20 жилийн түүхтэй МХЕГ-ыг 2022 татан буулгасан. Тус байгууллагыг татан буулгаснаас болж иргэд эрүүл мэнд, эд хөрөнгөөрөө хохироод зогсохгүй бүр амиараа хохироод дуусаж байна. Өөрөөр хэлбэл, МХЕГ-ын татан буулгасны горыг монголчууд амиараа амсаж, амиараа төлж байна. Хоол хүнс, тог цахилгаан чанартай, чанаргүй барилгад хяналт шалгалт хийж, нэг ч болтугай шалбарсан утсыг нь анхааруулдаг байсан 300 гаруй ажилтантай байгууллагыг татан буулгаснаас хойш өчнөөн байгууллагад гал гарч, хүний амь эрсдсэн.  Тухайлбал, 2023 онд Аса циркийн ойролцоох “Далай ээж” захад гал гарч,  хоёр хүн амиараа хохирсон харамсалтай хэрэг гарсан. “Миний” сүлжээ дэлгүүр шатаж, хоёр иргэн нас барсан бол Чингэлтэй дүүргийн 22 дугаар хороонд байрлах мөн “Миний” сүлжээ дэлгүүрийн агуулахын байранд гал гарч, Онцгой байдлын ажилтан амиа алдсан билээ. Хамгийн сүүлд гэхэд Хөвсгөл аймгийн “Шинэ мөрөн” худалдааны төвд гал гарч, 5.2 тэрбум төгрөгийн хохирлыг УОК-оос гаргахаар болсон. Энэ мэтчилэн улсаараа төдийгүй эрдэнэт хүний амиар хохирч байгаа шийдвэрийг төр засгийнхан эргэн харж, МХЕГ-ыг сэргээж, Монгол Улсыг хяналт шалгалттай, тодорхой хэмжээний журам, шаардлагатай болгомоор байна. МХЕГ татан буугдсанаар монголчуудын идэж, хэрэглэж байгаа хоол хүнс улам баталгаагүй,  эм, тариа чанаргүйжиж эхэлсэн гэх хардлага иргэдийн дунд байна. МХЕГ-аар шалгуулаагүй болохоор монголын ард түмэн юу идэж, юунд амьдарч байгааг мэдэхийн аргагүй болж, тэр хэрээрээ монголчуудын амь, амьдрал үнэгүйдсэн гэхэд болно.  

Засгийн газрын ил шийдвэр үнэндээ “бай”-гаа оноогүй. 1400 гаруй ажилтан алба хаагчтай тус байгууллагыг татан буулгаж, харьяа яамдад үйл ажиллагааг нь хариуцуулаад 800 гаруй алба хаагчид ажлаа үргэлжлүүлэн хийж, 300 гаруйг нь ажлын байргүй болгох шийдвэр гаргаж байлаа. Эдийн засгийн хүнд үед энгийн номхон 300 хүн ажлын байргүй болсон. Дор хаяж 300 гаруй хүний ард төдий чинээний гэр бүл орлогогүй болж, амьжиргааны түвшин нь буурсан гэсэн үг. Мэдээж, томчуудад ажлын байр нь гарздахгүй нь ойлгомжтой.  Манайд төрийн ажил үүргийг гүйцэтгэх ажил буюу тендерийн сонгон шалгаруулалт хуулийн дагуу явж чаддаг нь маш эргэлзээтэй. Шуудхан хэлэхэд ямар ч салбарын сонгон шалгаруулалтад томчуудын шахааны компани орж ирдэг нь нууц биш.

     Манай улс ямар ч хяналтгүй болж, дур зоргоороо авирлаж юунд хүрэхийг харах л үлдсэн гэлтэй. Хоёр жилийн хугацаанд зарим нэгийг нь иргэд амь насаар амсаж байгааг  харж л байна. Улс орнууд яаж хяналтаа нэгтгэх вэ гэдэг гарц гаргалгаа хайж байхад манайх улам бэхжүүлэхийн оронд устгаж л байдаг. 2014 онд санхүүгийн хяналтыг үгүй хийгээд аажим аажмаар энэ байгууллагыг шүдгүй арслан шиг болгосон доо. Одоо тэгээд 100 хувь хяналтгүй болгож санасан даа хүрч чадсан. Үүнийг горыг иргэд амиараа төлж байна. Улмаар салбар бүрийн харьяанд мэргэжлийн хяналтын чиг үүрэг шилжсэн юм. Гэвч салбарын хяналтыг яамдад хариуцуулах, онцгой болон тусгай чиг үүргийнхээс бусад хяналт шалгалтыг хувийн хэвшил болон төрийн бус байгууллагаар гүйцэтгүүлэх чиглэл бариад хоёр жилийн хугацаа өнгөрч байгаа ч үйл ажиллагаа нь жигдрээгүй хэвээр. Татан буугдсан МХЕГ-ын хяналт, шалгалтыг салгаснаар тухайн эрх бүхий албан тушаалтнуудад давуу байдал үүсгэхээс салбарт тулгамдсан асуудлыг шийдвэрлэхгүйгээр хугацаа алдах зэрэг эрсдэл үүсч байна. Монгол Улсын хувьд Төрийн хяналт шалгалтын тухай хуулийг 2003 онд шинэчлэн баталж, МХЕГ-ыг байгуулан ажиллаж байсан. Мэргэжлийн хяналтын байгууллага нь хил гаалиас эхлэн, эм, хүнс, хэрэглэгчийн эрх, хөдөлмөрийн аюулгүй байдал зөрчигдсөн асуудал, тусгай зөвшөөрөлтэй компаниудын үйл ажиллагаа гэхчлэн нийт 26 чиглэлийн нийтэд хамааралтай олон бүлэгт улсын байцаагч нар хяналт тавьж ажилладаг байв. Мэргэжлийн хяналтын аж ахуйн нэгжид дарамт учрууладаг, хүнд суртлаар элдэв чирэгдэл учруулдаг яг шалгах зүйлээ шалгадаггүй гэх шүүмжлэлийн дагуу татан буулгасан. Мөн манайд төрийн ажил үүргийг гүйцэтгэх ажил буюу тендерийн сонгон шалгаруулалт хуулийн дагуу явж чаддаг нь маш эргэлзээтэй. Шуудхан хэлэхэд ямар ч салбарын сонгон шалгаруулалтад томчуудын шахааны компани орж ирдэг нь нууц биш.

        Яг ийм үед мэргэжлийн хяналтын газар зураг төслөөс нь эхлээд л хариуцлага хүлээлгэх эрх мэдэлтэй байв. Харамсалтай нь, яамны харьяалалд оччихвол үүнд хэн ч хариуцлага тооцож чадахгүй болох нь. Ингээд л хүнсний бүтээгдэхүүнд тавих хяналт гэж байхгүй дарга нарын компани нь ямар ч шалгалт, хяналтгүйгээр хүнсээ нийлүүлж, барилгаа барьж, замаа тавьж дураараа дургих нь. МХЕГ-ыг татан буулгасны горыг ард түмэн үүрч, иргэд хохироод үлддэг гаж тогтолцоо бий болох нь ээ. Чанаргүй барилга нурахад иргэд хохирно, цахилгааны утаснаас гал гарахад иргэд хохирдог. МХЕГ-ыг татан буулгаснаар иргэд эрүүл амьдрах баталгаагүй болсоор байна.