Хотын дарга Х.Нямбаатарыг Хууль зүй, дотоод хэргийн сайд Б.Энхбаяр дуэльд дуудав. Дуудах дуудахдаа нэг асуудал дээр хоёр удаа чагт тавьлаа. Нийслэлийн замын хөдөлгөөний төв, Тээврийн  цагдаагийн албанаас өнгөрсөн амралтын өдрүүдэд нийслэлд шинэ жилийн  баярын өдрүүдэд дугаарын хязгаарлалт  хийх мэдээлэл гаргасан.

        Үндсэндээ хотын шийдвэрийг танилцуулсан гэсэн үг. Хариуд нь Хууль зүй дотоод хэргийн сайд Б.Энхбаяр мэдээлэл гараад нэг ч цаг ч болоогүй байтал “Дугаарын хязгаарлалт хийх тухай Нийслэлийн Засаг даргын захирамж гарч Тээврийн цагдаад албажиж ирээгүй бөгөөд хотын захиргаанаас амаар өгсөн чиглэлийн дагуу Тээврийн цагдаагийн алба мэдээлэл хийсэн байна. Энэ тухай Хууль зүй, дотоод хэргийн сайд, Цагдаагийн ерөнхий газрын даргад мэдэгдээгүй байсан. Хариуцлага яригдана. Албажаагүй, ам шийдвэрээр иргэдийн эрхийг хязгаарлахгүй байх талаар Цагдаагийн ерөнхий газарт үүрэг өгөв” хэмээн мэдэгдснээр хотын даргын шийдвэр цуцлагдлаа.

      Улмаар Хууль зүй, дотоод хэргийн сайд Б.Энхбаяр “Энэ тухай Хууль зүй, дотоод хэргийн сайд, Цагдаагийн ерөнхий газрын даргад мэдэгдээгүй байсан. Хариуцлага яригдана. Албажаагүй, ам шийдвэрээр иргэдийн эрхийг хязгаарлахгүй байх талаар Цагдаагийн ерөнхий газарт үүрэг өгөв” гэснээр хотын дарга Х.Нямбаатарт боловсон сануулга өгөв.

            Гэхдээ энэ удаагийн сануулга анхны сануулга биш. Тодруулбал, 2024 оны гуравдугаар сарын 13-нд Түгжрэлийг бууруулах зорилгоор замын хөдөлгөөнд өөрчлөлт оруулж байлаа. Өөрөөр хэлбэл, Төв шуудангийн уулзвараас 120 мянгат хүртэлх замын урсгалыг өглөө, оройд 3:1 харьцаагаар зорчуулсан бөгөөд Тээврийн цагдаагийн албанаас уг зохицуулалтыг хийж, ажлын зураг авалт хийсэн талаар мэдээлж байсан удаатай. Харин тухайн үед Хууль зүй, дотоод хэргийн сайдаар ажиллаж байсан Б.Энхбаяр Нийслэлийн замын хөдөлгөөнд зохицуулалт хийх талаар нийслэлийн иргэд, эрхэлсэн сайд, Нийслэлийн Засаг даргад урьдчилж танилцуулалгүйгээр арга хэмжээ авч, иргэдийн бухимдуулсан ЦЕГ-ын Тээврийн цагдаагийн албаны дарга Б.Оюутболдыг ажлаас чөлөөлөх арга хэмжээ авч, хариуцлага тооцож удаатай. Улмаар тухайн үедээ замын хөдөлгөөний туршилтыг зогсоож “Ажил, амьдралаа урьдчилан төлөвлөх боломж, мэдэх эрхээр иргэдийг хангалгүй, зохион байгуулалтын алдаа гаргасан явдалд нийслэлчүүдээсээ хүлцэл өчье” хэмээн Хууль зүй дотоод хэргийн сайд Б.Энхбаяр мэдэгдэж байсан түүх бий.

       Ийн хотын даргын шийдвэрт Хууль зүй, дотоод хэргийн сайд үе үе чагт тавьж, Б.Энхбаярын тавьсан чагтанд бүдэрч байсан нь ганц нэгээр тогтсонгүй. Түүнийг чагтнаас хэрхэн мултрахыг ч ард түмэн анхааралтай ажиглаж байна.

          Хууль зүйн сайд, хотын дарга хоёр хууль зүйн сайдын тамга тэмдэгийг гар зөрүүлэн солилцож байсан ч салбартаа хэн нь том байх вэ гэдэг хүчээ үзэж байгаа тэд. Хууль зүй, дотоод хэргийн сайд Б.Энхбаярын хувьд нэгэн  цагт Л.Оюун-Эрдэнийн танхимд багтаж, шударга ёсны сэлэмнийх нь ир нь байна хэмээн ам гарч байлаа. Өөрөөр хэлбэл, хотын дарга Х.Нямбаатартай ч тэрбээр нэгэн цагт баг болж, сонсголоор ул төрийн томчуудыг намнах ажилд хамтдаа зүтгэсэн.

         Харин өнгөрсөн намар МАН-ын том хагарлын үеэр эрх ашиг нь салж, талцаж эхэлсэн. Түүнээс хойших хугацаанд тэдний хууль зүйн салбарт хэн нь хүчтэй байх тэмцэл дотооддоо чимээгүйхэн хэрнээ ширүүнээр өрнөж, байгаагийн илрэл нь энэ байлаа.

              Түүнчлэн Ерөнхий сайд Г.Занданшатар улс төрийн мэдэгдэл  хийж, Хууль зүй, дотоод хэргийн сайдаа Б.Энхбаярыг томилох санал гаргах үеэр хотын дарга Х.Нямбаатар “Хууль зүйн сайд нь хэн нэгний жад, сэлэм, илд, бамбай болох учиргүй” хэмээн сануулж байсан нь удаатай.

       Тэрбээр “Хууль зүй, дотоод хэргийн сайд бол Монгол Улсын хууль зүйн бодлогыг тодорхойлох, аюулгүй байдлыг сахин хангах үүргийг Ерөнхий сайдын өмнө хуулиар хүлээдэг. Хууль зүйн сайд нь хэн нэгний жад, сэлэм, илд, бамбай болох учиргүй. Тэр дундаа хэрэг хянан шийдвэрлэх ажиллагаанд хөндлөнгөөс оролцдог субъект биш. Улс төрийн өрсөлдөгчөө махны машин, хонгилоор оруулан намнахын тулд ийм шийдвэр гаргалаа гэж харагдаж байна шүү дээ. Бид Солийн Данзан, Жадамбын Баваасан нарыг МАН-ын III хуралдаанаас баривчлан Шар хаданд аваачин буудан хороосон аймшигт түүхийг мартах учиргүй. Гэмт хэрэгтэй тэмцэх чиг үүрэг бүхий байгууллага нь ажлаа хийх ёстой” хэмээн мэдэгдэж байлаа. Үндсэндээ МАН-ын “зодоон”-ны үеэр Хууль зүй, дотоод хэргийн сайд Б.Энхбаяраас эхлээд хэнтэй халз үзэхэд бэлэн байсан УИХ-ын гишүүн П.Сайнзоригийн үг бол хотын дарга Х.Нямбаатарын үг байсан гэдгийг хэлэлүүлэлтгүй мэдэх биз ээ.

       Ийн   улс төрийн бүлэглэлүүдийг “бөлдөгдөх”, ах нарынхаа аашийг нам “дарах” гээд ахуйн хүрээний аар саархан ажлаа гар нийлэн хийсээр одоо л тэд өөрсдийгөө улс төрийн тавцанд “бялдаржуулах” ажилдаа ороод байна. Хууль хүчний байгууллагад өөрийн хүнээ томилохоос эхлээд хэн нь салбартаа том байх эрх мэдлийн төлөө өрнөж эхэлсэн бололтой. Өөрөөр хэлбэл, Хууль зүй дотоод хэргийн сайд Б.Энхбаяр, хотын дарга Х.Нямбаатар хоёр өөд өөдөөсөө тулж эхэллээ.