Г.Занданшатарын Засгийн газрын суудал нь өнцөгдсөн гэлтэй, ар араасаа хүнд цохилтууд ирж байна. Өөрөөр хэлбэл, МАН-ын даргын сунгаанд нэр дэвшсэн Г.Занданшатар, Д.Амарбаясгалан нарын намрын улс төрд эхлүүлсэн “зодооноос” болоод Засгийн газар танхимаараа “огцорч”, Үндсэн хуулийн цэц дээр очиж эрхээ сэргээлгэх хүртлээ төрийн хямралд хүрсэн.

          Үндсэн хуулийн цэцийн “хамгаалалтаар” тогтож, үлдсэн Г.Занданшатарын Засгийн газар дотроо багагүй зөрчилдөөнтэй, халаа сэлгээ ихтэй намрыг барж, өвөлтэй золгож байна. Үндсэндээ өнгөрсөн зургаан сарын хугацаанд Г.Занданшатарын Засгийн газар танхим дотроо халаа сэлгээ хийсэн байна.  Тухайлбал,  Хууль зүй дотоод хэргийн сайд Л.Мөнхбаатарыг улс төрийн зодооны эхлэл үеэр УИХ-ын гишүүн Б.Энхбаяраар солих шийдвэр гаргаж байгаагаа Ерөнхий сайд танилцуулсан. Улмаар УИХ-ын дарга огцорч, Засгийн газар тогтож үлдсний араас Хууль зүй дотоод хэргийн сайд Л.Мөнхбаатарыг чөлөөлж, түүний оронд УИХ-ын гишүүн Б.Энхбаярыг томилж байлаа. Түүний араас танхимын зарчимаасаа ухарсан гэх шалтгаанаар Шадар сайд С.Амарсайханыг албан тушаалаас нь чөлөөлж, оронд нь УИХ-ын гишүүн Х.Ганхуягийг Шадар сайдаар томилоод байна.

САЙДЫН СУУДЛЫН СЭЛГЭЭ

           Улмаар УИХ-ын дарга асан Д.Амарбаясгалан өөрийн хүсэлтээр УИХ-ын даргаас чөлөөлөгдснөөр Г.Занданшатарын Засгийн газрын Тэрргүүн Шадар сайдаар ажиллаж байсан УИХ-ын гишүүн Н.Учрал УИХ-ын дарга болж, түүний албан тушаалаас нь чөлөөлсөн. Ингээд Н.Учралын албан тушаалд Хүнс хөдөө аж ахуй хөнгөн үйлдвэрийн сайд Ж.Энхбаярыг томилж, түүний оронд УИХ-ын гишүүн М.Бадамсүрэнг Хүнс хөдөө аж ахуй, хөнгөн үйлдвэрийн сайдаар томилоод байна. Энэ мэтээр Г.Занданшатарын Засгийн газар зургаан сарын хугацаанд танхимдаа багагүй халаа сэлгээ хийж, дотроо түнжин муутай байна.

              Гэвч, Засгийн газрын халаа сэлгээ, томилгооны ажлууд дөнгөж эхэлж байгааг сүүлийн үед өрнөж байгаа улс төрийн үйл явдлууд тод харуулж байна.  Угтаа бол дотооддоо хагараад байсан МАН-ынхан намын Их хурлаа хийж, дүрмээ шинэчлээд, намын даргаа сонгож, сая нэг учраа олов уу гэтэл Г.Занданшатарын Засгийн газрын танхимын сайд нар нь дотроо түнжин хагараад эхэллээ.

ТАНХИМ ДОТОРХ “ЗОДООН” ХУРЦДАЖ ЭХЭЛСЭН ҮҮ

         Эргэн сануулахад өнгөрсөн сард ХЗДХ-ийн сайд Б.Энхбаяр, Батлан хамгаалахын сайд Д.Батлут, Эрүүл мэндийн сайд Ж.Чинбүрэн нар маргалдаж улмаар зодолдож биенээ хүнд гэмтээсэн гэх мэдээлэл цацагдсан. Хэдийгээр Засгийн газрын сайд нар уг мэдээллийн үгүйсгэж байгаа ч хэн хэн нь олны өмнө бэртэлтэй гарч ирсэнд олон нийт одоо хүртэл эргэлзэж байна.

         Улмаар өнгөрсөн долоо хоногт ЗГХЭГ-ын дарга С.Бямбацогт, Аж үйлдвэр эрдэс баялагийн сайд Г.Дамдинням нарын “ууртай” мэдэгдлүүд  олны анхаарлыг татаж, танхимдаа таарахаа байсныг илтгээд буй. Өөрөөр хэлбэл, ЗГХЭГ-ын дарга С.Бямбацогт Зэс боловсруулах үйлдвэрийн сонгон шалгаруулалтыг зарлах талаар мэдээлэл хийсэн. Харин энэ үеэр Аж үйлдвэр, эрдэс баялагийн сайд Г.Дамдинням цахим хуудастаа "Манайх Уул уурхайн салбар хоёр сайдтай болсон. Одоо Аж үйлдвэрийн хоёр дахь сайдтай болсон шүү дээ. Төсөл сорчилно, ТӨК-д сорчилно" гэж байр сууриа илэрхийлсэн нь шууд утгаараа ЗГХЭГ-ын дарга С.Бямбацогт руу чиглэсэн улс төрийн зөрчилдөөн гэж харагдаж байгаа юм. Өөрөөр хэлбэл, энэ асуудлыг Г.Дамдинням сайд анх удаагаа сөхөөгүй. 2026 оны төсвийн хэлэлцүүлгийн үеэр ч тэд ийн үг хаялцаж байсан нь ард түмний ой санамжинд үлдсэн билээ. Ийн гал дээр тос гэгчээр Засгийн газрын сайд нар дотроо ил далдаар зодолдоод эхэлсэн нь илт байна.

        Ил болсон эдгээр сайдаар гадна Г.Занданшатараас хатуухан сануулга авсан хэд хэдэн сайд бий. Тухайлбал, УИХ-ын дарга асан Д.Амарбаясгалангийн талд илт орсон С.Амарсайханыг  танхимаасаа гаргасан бол далд дэмжиж байсан хэд хэдэн сайд сануулгатай байгаа гэх бор шувуу Саарал ордноор нисэх болсон. Тодруулбал, Шадар сайд Т.Доржханд, Зам тээвэр хөгжлийн сайд Б.Дэлгэрсайхан, Эрчим хүчний сайд Б.Чойжилсүрэн нар УИХ-ын даргыг унагаах 35-ын бүлэгт багтсан ч начир дээрээ УИХ-ын дарга Д.Амарбаясгалангийн арыг “хамгаалж” байсан гэх мэдээлэл олны дунд гарч байсан нь худлаа цуурхал биш байсан аж.

        Нэмээд Засгийн газар, хууль хяналтын байгууллагаас Төрийн өмчит компаниудад хяналт шалгалт оруулж, халаа сэлгээ хийж эхэлсэн нь ч учиртай. Өчигдөр гэхэд Ерөнхий сайд Дулаан IV цахилгаан станцад ажиллаж, тус компанид хийсэн шалгалтаар олон зөрчил илэрсэн гэдгийг мэдээллээд байна.

       Тиймээс ирэх оноос өмнө Ерөнхий сайд Г.Занданшатар танхимдаа засвар оруулж, сайд нараасаа “шүд” сугалах компанит ажил өрнүүлэх бололтой.  Ингэж “шүд сугалах” байдлаар Г.Занданшатар хуучин сайд нараасаа салж, ХҮН, ИЗНН-ын  сайд нарыг хамтарсан Засгаас гаргах төлөвлөгөө гаргасан гэх яриа ч МАН-ынхан дунд сэм яригдаж эхэлжээ.