Саяхныг хүртэл оффшор дансандаа 2.5 сая ам.долларын нууц хөрөнгө байршуулаад мартсан С.Баярцогт Монголын төрийн “дайсан” явлаа. Гэтэл 20 гаруй жил Оюутолгойг “зарж идсэн” гэх хар түүхтэй явж ирсэн С.Баярцогт улс төрд эргэн ирж байгаагаа зарлаж, УИХ-ын гишүүн асан Д.Дэмбэрэл, Д.Тэрбишдагваас эхлээд УИХ-ын гишүүн асан Л.Гүндалай, УИХ-ын гишүүн Ц.Даваасүрэн, Б.Жаргалан, Э.Болормаа гээд толгой дараалан зандарч байх. Тэгээд болоогүй ангийн нөхөр З.Энхболдыг атаархагч, ангийн “дайсан” гэх зэргээр цоллоод амжив.

        Оюутолгойн сонсголын үеэр С.Баярцогт чемодан дүүрэн нотлох баримттай ирсэн нь олны анхааралд орсон. Сонсголоос хойш С.Баярцогтыг баримттай, баталгаатай гэж 20 жилийн хар түүхийг нь баллуурдах ажлууд ч сошиалд идэвхтэй өрнөлөө. Ногоон номоороо Оюутолгойн сонсгол дээр 20 жилийн хар түүхээ хамгаалах гэж өөрөө мөн ч их зүтгэв. Тухайн үеийн парламентад сууж байсан танхимын нөхөд, УИХ-ын гишүүд эхнээсээ тэсэрч, арай ч ганцаараа Оюутолгойн баатар болчихоод биш байгааг ээлжилж сануулсан ч удаатай.

         Ингэхдээ УИХ-ын гишүүн Н.Алтанхуяг “Оюутолгойн гэрээ буруу байгуулагдаагүй. Энэ С.Баярцогтын буруу ч биш. Гэхдээ С.Баярцогт чи ногоон ном ярихаа больмоор байна. Харин яагаад 2019, 2020 онд авах байсан ногдол ашиг байхгүй болсон. Үүнд ямар хүчин зүйл нөлөөлсөн. Үүнийг авахын тулд бид юу хийх байсан юм. Ийм юм ярьмаар байна. С.Баярцогт манай Засгийн газрын гишүүн биш. Би Засгийн газартаа аваагүй. Ч.Сайханбилэгийн Засгийн газрын Хэрэг эрхлэх газрын дарга. Гэхдээ С.Баярцогтоо чи одоо шударга юм хэл. Оюутолгойн Гүний уурхай, одоо Дубайн гэрээ болчихсон үүнийг батлахаас өмнө намайг янз бүрээр шахсан. Одоогийн Ерөнхийлөгч хүртэл оролцсон. Тухайн үед би С.Баярцогтыг дуудаж уулзсан. С.Баярцогт надад чухал зөвлөгөө өгсөн. Оюутолгойн гэрээний хойноос зурсан бүх бичиг цаас Оюутолгойн гэрээтэйгээ нийлмэл чанартай гэж хэлсэн учраас би гэрээг зураагүй” хэмээн сануулаад амжив.

        Харин УИХ-ын гишүүн С.Дэмбэрэл “С.Баярцогт Үндэсний аюулгүй байдлын зөвлөмжийг шүүмжлэх яамны сайд гэж ямар юм байсан юм. Дур зоргоороо аашлагч бол хоёр талд ажилласан. Бидний бодлогын асуудлыг цаад талд аваачиж шивнэдэг, хариу гаргуулахаар гэрээнд тусгуулдаг этгээд байсан байна. Сангийн сайдын арчаагүй байдлаас болоод гэрээг үр дүнгүй, арчаагүй болгосон нь харагдаж байна. Иймээс гэрээний үндэс болсон Аюулгүй байдлын зөвлөмжийг шийдвэрүүдийг хянан үзэх гэсэн оролдлого бол гэрээг бүхэлд нь цаад талд ашигтай байхлгах санаархлын үзүүр байжээ” хэмээн ундууцсан.

       С.Баярцогтын төрд гавьяа ч байгуулсан, гай ч тарьсан.  Сэлэнгэ аймгаас 25 настай залуухан улстөрч УИХ-ын гишүүнээр сонгогдож, Монголын төрд Сангийн сайд, ЗГХЭГ-ын даргаар ажиллаж, гал дуудсан гаднын хөрөнгө оруулалтын томоохон төсөлд гар бие оролцсон нь үнэн. Мэдээж зэсийн баяжмалаараа дэлхийд эхний дөрөвдүгээрт эрэмбэлэгддэг Оюутолгойг гуравдагч хөршийн хөрөнгө оруулалтаар эхлүүлэх төслийг гардаж хийх ажлыг эхлүүлсэн урдаа барих улстөрчдийн нэг мөн. Оюутолгойн гэрээг байгуулахаас өмнө Монголын эдийн засгийн үзүүлэлт 1.6 хувьтай байсан. Гэрээ хийснээр эдийн засаг тав дахин өсөж, улсын төсөв найм дахин өссөн. Угтаа  Оюутолгойн гэрээг хийхээс өмнө улсын төсөв 1.8 их наяд байсан бол өнөөдөр бид 33.0 их наядын төсөв ярих хэмжээнд хүртлээ эдийн засаг өссөн нь үнэн.  

     Гэвч түүний гол алдаа оффшорт хөрөнгөтэй болтлоо баяжсан, хөрөнгийн эх үүсвэрээ баталж чадаагүй. Нэмээд Оюутолгойн гэрээ Монголын талд ашигтай байж чадахгүй. Ногдол ашгаа хүртэж чадахгүй, 20 тэрбум ам.долларын өртэй байгаа нь ч бодит үнэн. Шүүхээс 10 жил ял сонсож, давж заалдах шатны шүүхээс хэргээ 4:8 жил болгож, эцэстээ Улсын дээд шүүхээр хэрэг нь мөрдөн байцаалалт буцаж замхарсан удаатай. Хэргийг эргэн сануулбал,  "Оюутолгой"-г ашиглах хөрөнгө оруулагчтай хэлэлцээ хийх ажлын хэсэгт байхдаа албан тушаалын байдлаа болон албаны чиг үүргийн дагуу олж авсан мэдээллээ ашиглан эхнэр Ч.Нарантуяагийн 50 хувийн хувьцаа эзэмшдэг "Кью Эф Эс" компаниар 2010-2012 онуудад Ханбогд болон өмнөд кемпэд үйлчилгээ үзүүлэх 43 тэрбум төгрөгийн, "Номадс катеринг энд интеград сервис" ХХК-иар 20.7 тэрбум төгрөг буюу нийт 63.9 тэрбумын орлого олж, улсад хохирл учруулсан. 2009.10.06-ны өдөр хөрөнгө оруулалтын гэрээ байгуулагдсаны дараа 1.6 сая ам.долларыг оффшор бүс дэх "ND Harmony LTD" компанийн данснаас авч, мөнгө угаасан. Нүхт дэх үл хөдлөхөө Хожгорын Дөчинтав гэх хүний нэр дээр гарган авч, хөрөнгө орлогоо нуусан. Зайсан дахь Белла Виста таун хаусуудын үнэлгээ өөрий хууль ёсны орлогоос гадна их хэмжээгээр нэмэгдсэнийг тайлбарлаж чадаагүй буюу үндэслэлгүйгээр хөрөнгөжсөн хэмээн буруутгагдсан байдаг. Ийн нэгэн цагт Монголын төрд “дайсан” болж байсан С.Баярцогт улс төрд дахин мандаж, дуу нь чангарчихсан явна.

          С.Баярцогт Ардчилсан намын генсек болно гэнэ, Ардчилсан намд Ц.Элбэгдоржийн фракцынхан хүчээ зузаатгаж, Ерөнхийлөгчийн сонгуульд С.Баярцогтыг сойно гэнэ. Одоогийн Ерөнхийлөгч У.Хүрэлсүхтэй С.Баярцогт уулзаж, улс төрийн тохироо хийсэн гэнэ гэх яриа улс төрийн хүрээнд өрнөөд удаж байна.  Эцэстээ, С.Баярцогт улс төрд эргэж ирэх бэлтгэлээ базаасан нь нэгэнт тодорхой болжээ.