Нүүрсний сонсголын үеэр Өмнөговь аймгийн газрыг хууль зөрчин гадаадын иргэн, аж ахуйн нэгжид эзэмшүүлсэн хэрэг баримтаар ил болж, шуугиан тарьж байна. Тодруулбал, Ханбогд сумын Засаг даргаар ажиллаж байсан хүмүүс эрх мэдэл, албан тушаалаа урвуулан ашиглаж, Хятадын компаниудад газар олгосон. Орон нутгийн удирдлагуудын Үндсэн хууль зөрчиж, үндэсний аюулгүй байдалд заналхийлсэн байж болзошгүй уг хэргийг холбогдох байгууллагууд шалгаж эхэлсэн бөгөөд тус Өмнөговь аймгийн ИТХ-ын дарга, Ханбогд сумын Засаг дарга нарын хүмүүсийг прокурорын зөвшөөрлөөр шалгаж, гэр, албан өрөөнөөс нь эх үүсвэр нь тогтоогдоогүй их хэмжээний мөнгө, үнэт эдлэл хурааж аваад байгаа. Түүнчлэн гадаадын иргэн, аж ахуйн нэгжид газар зарсан хэргээр 11 албан тушаалтныг яллагдагчаар татан шалгаж байгаа юм. Ханбогд суманд гадаадын 40 орчим компани нийт 4557 га газар эзэмшиж байна.

-60 ГА ГАЗАР ЗАРСАН ХАНБОГДЫН ЗАСАГ ДАРГА Х.НЭХИЙТ-

Өнгөрсөн арваннэгдүгээр сарын 31-нд Ханбогд сумын Засаг дарга Х.Нэхийтийн гэр болон албан өрөөнд прокурорын зөвшөөрлөөр шалгалт хийж, эх үүсвэр нь тодорхойгүй мөнгө, үнэт эдлэл хураан авсан байна. Харин Х.Нэхийт энэ талаар “Гэр болон албан өрөөнд нэгжлэг хийж, хууль хяналтын байгууллагаас шалгаж байгаа нь үнэн. Манайх дэлгүүр ажиллуулдаг. Гэр, дэлгүүрээс 13 сая төгрөг хураан авч, эх үүсвэрийг тодорхойлохоор авч явсан. Дэлгүүртээ зарахаар авчирсан найман мөнгөн аяга, үйлдвэрийн нэг, гар хийцийн гурван аягыг хураан авсан. Бас ажлын ширээний нүдэнд байсан 860 мянган төгрөгийг хураагаад авч явсан” гэж манай сайтад мэдээлэл өгсөн. Ханбогд сумын Засаг дарга Х.Нэхийтийг АТГ-аас 60 га газар гадаадын иргэн, аж ахуйн нэгжид эзэмшүүлсэн гэж мэдээлсэн. Тухайлбал,

• 2020 онд “Сан Арвитай” ХХК-д гаалийн хяналтын талбайн зориулалтаар 20 га газар 15 жилийн хугацаатай,
• 2021 онд “Лилия Гарден” ХХК-д Цагаан хад суурьшлын бүсэд 10 га газар,
• 2021 онд “Соронзон говь” ХХК-д Цагаан хад суурьшлын бүсэд 20 га газар,
• 2021 онд “Аз хур трэйвэл” ХХК-д Цагаан хад суурьшлын бүсэд 10 га газар 15 жилийн хугацаатай эзэмшүүлэх шийдвэрийг баталсан аж.

​

Х.Нэхийт нь 2020 оноос эхлэн Ханбогд сумын Засаг даргаар ажиллаж байгаа бөгөөд 2022 оны хөрөнгө орлогын мэдүүлэгтээ 290 сая төгрөгийн орлоготой, 97.4 сая төгрөгийн гэр бүлийн орлого, 218 сая төгрөгийн орон сууц, 242 сая төгрөгийн автомашин, 629 сая төгрөгөөр үнэлэгдэх мал, 120 сая төгрөгөөр үнэлэгдэх газар, 105 сая төгрөгийн үнэт эдлэл, 465 сая төгрөгийн үнэт эдлэлтэй гэж мэдүүлж байжээ. Мөн “Говьгурван чулуу” ХХК, “Хан богд тээвэр ложистик” ХХК, “Галбашанхайн унага” ГҮТББ, “Шинэхан богд” НҮТББ-д хувьцаа эзэмшдэг юм байна.

-59.1 ГА ГАЗАР ЗАРСАН ЗАСАГ ДАРГА АСАН Ш.ЭРДЭНЭЖАРГАЛ-

Ханбогд сумын Засаг даргаар 2018-2020 онд ажиллаж байсан Ш.Эрдэнэжаргалыг 59.1 га газар газар гэж мэдэгдсэн Тухайлбал,

• 2020 онд “Фүжи бит” ХХК-д Цагаан хад суурьшлын бүсэд 13.6 га газар,
• 2020 онд “Ийзи транспорт” ХХК-д Цагаан хад суурьшлын бүсэд 14.5 га газар,
• 2020 онд “Силвер титан интэрнэйшнл” ХХК-д Цагаан хад суурьшлын бүсэд 13 га газар,
• 2020 онд “Бат орших баян” ХХК-д Цагаан хад суурьшлын бүсэд 18 га газар эзэмшүүлсэн.

​

Өдгөө Ханбогд сумын ИТХ-ын төлөөлөгчөөр ажиллаж байгаа Ш.Эрдэнэжаргал нь  2022 оны хөрөнгө орлогын мэдүүлэгтээ гурван сая төгрөгийн орлоготой, 40 сая төгрөгийн нийтийн орон сууц, 12 сая төгрөгийн автомашин, 32 сая төгрөгийн мал, 4.5 сая төгрөгийн үнэт эдлэл, 29.6 сая төгрөгийн хадгаламжтай гэж мэдүүлжээ. Мөн тэрбээр “Галба түмэн занги” ХХК, “Галба секьюрити” ХХК, “Хангүрд” ХХК, “Галбын шонхорууд” НҮТББ-д хувьцаа эзэмшдэг юм байна.

-ГЭРТЭЭ 300 САЯ ТӨГРӨГ ХАДГАЛЖ БАЙСАН ИТХ-ЫН ДАРГА Б.БАДРАА-

Урьдчилсан байдлаар Өмнөговь аймгийн ИТХ-ын дарга Б.Бадрааг нийслэлийн Хан-Уул дүүрэгт өндөр зэрэглэлийн олон тооны орон сууц, үл хөдлөх хөрөнгө, үнэтэй автомашинууд худалдан авч, мөрийтэй тоглож, хууль бусаар олсон мөнгөө угаасан байж болзошгүй гэж хуулийн байгууллагаас тогтоосон байдаг. Улмаар арваннэгдүгээр сарын 31-нд Б.Бадраагийн гэр болон албан өрөөнд шалгалт хийж, гэрээс нь 300 сая төгрөг, юань, үнэт эдлэл, галт зэвсэг, сум зэргийг хурааж авсан байна. Мөн Б.Бадраа хүүгийнхээ нэр дээр компаниудынхаа үйл ажиллагааг явуулдагтай холбоотойгоор  түүний хүү Б.Наранболдыг давхар шалгаж, 461 дүгээр хорих ангид цагдан хорьсон.

Б.Бадраа нь 2012-2015 онд Өмнөговь аймгийн Засаг даргаар ажиллаж байсан бөгөөд 2019 онд УИХ-д нэр дэвшиж байсан. Тэрбээр 2022 оны хөрөнгө орлогын мэдүүлэгтээ 44 сая төгрөгийн орлоготой, 2.8 тэрбумын орон сууц, оффистой, 60 сая төгрөгөөр үнэлэгдэх 38 хурдан удмын адуутай, 20 сая төгрөгийн үнэт эдлэл, 174 сая төгрөгийн хадгаламжтай гэж мэдүүлж байжээ.