“Талын салхи” олон улсын мото наадамд оролцож байсан залуу амиа алдсан харамсалтай хэрэг гараад байна. Тодруулбал, 11 дэх жилдээ, “Эх хүүхдийн эрүүл мэндийн төлөө” уриан дор өнгөрсөн амралтын өдрүүдэд зохион байгуулсан “Талын салхи” мото наадамд оролцсон Ч гэх залуу зам тээврийн осолд өртөж, амиа алдлаа. Бид энэ харамсалтай ослын эргэн тойронд дараах мэдээллийг бэлтгэлээ.

“ТАЛЫН САЛХИ” МОТО НААДАМД 70 КЛУБЫН 3800 МОТОЧИН ОРОЛЦЖЭЭ

       “Талын салхи” олон улсын мото наадамд Монгол Улсад үйл ажиллагаа явуулдаг 70 мото клубын 3800 гаруй мотоцикл сонирхогчид оролцохоор бүртгүүлжээ. Мөн үүнээс гадна БНХАУ, ОХУ, БНСУ, БНУУ, Малайз зэрэг олон улсын мото сонирхогчид оролцсон байна. Наадамд оролцогчид Сүхбаатарын талбайгаас зургадугаар сарын 6-ны 11:00 цагт нэгдсэн байдлаар цуваагаар хөдлөн, “Энхтайваны өргөн чөлөө буюу Д.Сүхбаатарын талбай-Улсын их дэлгүүр-Баруун дөрвөн зам-Таван шар-22-ын товчоо-Говь ресорт” гэсэн маршрутаар явжээ. Ингээд Дархан явах замд байрлах “Говь ресорт”-д наадмаа үргэлжлүүлж, “найрласан” байна.

ТЦА: МОТОЦИКЛТОЙ ХҮН ОНХОЛДСОН, УХААНГҮЙ БАЙНА ГЭХ ДУУДЛАГА ИРСЭН

     Осол болох үед цагдаагийн байгууллагаас нэгэн мэдэгдлийг хийсэн нь олны шүүмжлэлд өртсөн. Тодруулбал, ЦЕГ-ын Хэвлэл мэдээллийн төвөөс өгсөн мэдээллээр “Талын салхи 2026” мотоциклийн олон улсын арга хэмжээний цуваа  Чингисийн талбайгаас 11:00 цагт хөдөлж,  Сонгинохайрхан дүүргийн 21 дүгээр хороо Говь ресорт амралтын газарт цуваа ямар нэгэн осолгүйгээр очсон. Бүртгэгдсэн ослын хувьд цуваанд явж байгаад Архангай аймаг руу салдаг зам руу салж, эмээлт орчимд осолдсон байна” гэсэн юм.

      Харин Тээврийн цагдаагийн албаны өгсөн мэдээллээр “Сонгинохайрхан дүүргийн 20 дугаар хороо 22-ын товчооны пост өнгөрөөд мотоциклтой хүн онхолдсон, ухаангүй байна гэх дуудлага 2026 оны зургадугаар сарын 06-ны 13:20 цагийн үед  ирсэн. Дуудлагын дагуу шалгалтын ажиллагаа явуулахад хувийн эзэмшлийн МТ-09 маркийн улсын дугаартай мотоциклийг жолооч эрэгтэй нь Баруун турууны даваа гэх газарт зорчих хэсгийн төмөр хашлага мөргөж нас барсан байсанх. Уг  хэргийг ТЦА-нд шалгаж байна” гэжээ.

ТАЛИЙГААЧ МОТО АВААД УДААГҮЙ, АНХ УДААГАА “ТАЛЫН САЛХИ” НААДАМД ОРОЛЦОЖ БАЙЖЭЭ

     Талийгаач Ч нь мотоцикл аваад удаагүй байжээ. Тэрээр хэдхэн хоногийн өмнө цахим хуудастаа мототой зургаа байршуулж, “Талын салхи” наадамд оролцох гэж байгаагаа илэрхийлсэн байна. Мөн зургадугаар сарын 6-ны өдөр цуваанд зогсож, наадамд оролцож байгаа сторидоо хийжээ. Тэрээр “Талын салхи” наадамд оролцохоор Сүхбаатарын талбайгаас хөдөлж, Сонгинохайрхан дүүргийн 20 дугаар хорооны нутаг дэвсгэр хүртэл цуваанд явсан байна. Харамсалтай, мотоциклынх нь шатахуун дуусаж, ШТС орсноор цуваанаас хоцорчээ. Ингээд цувааны төгсгөл хэсэгт явж байгаад хашлага мөргөж, амиа алдсан байж болзошгүй байна. Мөн цахим сүлжээнд талийгаачийг найзуудтайгаа өөр чиглэлд явж байсан гэх мэдээлэл цацагдаад байгаа юм. Харамсалтай нь, тэрээр “Говь ресорт”-ыг чиглэн явж байжээ.

ТАЛИЙГААЧ ТОЙРОГ ЗАМ ДЭЭР ШИДЭГДЭЖ, МОТОЦИКЛООСОО УНАСАН БОЛОЛТОЙ

        Манай сурвалжлах баг өчигдөр 15:00 цагийн үед талийгаачийн осолдсон гэх Баруун турууны давааны хэсэгт очлоо. Энэ хэсэг замын өгсүүр, тойрог байрлах ажээ. Талийгаач унаж явсан мотоциклийн банк хагарч, замын гол тос, масло нь урсжээ. Мөн талийгаач цус алдсан бололтой, замын хэсгийг шороогоор битүүлжээ.Түүнчлэн мотоциклийн камер тогтоогч, хугарсан хуванцар хэсгүүд газарт хөглөрчээ. Үүгээр ч зогсохгүй талийгаачийн мөргөсөн хоёр шон, хашлага нурж, тэмдэглэгээ нь газарт унажээ.

Баруун турууны давааны хэсэгт байрлах нэгэн дэлгүүрийн эзнээс ослын талаар тодруулахад “Тойрог дээр машинд шахуулсан байж болзошгүй. Осол болсон даруйд л бүрэлдэхүүн ирж, хамгаалалт авчихсан. Манай энэ хэсэг огцом тойрог юм. Тэгэхээр хурдтай явж байгаад тойрог дээр шидүүлчихсэн байж болзошгүй. Мотоциклоосоо унаад, замын жалга руу шидэгдсэн байх. Харин мотоцикл нь 10 оричм метрийн орчимд хэвтэж байсан” гэлээ.

Талийгаачийн мөргөсөн замын хашлага. 2026.06.08-ны 15:00 цаг

ТАЛИЙГААЧИЙН ЭХНЭР Н: УЛСТӨРЖҮҮЛЭХГҮЙ БАЙХЫГ ХҮСЭЖ БАЙНА

Талийгаач Ч эхнэртэй, гэр бүлтэй байсан. Тэрээр энэ зун хуримаа хийхээр төлөвлөсөн байсныг эхнэр нь цахим хуудастаа бичжээ. Тодруулбал, түүний эхнэр Н нь “Одоо миний хайрыг тайван орхичих, гуйж байна.  Битгий улс төржүүлээч. Өглөө үнсээд гаргах юм ч яав даа” гэжээ.

Д.БАТСҮХ: “ТАЛЫН САЛХИ” МОТО НААДМЫГ НИЙСЛЭЛИЙН ЗДТГ-ААС ИВЭЭН ТЭТГЭЖ, ДЭМЖИН ОРОЛЦСОН

         “Талын салхи” олон улсын мото наадмыг Нийслэлийн Аялал жуулчлалын газраас зохион байгуулж, ивээн тэтгэж оролцжээ. Энэ талаар бид Нийслэлийн Аялал жуулчлалын газрын дарга Д.Батсүхээс тодруулахаар холбогдлоо.

Тэрбээр “Нийслэлийн ЗДТГ-аас санхүүжүүлж, захирамж гаргаж, ивээн тэтгэгчээр оролцсон. Жил болгон л ийм байдлаар оролцдог. Одоогийн байдлаар хэчнээн төгрөгийн төсөв гаргаж, ямар байдлаар дэмжиж оролцсон гэдгийг хэлэх боломжгүй байна. Энэ төсөв нь шилэн дансанд удахгүй байршина” гэлээ.