Индонез Улсад болсон олон улсын хэрэглээний химийн олимпиадаас хүрэл медаль хүртсэн Сант сургуулийн 11Д ангийн сурагч Б.Энхжинтэй ярилцлаа.

-Чамд энэ өдрийн мэнд хүргэе. Олон улсын химийн олимпиадаас хүрэл медаль хүртсэнд нь баяр хүргэе. Баярын сэтгэгдлээсээ хуваалцахгүй юу?

                -Олимпиадад орохдоо өөрийнхөө хамгийн сайнаар оролцож чадаагүй юм шиг санагдсан. Тиймээс хүрэл медалийн эзэн болохдоо үнэхээр их баярласан.

-Таны оролцсон хэд дэх олимпиад байсан бэ. Өмнө нь олон улсын олимпиадад оролцож байсан уу. Амжилтуудаасаа дурдвал?

                -Би наймдугаар ангиасаа олимпиадуудад оролцож эхэлсэн. Сургууль, дүүрэг, улсын гээд төрөл бүрийн шатлалтай олимпиадад оролцож, өөрийгөө сорьсон. Энэ удаагийн Индонез Улсад зохион байгуулагдсан хэрэглээний химийн олимпиад миний оролцсон анхны олон улсын олимпиад байлаа.

-Олимпиадад оролцохын юу нь хамгийн гоё санагддаг вэ?

                -Үеийн хүүхдүүдтэй өрсөлдөж, өөрийгөө сорих хамгийн сонирхолтой. Хүссэн амжилтаа гаргаж чадаагүй үедээ ч бусдаасаа нэг зүйлийг илүү ойлгож, мэдсэн байдаг.

-Олон улсын олимпиадаас хамгийн хэцүү даалгавар болон хийж, гүйцэтгэхэд сонирхолтой даалгавар нь юу байсан бэ?

                -Анх удаа гэрээсээ холдож, гадаад хэл дээр бичсэн текст харж олимпиадад орж үзлээ. Гадаад хэл дээр учраас жаахан хүнд байлаа. Хэрэглээний хими учраас бодсоноор өөр байсан. Олон хүүхэдтэй танилцаж, тэднээс суралцсан. Гэхдээ өөрийнхөө төсөөлж байсан шигээ сайн оролцож чадаагүй болохоор жаахан харамсаж байна.

-Тус олимпиадад хэр хугацаанд бэлдсэн бэ. Олимпиадад оролцох бэлтгэлээ хэрхэн хийдэг вэ?

                -Зуны амралтынхаа үеэр олимпиадын талаар мэдэж, өөрийгөө сорьж оролцохоор шийдсэн. Сүүлийн шатанд тэнцсэн гэдгээ наймдугаар сард мэдэж, есдүгээр сард Индонез Улсыг зорьсон учраас сар гаруй хугацаанд л бэлдсэн дээ. Олимпиадад орохдоо тайван, бусад хүүхэдтэй өөрийгөө харьцуулахгүй байхыг хичээдэг.

-Олон төрлийн хичээлүүд дундаас химийн хичээлийг гүнзгийрүүлэн судлах болсон шалтгаан байгаа юу?

                -Химийн хичээлийг төдийлөн гүнзгийрүүлж сурна гэж бодож байгаагүй ээ. Наймдугаар ангид байхад анги даасан багш солигдоод химийн багш маань болсон юм. Хичээлээ үнэхээр сайн, сонирхолтой заадаг учраас энэ хичээлд дуртай болж, илүү судлахыг хичээх болсон.

-Гэр бүлийнхэн, багш нар нь хэрхэн тусалж, дэмждэг вэ?

                -Аав, ээж минь үргэлж дэмждэг. Хичээлээ бэлдээд суух үед бүх зүйлийг ойлгож, хэрэгтэй бүхнээр дэмждэг. Багш нар минь ч чадахгүй, ойлгохгүй байгаа зүйлсийг минь цааргалалгүй зааж, зөвлөдөг.

-Химийн хичээлийн хамгийн сонирхолтой зүйл нь юу байдаг вэ?

                -Амьдралаас тусдаа зүйл гэж боддог байтал хүний амьдралтай салшгүй холбоотой зүйл гэдгийг ойлгосон. Хими бол хүний амьдралтай хамгийн ойрхон хичээл юм шиг санагддаг. Лабораторид туршилт хийх хамгийн гоё. Тэр бүр зүгээр химийн урвал биш бүхэл бүтэн амьдрал явж байгаа гэдгийг харах сонирхолтой санагддаг.

-Хүн бүрд өөрсдийн амжилттай суралцах арга гэж байдаг шүү дээ. Таны хувьд ямар арга барилаар суралцдаг вэ?

                -Надад нууц арга барил гэж байхгүй ээ. Тухайн хичээлийн хамгийн сонирхолтой талыг нь олж харах хэрэгтэй юм билээ. Аливаа зүйлд хүний сонирхлыг татах зүйл байдаг шүү дээ.

-Химийн хичээлийг сайн хийхийн тулд юуг хамгийн сайн ойлгох хэрэгтэй вэ?

                -Хамгийн гол нь дуртай байх хэрэгтэй. Томьёонд баригдахгүйгээр тухайн урвал бодит амьдрал дээр хэрхэн нөлөөлөхийг төсөөлж бодох ёстой юм билээ.

-Ирээдүйн зорилго, төлөвлөгөөнөөсөө хуваалцахгүй юу. Ямар мэргэжил эзэмших вэ?

                -Шинжлэх ухаан, тэр дундаа химийн салбарт ажиллахыг хүсэж байгаа. Дэлхийн боловсролыг эзэмшээд Монголынхоо шинжлэх ухааны салбарыг хөгжүүлэхийг мөрөөддөг.