Монгол банкны ерөнхийлөгч асан Б.Лхагвадорж суудлаасаа буугаад, хууль хяналтын байгууллагын байнгын үйлчлүүлэгч болжээ. Түүнийг эрх мэдэл, албан тушаалын байдлаа урвуулан ашиглаж, өөрийнхөө гарын үсэгтэй мөнгөн тэмдэгт их хэмжээгээр хэвлэж, нуусан байж болзошгүй хэрэгт холбогдуулан шалгаж байгаа гэх мэдээлэл цацагдаж байлаа. Тэгвэл түүнийг төрсөн дүү Б.Лхагвадоржийнхоо “Сүмт-Өргөө” ХХК-д давуу байдал олгож, түрээсийн гэрээгээр төсвийн мөнгө угаасан байж болзошгүй хэрэгт холбогдуулан шалгаж байгаа талаар эх сурвалж мэдээллээ.

Б.ЛХАГВАСҮРЭН ТҮРЭЭСИЙН ГЭРЭЭГЭЭР ХАЛХАВЧЛАН ТӨРСӨН ДҮҮГИЙНХЭЭ КОМПАНИАР ДАМЖУУЛАН ТӨСВИЙН МӨНГӨ ШАМШИГДУУЛСАН БАЙЖ БОЛЗОШГҮЙ

          Төв банканд зургаан жил эзэн суусан Б.Лхагвасүрэн 2016 оны есдүгээр сарын 1-н хүртэл “Хадгаламжийн даатгалын корпораци” сангийн гүйцэтгэх захирлаар ажиллаж байлаа. Тэрбээр 2016 оны наймдугаар сарын 31-нд тушаал гаргаж, төрсөн дүү Б.Лхагвадоржийнхоо эзэмшилд байдаг “Сүмт-Өргөө” ХХК-тай түрээсийн гэрээ хийсэн байдаг. Ингээд маргааш нь “Хадгаламжийн даатгалын корпораци” сангийн толгой байгууллага болох Монгол банкны дэд ерөнхийлөгчөөр томилогдсон юм. Хамгийн ноцтой нь, “Сүмт-Өргөө” ХХК-тай зах зээлийн үнэлгээнээс өндөр үнээр түрээсийн гэрээ байгуулж, төсвийн хөрөнгийг тэрбумаар нь угаасан байж болзошгүй нөхцөл байдал илэрчээ.  “Хадгаламжийн даатгалын корпораци” сан Б.Лхагвасүрэнгийн төрсөн дүү Б.Лхагвадоржийн “Сүмт-Өргөө” ХХК-ийн “Санрөүд” барилгын хоёр, гуравдугаар давхарт 10 жил толгой хорогдсон. Ингэхдээ зах зээлийн үнэлгээнээс өндөр түрээс төлж, байрлаж байсан гэсэн үг л дээ. Тодруулбал, 2026 оныг хүртэл тус барилгын хоёр, гуравдугаар давхрын 716 мкв талбайг жилийн 941 сая төгрөгөөр түрээсэлж иржээ. Ингээд Б.Лхагвасүрэнг Монгол банкны ерөнхийлөгчөөс буусных нь дараа түрээсийн гэрээг цуцалж, “Хадгаламжийн даатгалын корпораци” санг Баянзүрх дүүрэг рүү нүүлгэжээ. Ингэснээр жилд 745 сая төгрөг хэмнэж, 200 гаруй сая төгрөгөөр ижил хэмжээтэй түрээсийн байранд “амьдрах” болсон байна.

         Өөрөөр хэлбэл, Б.Лхагвасүрэн эрх мэдэл, албан тушаалын байдлаа урвуулан ашиглаж, төрсөн дүүгийнхээ компанид давуу байдал олгосон байж болзошгүй нөхцөл байдал илэрч, хууль хяналтын байгууллагаас шалгаж байгаа хэрэг. Мөн түрээсийн гэрээг сунгах чиглэлийг Б.Лхагвасүрэн жил бүр “тушааж” байсан болзошгүй гэнэ. Түрээсийн гэрээтэй ноцтой баримтууд хууль хяналтын байгууллагын мөрдөгчдийн гарт очиж, гэмт хэргийн шинжтэй нь тогтоогдсон гэнэ.

Б.ЛХАГВАСҮРЭНГИЙН ДҮҮ Б.ЛХАГВАДОРЖ, ХҮРГЭН АХ П.ДЭЛГЭРНАРАН НАРЫНХ НЬ ЭЗЭМШДЭГ ХОТЫН ТӨВ ДЭХ ОФФИСЫН БАРИЛГУУД

          Энэ салбарт тасралтгүй 30 гаруй жил ажиллаж, бүрэн эрхийнх нь хугацаа дуусаад байга Б.Лхагвасүрэн 300 саяын орон сууц, 100 саяын хадгаламжтай гэхээс өөр хөрөнгө ХОМ-тээ мэдүүлдэггүй байсан. Төрсөн хүү, Хөгжлийн банкны Хөрөнгийн удирдлагын газрын захирал Л.Тэмүүжин нь ч 20 саяын автомашин, 13 саяын хадгаламжнаас өөр хөрөнгөгүй гэж мэдүүлдэг. Харин түүний төрсөн дүү Б.Лхагвадорж, хүргэн ах П.Дэлгэрнаран нар нь толгой баячуудын тоонд багтдаг гэж болно. Тухайлбал, Б.Лхагвасүрэнгийн дүү Б.Лхагвадорж, эгч Б.Өсөхжаргалынх нь нөхөр, Гаалийн ерөнхий газрын дарга П.Дэлгэрнаран, түүний хүү Сангийн яамны яамны Санхүүгийн бодлогын газрын Санхүүгийн зах зээл, даатгалын хэлтсийн мэргэжилтэн Д.Болор нар нь “Сүмт-Өргөө” ХХК, “Булгат мөрөн” ХХК-ийг хамтран эзэмшдэг. Мөн Б.Лхагвадорж “Ньюсил” ХХК, “Өргөө майнинг” ХХК, “Элс партнерс” ХХК, “Ди Би Би” ХХК-ийг эзэмшдэг.   Тэгвэл Б.Лхагвадорж, П.Дэлгэрнаран, Д.Болор нарын “Сүмт-Өргөө” ХХК, “Булгат мөрөн” ХХК  нь Б.Лхагвасүрэнг Монголбанкны Хяналт, шалгалтын газрын дарга байх үеэс буюу 2011 оноос хотын төв болон Хан-Уул дүүрэгт оффис, үйлчилгээний өндөр шилэн барилгуудыг “өндөглүүлж” эхэлсэн. Өдгөө тус оффис, үйлчилгээний барилгуудаа аж ахуйн нэгжүүдэд түрээсэлж, ашиг олж буй юм.