АТГ-ЫНХАНД БАРИВЧЛАГДСАН “ЭРДЭНЭС ОЮУ ТОЛГОЙ” ХХК-ИЙН ЗАХИРАЛ Э.ГАНХҮҮ ГЭЖ ХЭН БЭ

Б. Цогтбаяр:
Улс төр- Анхаарлын төвд

2025-12-11, 55

“Оюу толгой”-нхон баривчилгааны барцадтай байна. Өнгөрсөн аравдугаар сард Тагнуулынхан “Оюу толгой” ХХК-ийн Худалдах авах ажиллагааны газрын менежер Д.Амартүвшин, менежер Ч.Нэргүй, Баяжуулах үйлдвэрийн дарга М.Ганболд нарыг баривчилсан. Баривчилгааны үеэр оффис, орон гэрээс нь бэлнээр 10 орчим тэрбум төгрөг, мөн 15 орчим тэрбум төгрөгийн тансаг үл хөдлөхүүдийн гэрчилгээ гэх мэт ноцтой нотлох баримтууд хурааж авсан мэдээлэл бий.

Тэгвэл уржигдар АТГ-ынхан “Оюу толгой” ХХК-ийн Монгол талын 34 хувийг эзэмшигч “Эрдэнэс оюу толгой” ХХК-ийн гүйцэтгэх захирал Э.Ганхүүг баривчилжээ. Одоогоор түүнийг “Оюу толгой” ХХК-аас авсан 20 сая ам.долларын асуудал, мөн 8.2 тэрбум төгрөгөөр оффис худалдаж авсан асуудал зэргээс нь болж баривчилсан гэх мэдээлэл байна.

“Эрдэнэс оюу толгой” ХХК-ийн гүйцэтгэх захирал Э.Ганхүү, түүний нөхөр С.Манлайн товч CV

Хотын дарга Су.Батболд, С.Амарсайханы үед хотын бүх санхүүг хариуцаж байсан. 2020 оны сонгуулийн дараа БХБ-ын сайд Б.Мөнхбаатарын удирдлага доор Санхүү, хөрөнгө оруулалтын газрын даргаар нь томилогдож очсон. Тэндээсээ 2023 оны долдугаар сард ХНХ-ын сайд Х.Булгантуяагийн дэргэд ТНБД-аар нь томилогдсон. Ингээд өнгөрсөн 2024 оны хавар “Эрдэнэс оюу толгой” ХХК-ийн Гүйцэтгэх захирлаар дэвшсэн. Сонирхуулахад, ХНХЯ-ыг Х.Булгантуяа, Э.Ганхүү хоёр удирдаж байхад "Эмэгтэй сайдтай, эмэгтэй төрийн нарийн бичгийн даргатай яам төрийн түүхэнд цөөхөн" гэцгээдэг байлаа. Гэтэл Х.Булгантуяа саяхан яллагдагчаар татагдаж, Э.Ганхүү баривчлагдчихлаа. Нэг яамыг хамт удирдаж байсан хоёр эмэгтэй нэгэн зэрэг шахуу хууль хяналтынхантай орооцолдсон нь төрийн түүхэнд бас л цөөхөн байх.

Харин нөхөр С.Манлай нь 2013 онд ИНЕГ-аас 118,957 ам.долларын тэтгэлэг авч, АНУ-ын Пасифик стэйт их сургуульд Бизнесийн удирдлагаар сурсан. Буцаж ирээд 2016 оны сонгуулийн дараа ЗТ-ийн сайд Д.Ганбатын тушаалаар ИНЕГ-ын Дэд даргаар томилогдсон. Ингээд ЗТ-ийн сайд Ж.Бат-Эрдэнэ, Я.Содбаатар, Б.Энх-Амгалан, Л.Халтар, С.Бямбацогтын үед буюу 2022 он хүртэл ИНЕГ-ын Дэд даргаар ажилласан.

Товчхондоо, Э.Ганхүү, С.Манлай хоёрын хэн, хэн нь МАН-д нүүртэй, нас, намтрынхаа туршид дарга, захирал хийж яваа.

“Эрдэнэс оюу толгой” ХХК-ийн гүйцэтгэх захирал Э.Ганхүүгийн хадам дүү нь С.Отгонбат нь “Оюу толгой” ХХК-ийн Дэд ерөнхийлөгч байсан

“Эрдэнэс оюу толгой” ХХК-ийн гүйцэтгэх захирал Э.Ганхүүгийн нөхрийнх нь төрсөн дүү С.Отгонбат гэж хүн бий. 2001 оноос хойш төрд ажилласан. Тэр тусмаа, Сү.Батболдыг Үйлдвэр худалдааны сайд байх үед Гадаад худалдааны агентлагын Дэд дарга байсан. “Эрдэнэт үйлдвэр”-ийн захирал асан Х.Наранхүүг Үйлдвэр худалдааны сайд байхад Зөвлөх байсан.

Гол нь, С.Баяр, Сү.Батболдын Засгийн газарт буюу 2008-2012 онд дөрвөн жил Эрдэс баялаг, эрчим хүчний сайд Д.Зоригтын Зөвлөх байсан. Эрдэс баялаг, эрчим хүчний сайд Д.Зоригт 2009 онд “Оюу толгой”-н гэрээг байгуулахад Зөвлөх С.Отгонбатынх нь оролцоо их байсан. Тиймдээ ч Д.Зоригт 2012 онд өөрийн зөвлөх С.Отгонбатыг “Оюу толгой” ХХК-ийн Дэд ерөнхийлөгчөөр томилуулж, 2014 он хүртэл хоёр жил ажиллуулсан түүхтэй.

“Оюу толгой” ХХК-ийн Дэд ерөнхийлөгч асан С.Отгонбатын бэр эгч Э.Ганхүү хожим нь “Оюу толгой” ХХК-ийн 34 хувийг эзэмшигч “Эрдэнэс оюу толгой” ХХК-ийн Гүйцэтгэх захирлаар томилогдсон нь тун сонин тохиолдол. Эсвэл, Э.Ганхүүгийн томилгоонд хадам дүү С.Отгонбатынх, цаашлаад С.Отгонбатын дарга буюу одоо Сү.Батболдтой “Имарт”-ыг хамтран эзэмшигч, Эрдэс баялаг, эрчим хүчний сайд асан, “Оюу толгой”-н сонсголд гэрчээр оролцож буй Д.Зоригтын оролцоо байсан ч байж болох юм.

АТГ-ЫНХАНД БАРИВЧЛАГДСАН “ЭРДЭНЭС ОЮУ ТОЛГОЙ” ХХК-ИЙН ЗАХИРАЛ Э.ГАНХҮҮ ГЭЖ ХЭН БЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.