УИХ дахь АН-ын бүлэг хуралдаж, зарим шийдвэр гаргажээ. Засгийн газрын өчигдрийн ээлжит бус хуралдаанаар ирэх оны долдугаар сарын 1-нийг хүртэл иргэд, ААН-ийн цахилгаан, усны төлбөрийг тэглэх шийдвэр гаргасан. Энэ талаар АН-ын бүлгээс албан ёсны байр сууриа илэрхийлсэн юм. АН-ын бүлгийн дарга Д.Ганбат “2012-2016 онд “Эрдэнэт” үйлдвэрийн 49 хувийг ОХУ-аас авч Монголын тал эзэмшдэг болсон тул дээрх шийдвэрийг гаргасан.  Засгийн газар ийм шийдвэр гаргахад АН чухал оролцоотой байсныг дурдах нь зүйтэй. Цахилгаан дулааны үнийг тэглсэн гээд үйлчилгээ, чанарын асуудал дордох ёсгүй. Энэ талаар Засгийн газар анхаарч ажиллах хэрэгтэй. Тооцоо судалгаатай  шийдвэр гаргасан байх.

Хүнд үед төрөөс дэмжлэг авч чадахгүй орхигдсон хэсэг бүлэг хүн бий. Тухайлбал, малчид, аймаг, сум орон нутагт ажиллаж, амьдарч байгаа иргэд хүнд цаг үеийг туулж байгаа. Шахмал түлшний үнийг бууруулсан шиг арга хэмжээ авах байх. Ирэх лхагва гарагт Засгийн газар хуралдана. Энэ үеэр орон нутгийн иргэдийн асуудлыг хэлэлцэнэ гэсэн. Зургаан аймагт яаралтай арга хэмжээ авах шаардалагатай. Энэ өдрийн хуралдаанаар Төмөр замын тухай хуулийн шинэчилсэн найруулгын төслийг хэлэлцлээ. 1992-1996 онд УБТЗ-ын ХНН-ийг Монголын тал 100 хувь эзэмших боломжтой байсан. Гэвч энэ асуудал дээр тухайн үеийн МАХН ажиллаж чадаагүй. Олон жил төрийн эрх засаглаж байгаа нам энэ асуудлаа дараагийн гурван жилд шийдэх хэрэгтэй. Мөн Шүүхийн тухай хуулийг ажлын хэсгийн ахлагч танилцуулсан. Түүнчлэн Тагнуулийн тухай хуулийг хэлэлцэх нь зүйтэй гэсэн дээр АН-ын бүлгийн гишүүд санал нэгдсэн” гэв.