УИХ-ын чуулганы хуралдаан Хөдөлмөрийн тухай хуулийн анхны хэлэлцүүлгээр үргэлжилж байна. Хуулийн төсөлтэй холбоотой УИХ дахь АН-ын бүлэг завсарлага аваад байсан юм. Тэгвэл УИХ-ын АН-ын бүлгийн дарга Д.Ганбат "Энэ хуулийг дахин судалж үзэх шаардлагатай байна" хэмээн  дахин завсарлага авсан юм. 

Мөн энэ үеэр Засгийн газарт шаардлага хүргүүлж байгаа талаар мэдэгдсэн юм. Тэрбээр "Өчигдөр оройны үйл явдлыг монголчууд бүгд харсан. Эхээс төрөөгүй хүн байхгүй. Гэтэл дөнгөж төрсөн ээжид нялх, үрд нь Монгол Улсын Засгийн газар, албан тушаалтнууд яаж хандаж байгааг харлаа. Үндсэн хуульд заасан эрхийнхээ дагуу иргэд жагсаж байна. Үүнтэй АН эв санааны нэгдэлтэй байгаа. Мөн Монгол Улсын Ерөнхий сайд У.Хүрэлсүхэд хандаж шаардлага хүргүүлж байна. Үндсэн хуульд эх орондоо  хүмүүнлэг иргэний ардчилсан нийгмийг цогцлоон хөгжүүлэх нь эрхэм зорилго хэмээн заасан байтал цар тахлын эсрэг Засгийн газар, УОК-оос хэрэгжүүлж байгаа арга хэмжээ нь зохион байгуулалтгүй, иргэнээ гэсэн сэтгэлгүй байна. Тиймээс Шадар сайд, Эрүүл мэндийн сайд, Нийслэлийн Засаг дарга бөгөөд Улаанбаатар хотын захирагч нарт хариуцлага тооцохыг шаардаж байна" гэлээ.