Г.Занданшатарын Засгийн газар долоон хоногийн настай 16 дэд сайдаа чөлөөлж мэдэхээр байна. Өөрөөр хэлбэл, өнгөрсөн долоо хоногт 16 дд сайдыг томилохоор оруулж ирж, АН-ын  бүтээмжийн менежерүүдийг төрийн томилгоот албанаас чөлөөлснөөр Ардчилсан намынхан Засгиййн газрыг огцруулах гарын үсэг цуглуулж эхэлсэн. Тодруулбал, дэд сайд нарынхаа томилгоог эргэж харахгүй бол Засгийн газрыг огцруулна хэмээн АН-ынхан мэдэгдээд буй.

        УИХ дахь Ардчилсан намынхны уг акц нэлээд хүчээ авч, одоогийн байдлаар Бүлгийн 30 гишүүн Засгийн газрыг огцруулах бичигт гарын үсэг зураад байгаа гэх мэдээлэл байна. Тэгвэл 32 дээш буюу нийт гишүүдийн гарын үсэг цугларбал уг асуудлыг УИХ-ын чуулганаар хэлэлцүүлэх хуулийн  зохицуулалттай.  Үндсэндээ Г.Занданшатарын Засгийн газар дэд сайд нарын томилгооноо болж, толгойгоо цустаж мэдэхээр байна. Улмаар хагас жилийн дотор хоёр удаа огцруулах санал орж ирж байгаа Засгийн газар боллоо.

        Засгийн газрыг огцруулах талаар Энэ талаар УИХ дахь Ардчилсан намын бүлгийн дарга О.Цогтгэрэл “Татвар төлөгч аж ахуйн нэгжүүд хүнд байдалд орсон. Эхнээсээ дампуурлаа зарлаж байна. Хувийн хэвшлүүд хүнд нөхцөлд, Төрийн хэмнэлтийн тухай хууль хүчин төгөлдөр үйлчилж байхад Монгол Улсын Засгийн газраас дэд сайд нарыг  томилж, нийт 40 сайдтай болж байна. Үүнийгээ тайлбарлахдаа бүтээмж болон хяналтын менежерийг цомхотгосон гэж худлаа ярьж байна. Тэднийг бүгдийг цомхотгох ёстой. Хуульд заасан 8-9 хувийн цомхотголоо ч хийх ёстой. Хэрвээ Ардчилсан намын бүлгээс тавьж байгаа шаардлагыг биелүүлэхгүй бол Засгийн газрыг огцруулах санал тавина” гэж мэдэгдсэн юм.

       Тэгвэл Г.Занданшатарын Засгийн газрыг унагааж мэдэх хамгийн эмзэг асуудал нь шатахууны болоод байна. Өнгөрсөн аравдугаар сараас хойш дэн дун таг зогсоочихгүй байгаа шатахууны хомстол иргэдийг олон цагаар дараалалд зогсоож, бухимдуулж байна. Ер нь Г.Занданшатарын “ангийнхан” танхим дотроо тун таарамжгүй байгаа нь ч үнэн. Эргэн сануулахад өнгөрсөн сард ХЗДХ-ийн сайд Б.Энхбаяр, Батлан хамгаалахын сайд Д.Батлут, Эрүүл мэндийн сайд Ж.Чинбүрэн нар маргалдаж улмаар зодолдож биенээ хүнд гэмтээсэн гэх мэдээлэл цацагдсан. Хэдийгээр Засгийн газрын сайд нар уг мэдээллийн үгүйсгэж байгаа ч хэн хэн нь олны өмнө бэртэлтэй гарч ирсэнд олон нийт одоо хүртэл эргэлзэж байна.

        Ил болсон эдгээр сайдаар гадна Г.Занданшатараас хатуухан сануулга авсан хэд хэдэн сайд бий. Тухайлбал, УИХ-ын дарга асан Д.Амарбаясгалангийн талд илт орсон С.Амарсайханыг  танхимаасаа гаргасан бол далд дэмжиж байсан хэд хэдэн сайд сануулгатай байгаа гэх бор шувуу Саарал ордноор нисэх болсон. Тодруулбал, Шадар сайд Т.Доржханд, Зам тээвэр хөгжлийн сайд Б.Дэлгэрсайхан, Эрчим хүчний сайд Б.Чойжилсүрэн нар УИХ-ын даргыг унагаах 35-ын бүлэгт багтсан ч начир дээрээ УИХ-ын дарга Д.Амарбаясгалангийн арыг “хамгаалж” байсан гэх мэдээлэл олны дунд гарч байсан нь худлаа цуурхал биш байсан аж.

       Тиймээс ирэх оноос өмнө Ерөнхий сайд Г.Занданшатар танхимдаа засвар оруулж, сайд нараасаа “шүд” сугалах компанит ажил өрнүүлэх бололтой.  Ингэж “шүд сугалах” байдлаар Г.Занданшатар хуучин сайд нараасаа салж, АН-тай хамтрах асуудал дахин сөхөгдөж мэдэх нь.

          Ингэснээр Засгийн газар гаргасан шийдвэртээ тодорхой хариу өгөхгүй бол Ардчилсан намынхан Засгийн газрыг огцруулах 22 кнопын эрэлд гарна. Үндсэндээ нийт гишүүдийн гуравны хоёрын саналаар Засгийн газрыг огцруулах хуулийн заалт хэрэгжиж 126 гишүүнтэй парламентаас 64 гишүүний саналаар Засгийн газрыг огцруулах боломжтой болсон гэсэн үг. Ийн Их хуралд одоогийн сөрөг хүчин АН 42 суудалтай болоод буй. Нэмээд МАН-ын хагарал бүрэн эвэндээ ороогүй байгаа цаг үед сөрөг хүчнийхэнд хүч нэмэх кнопны гишүүд мэр сэр байхыг үгүйсгэхгүй. Хамтарсан Засгийн газарт “жийгдсэн” Н.Номтойбаярын Үндэсний эвсэлийнхэн АН-д хүч нэмэх бүрэн боломжтой. Ингээд харвал Г.Занданшатарын Засгийн газар тун эмзэг цаг үед ирчихсэн гэсэн үг.

        Харин Ардчилсан намын энэ акц дээр хэн хүч нэмж, Г.Занданшатарын Засгийн газрыг огцруулахаар гарын үсэг зурах вэ гэдэг анхаарал татаж байна. Өөрөөр хэлбэл, МАН-ынхан учраа олж, эв зүйгээ олсон уу гэдэг нь эндээс харагдана.

       Өөрөөр хэлбэл, Г.Занданшатарын Засгийн газар, эрх баригч МАН-ынхан АН-ынхнаас айж, найр тавьсандаа дэд сайд нараа эгүүлэн татаж ч магадгүй байна.