УИХ-ын дарга Д.Амарбаясгалангийн өөрийн хүсэлтээр ажлаас чөлөөлөгдөх хүсэлтийг ТББХ хэлэлцэж, 100 хувийн саналаар дэмжлээ.  

    Д.Амарбаясгалан энэ талаар мэдээлэл өгөхдөө “Төрийн ажлыг гацаахгүйн тулд өөрийн хүсэлтээр огцрох өргөдлөө өглөө. Улс төр цэвэр, тунгалаг, ариун шударга байх ёстой. Монголын хөгжлийн төлөө зорилго тавьж ажилладаг байх ёстой гэсэн байр суурь гаргасан. Монгол Улс ардчилсан засаглалтай байх уу, хэсэг хүмүүс төрийн эрх мэдлийн механизмыг ашиглаж парламентыг барьцаалж, хүч хэрэглэн дарангуйлалд шилжих үү гэдэг салаа замын уулзвар дээр ирээд байна. Энэ эрсдлийг тооцож миний бие 126 гишүүнтэй парламентын холимог тогтолцоог санаачилж, улс төрийн намуудтай зөвшилцөн батлуулж, хэрэгжүүлж эхэлсэн билээ. Хүн биш хууль засагладаг улс төртэй байхын тулд нэг намын өмч биш, хамтын удирдлагын байгууллага байлгахын төлөө ардчилал эрх чөлөөгөө хамгаалахын төлөө МАН-ын даргад өрсөлдснийг та бүхэн мэдэж байгаа. Ингэхдээ ямар том эрх ашгийг сөрж, эр зориг гаргаж энэхүү шийдвэрийг гаргасныг сүүлийн хэд хоногт өрнөж буй үйл явдал харуулж байна. Энэ бүхний цаана төрийн ажлыг тогтворгүй болгох, ард түмний итгэлийг сулруулж, дарангуйлалын хар сүүдэр бий болгох зорилготой байгаа гэдэг нь өдрөөс өдөрт тодорхой болж байна. Харин МАН-ын даргын өрсөлдөөнд ялагдсан Ерөнхий сайд Г.Занданшатар болон зарим нөхөд минь намын дүрэм, Бага хурлын гишүүдийнхээ дийлэнх, олонхын гаргасан шийдвэрийг үгүйсгэж эрээ цээргүйгээр УИХ-ын  хууль зөрчихийн зэрэгцээ гадаадын нэр бүхий хэвлэлд ор үндэслэлгүй мэдээлэл төлбөр төлөн байршуулж, гүтгэн харлуулснаа Ерөнхий сайд Г.Занданшатар Төрийн байгуулалтын байнгын хорооны хурал дээр өөрийн биеэр нотолсон.

     Тэдний цахим орчноор гүтгэж байгаа гүтгэлэг нь төрд ажиллаж байгаа хэнийг ч хараар будаж, Монгол Улсын тусгаар тогтнол алдагдах аюул нүүрлэж байна. Энэ нь засаглалын хямралд оруулахад хүрч Засгийн газар нь парламентынхаа дээр гарч байгаа хууль бус явдал болж байна. Ардчилсан парламентын засаглал олон хүний эрх ашгийн явцуу үйлдлүүдээс болж хэврэгшиж байна. Тиймээс энэ үед надад албан тушаалтай зууралдах ёс зүй алга. Намайг УИХ-ын даргын албан тушаалтай байгаа учир хуулийн байгууллагаар шалгуулахгүй байгаа мэт олон нийтийг төөрөгдүүлсээр ирлээ. Өнөөдрийг хүртэл хийсэн хэрэг, шалгуулсан асуудал надад байхгүй. Энэ цаг үед бүрэн итгэлтэйгээр УИХ-ын албан тушаалаа өөрийн хүсэлтээр өгч, УИХ-д албан ёсоор мэдэгдэж байна. Цаашид нэр төрөө сэргээх болно гэдгийг энэ ташрамд хэлье.

Нөгөө талаас олон нийтийн өмнө ил харагдахгүй ч хөшигний ард олон явдал өрнөж байна. Монголын төрийн бүх үйл ажиллагаа хуулийн хүрээнд явагддаг байх ёстой. Хуулийг уландаа гишгэж, эрх мэдлийн төлөө тэмцдэг явдал удаа дараа үргэлжилж байгаад цэг тавих цаг нэгэнт болжээ. Энэ бол миний шударга ёсны төлөө хийж буй тэмцлийн эхлэл юм. Парламентийн нэр төрийг сахин хамгаалж улс төрийн дарангуйлалын хар сүүдрийн хөрс суурийг бий болгохоос сэргийлж гаргаж байгаа шийдвэр юм. Эцэст нь, Ерөнхий сайд Г.Занданшатарт хандаж хэлэхэд Монгол төрийн үйл ажиллагааг саадгүй, хэвийн үргэлжлүүлэх үүднээс хамтдаа огцрох нь зүйтэй гэж үзэж байна. Бусад улс төрийн дотоод асуудлыг УИХ-аар хэлэлцэж шийдвэрлэх нь зүйтэй гэдгийг намын даргын хувьд албан ёсоор хэлье” гэлээ.