Засгийн газрыг огцруулах чуулганы нэгдсэн хуралдааны үеэр УИХ-ын гишүүдийн үнэн төрх ил боллоо. Тэд аливааг улстөржүүлж, өөрийн карьерийг өсгөх гэсэн оролдлогыг чуулганы хуралдааны үеэр гаргасан. Тухайлбал, УИХ-ын гишүүн Г.Дамдинням Засгийн газрыг огцруулах асуудлыг хэлэлцэх үеэр “Намайг шударга дуугараарай гэж ард иргэд сонгосон. Шүүх, Банкны тухай хуульд реформ хийе гэж ярьж, зүтгэсний төлөө ойрын хэдэн өдөр хариугаа хүртэж байна. Та нар шиг хулгай хийгээгүй шүү, хүн шиг зүтгэж бизнес хийж өөрийнхөө амьдралыг авч явж ирсэн. Үүнийхээ төлөө та нараас айж, шударга ёсны төлөө тэмцлээс ухарна гэж байхгүй” гэж хэлэлцэж буй асуудлаас хазайсан асуудал ярьж өөрийгөө илт өмөөрөв.

УИХ дахь АН-ын бүлгийн туршлагатай гэгдэх гишүүдийн нэг С.Одонтуяа ч ард түмний үзэл бодлыг гуйвуулж, өөрийгөө дөвийлгөх мэдээлэл хийгээд амжив. Ингэхдээ тэрбээр “Манай улстөрчид анх удаа ийм зүйл харж байгаа юм шиг амьдралаас тасарсан зүйл битгий ярьж бай. Та нар эмнэлгүүдийн эхчүүд төрдөг хэсгийг очоод үзээрэй. Аймгийн төвд ээжүүд төрчихөөд хоёр хоноод гар гэхэд сумын төв рүү мотоциклтэй яваад ямар их өвчин олж байгааг бүгд мэдэж л байгаа. Ерөнхий сайд та гадаадад байгаа монголчуудын асуудалд төдийлөн орж ажиллаагүй шүү. Гомдож явдаг гэдгээ хэлмээр байна. Сайн ажилласан зүйлүүд ч бий. Муу зүйл байна. Гадаадад байгаа 20 мянган монгол иргэнд нэг даргын нэг машины мөнгийг л хуваарилсан. Би үүнээс ичиж байна” хэмээсэн удаатай.

Ийн улстөрчид ямар үед тоглолт хийж, нэр хүндээ өсгөх вэ гэдэг аргаа хэдийн олжээ. Нийгэм эдийн засаг амаргүй цаг үед  эрх мэдэлт улайрагч  байгаа нь яав ч иргэдийнхээ эрх ашгийг бодсон үйлдэл биш байлтай.