцөд ноцтой хохирол учруулаад байгаа.

ТӨРИЙН ГУРВАН ӨНДӨРЛӨГИЙН ХЭНИЙХ НЬ УРИЛГААР ӨНДӨР ДЭЭД ХЭМЖЭЭНИЙ ЗОЧИН АНЧИД ИРЭХ ВЭ ГЭДГИЙГ НИЙТЭД ИЛ БОЛГОЁ

/Цэнхэрээр тэмдэглэсэн нь 2024 онд нэмэлтээр агнах амьтны тоо/

   К.Жандос нь гадаадын анчидтай нийлж, байгалийн нөөц, ховор амьтдыг хоморголон цөлмөж, үүндээ салбарын сайд, аймгийн Засаг дарга нарыг татан оролцуулаад байгаа. Дээрх тогтоолд өөрчлөлт оруулж, агнах амьтдын тоог нэмснээр Амьтны нөөцийн үнэлгээнд тулгуурлан агнах амьтны тоог тогтоолгүй бизнесийн сонирхлоор ховор амьтныг олноор нь агнуулж байгааг АНУ-ын Загас ба Зэрлэг амьтны хяналтын алба болон зэрлэг амьтны олон улсын худалдааг хянаж байдаг CITES-ийн хорооноос Монголын тусгай зориулалтын ан агнуурыг 2025 оноос хаах эрсдэлийг бий болгож байгаа гэх мэдээлэл бий. Энэ нь олон улсад хэрэгжиж байгаа зэрлэг амьтдыг зохистой ашиглалтаар дамжуулж хамгаалдаг нь батлагдсан одоогийн тогтолцоог эвдэж, эцэст нь ховор амьтад эзэнгүй болж, хулгайн анчдын золиос болоход хүрээд байгаа. Тиймээс 2024 онд өндөр дээд хэмжээний хэчнээн зочин анчин ирэх вэ. Тэд төрийн гурван өндөрлөгийн хэнийх нь урилгаар ирэх вэ гэдгийг олон нийтэд ил болгох хэрэгтэй байна. Эсвэл төр засгийн нэр барьж агнах ёстой амьтдын тоог нэмж, жирийн анчдад агнуулдаг ангийн бизнес гаарч байгаа юу, С.Одонтуяа сайд аа.

К.ЖАНДОС ТУРКИЙН "ШИКАР САФАРИ"  КОМПАНИЙН ЗАХИРАЛ КААН КРАКАЯТАЙ ХАМТРАН АМЬТНЫ БИЗНЕС ЭРХЭЛДЭГ ҮҮ

/Доналд Трампын хүү болон К.Жандос нарын агнасан гэх аргалийн зураг/

   Баян-Өлгий аймгийн ИТХ-ын төлөөлөгч К.Жандос 2.0 тэрбумын орон сууцанд амьдардаг, 318 сая төгрөгийн Lexus жийп хөлөглөдөг, төлөөлөгчид дундаа хөрөнгөөрөө тэргүүлдэг нэгэн. Ноцтой нь, К.Жандосын ийн хөлжсөн бизнес нь аргаль, янгирын ан байдаг  . Тодруулбал,   К.Жандос “Мармара интернэйшнл” ХХК-ийн эзэн. Түүний “Мармара интернэйшнл” ХХК нь Баян-Өлгий аймгийн Дэлүүн, Цэнгэл, Алтанцөгц, Буянт тэргүүтэй сумдад гадаадын мөнгөтэй анчдад аргаль, янгир агнуулж, дундаас нь асар их хэмжээний ашиг хүртдэг. Ганцхан жишээ дурдъя. 2019 оны наймдугаар сард, тухайн үеийн АНУ-ын Ерөнхийлөгч Донаньд Трампын ууган хүү Дональд Трамп Жуниор Монголд ирж, Баян-Өлгий аймагт долоо хонож, Алтай таван богдоор аялж, ан хийж зугаацаад буцсан. Тухайн үед Дональд Трамп Жуниор Баян-Өлгийд долоо хонохдоо нэн ховордсон аргаль агнасныг дэлхий томоохон хэвлэлүүд ил болгож, дуулиан тарьж байлаа. Тэгвэл Дональд Трамп Жуниорыг Баян-Өлгий аймгаар долоо хоног аялуулж, аргаль агнуулсан хүн нь Баян-Өлгий аймгийн ИТХ-ын төлөөлөгч К.Жандос байсан. Тухайн үед АНУ-ын Propublica.org сайтын мэдээлснээр, К.Жандосын “Мармара интернэйшнл” ХХК нь Дональд Трам Жупиорын долоо хоногийн аялалыг зохион байгуулж, аргаль агнах зөвшөөрөл “бэлэглэсэн” гэдгийг илчилж, Дональд Трам Жупиор болон К.Жандосын хамт авхуулсан зураг, агнасан аргалийнх нь зургийг нийтэд дэлгэж байв. Мөн Дональд Трам Жупиор Баян-Өлгийд долоо хонохдоо 75 мянган ам.доллар төлсөн гэж мэдээлсэн байдаг. Мөн Туркийн "Шикар Сафари"  компанийн захирал Каан Кракаятай хамтран ажилладаг гэх мэдээлэл бий.