Увс аймагт хоёр иргэн боом өвчнөөр өвдсөн тухай бид өмнө мэдээлсэн. Тодруулбал, тус аймгийн Тэс сумын есдүгээр багийн малчин өрхийн хоёр иргэн халдварт өвчнөөр өвджээ. Зооноз өвчин судлалын төвд боом өвчний сэжигтэй хоёр тохиолдол зургадугаар сарын 20-нд бүртгэгдсэн байна. Тухайн хоёр өвчтөн нь шалтгаан тодорхойгүйгээр үхсэн мал булжээ.  Одоогоор аймгийн нэгдсэн эмнэлгийн халдвартын тасагт хэвтэн эмчлүүлж байна. Өвчтөнөөс тархвар судлалын асуумж болон тандалт аван ажиллаж байна. Лабораторийн шинжилгээний дүнгээр нян судлал болон молекул биологийн судалгаа авч ажиллахад молекул биологийн шинжилгээний дүнгээр нэг өвчтөнөөс боом өвчний өвөрмөц ген тогтоогджээ. Мал эмнэлэг болон нэгдсэн эмнэлгээс хамтран тухайн газарт ариутгалын ажил явуулж байна. Бид сэрэмжлүүлэг болгох үүднээс дараах мэдээллийг бэлтгэлээ.

Ц.ИДЭРБАТ: ҮХСЭН МАЛЫНХАА СЭГ, ЗЭМИЙГ ЧИРЧ ХОЛДУУЛСАН АЙЛЫН ЭЗНИЙ ГАР ХАВДАЖ, БООМ ӨВЧНӨӨР ӨВДСӨН

            Сайд Ц.Идэрбат өчигдөр хэвлэлд мэдээлэл өгөхдөө “Нэг айлын хотонд мал нь тодорхой шалтгаангүйгээр үхсэн. Үхсэн малынхаа сэг зэмийг айлын иргэд булж, хотноосоо холдуулахаар чирсэн. Үүний дараахан гэр бүлийнх нь нэг хүний гар нь хавдаад эхэлсэн юм билээ. Ингээд холбогдох хүмүүс рүү мэдэгдэж, устгал ариутгал хийж, боомын халдвар авсан хүнийг эмнэлэгт хүргэсэн. Одоогоор шаардлагатай арга хэмжээг авч, амь насанд нь аюулгүй гэсэн мэдээ хүргүүлсэн. Боом бол үхэх аюултай халдварт өвчин” гэлээ.  

ТЭС СУМЫН ЭРҮҮЛ МЭНДИЙН ДАРГА: БООМ ӨВЧНӨӨР ӨВДСӨН ЭЭЖ, ХҮҮ ХОЁР АЙМГИЙН ЭМНЭЛЭГТ БАЙГАА

      Бид энэ талаар Увс аймгийн Тэс сумын Эрүүл мэндийн төвийн дарга Э.Нанжидтай холбогдож, тодрууллаа. Тэрбээр “Тухайн хоёр иргэн нь сумын төвөөс зайтай амьдардаг. Есдүгээр багийн нутаг учраас аймгийн төвтэй ойрхон. Боом өвчний шинж тэмдэг илэрхээр нь аймгийн эмнэлэг рүү хандсан юм байна. Сумын эмнэлэгт ирээгүй, эмчилгээ аваагүй гэсэн үг. Боом өвчнөөр өвдсөн хүмүүс нь ээж, хүү хоёр юм байна лээ. Манай Тэс сум боомын голомт нутаг. Жилдээ нэг удаа боом өвчин илрэх гээд байдаг. Иймд иргэд та бүхнийг боом өвчнөөс сэргийлж, сэрэмжлүүлж байна. Боом бол мал, амьтнаас хүнд халдварладаг аюултай халдварт өвчин. Иймд өвчилсөн мал, амьтанд хүрэхгүй, арьс, ноолуурыг нь авахгүй байх. Боомын халдвараар халдварласан байж болзошгүй малын мах, сүүг хэрэглэхгүй байх хэрэгтэй. Мөн халдвар шороо, тоос, амьсгалын замаар тархах эрсдэлтэй” гэлээ.

УВС АЙМГИЙН ЭРҮҮЛ МЭНДИЙН ДАРГА: БООМООР ӨВДСӨН ЭЭЖ, ХҮҮ ХОЁРЫН ЭЭЖИЙНХ НЬ БИЕИЙН БАЙДАЛ ТОГТВОРТОЙ БАЙГАА Ч ХҮҮ НЬ ХҮНДЭВТЭР БАЙНА

Увс аймгийн Нэгдсэн эмнэлгийн дарга Доржготовоос тодрууллаа. Тэрбээр “Одоогийн байдлаар би ээлжийн амралттай байгаа. Халдвартын тасгийн хяналтад хэвтэн эмчлүүлж байна. Боом өвчнөөр өвдсөн ээж, хүү хоёрын ээжийнх нь биеийн байдал хэвийн байгаа ч хүү нь хүндэвтэр байна. Би ээлжийн амралттай байгаа учраас өөр мэдээлэл өгөх боломжгүй” гэв.

БООМ ӨВЧИН ГЭЖ ЮУ ВЭ?

            Халдвартай мал амьтад, үхсэн малын сэг зэм, боомын спор нь хөрсөнд олон жил хадгалагддаг учир хөрс эргүүлэх, ухах үед  хүнд дамжин халдварладаг өвчин юм. Арьс, тунгалгийн зангилааг зонхилон гэмтээж, “өвчин эмзэглэлгүй хар тав” бүхий хатиг гардаг.

Манай улсад арьсны хэлбэрийн боом өвчин зонхилон тохиолддог бөгөөд нууц үе 2-3 хоног үргэлжилдэг байна.

БООМ ӨВЧНИЙ ҮЕИЙН ЭМНЭЛЗҮЙН ШИНЖ ТЭМДЭГҮҮД

Халуурах

Дотор муухайрах

Гар нүүр, биеийн ил хэсэгт гүвдрүү гарч цэврүүтэн хагарах

Өвчин, эмзэглэлгүй хар тав үүсэх

Харин боом өвчнөөр мал өвчилсөн үед дараах арга хэмжээнүүдийг хэрэгжүүлнэ

Мал эмнэлгийн байгууллагаас өгч байгаа заавар зөвлөмжийг мөрдөх

Шалтгаан тодорхойгүй мал  үхвэл малын эмчид яаралтай мэдэгдэх

Үхсэн малд хүрэхгүй байх

Зайлшгүй хүрэх шаардлага гарвал бээлий өмсөх