Эрүүл мэндийн салбар энэ өвөл “гал алдаж” мэдэх нь ээ, үнэндээ. Хүйтний урь орохтой зэрэгцээд эрүүл мэндийн шат шатны байгууллагууд ачааллаа дийлэхээ больж, ханиад, томуунд дарлуулсан бяцхан үрс өвчиндөө шаналан, эмнэлгийн шалан дээр өдөр хоногийг өнгөрөөж байна. Тэр байтугай түргэн тусламжийн төв нь “Томуутай хүүхдийн дуудлагыг хүлээж авахгүй” гээд дүүргийн эмнэлэгт нь даатгаад хаяахаас аргагүй нөхцөлд хүртлээ ачааллаа дийлэхээ больсон аюултай нөхцөлд ирсэн байна. Эмч, эмнэлэгийн ажилтнууд өдөр шөнөгүй зүтгээд ч хүүхдүүдээ үзэж дийлэхгүй сөхөрч унахаас наагуур байгааг учирлаж байх.

        Өвөлдөө утаан хөшигтэй Улаанбаатарын өвөл дэндүү урт. Идэр есийн хүйтэн эхэлж амжаагүй байхад ханиад томуунд дарлуулж эхэллээ, нийслэлчүүд. Нийслэлийн түргэн тусламжийн төвд хоногт 2775 дуудлага ирж байна. Энэ нь өмнөх оны мөн үетэй харьцуулахад 67 хувиар өссөн үзүүлэлт гээд бодвол эрүүл мэндийн салбарт аюулын харанга дэлдэж байна.

        Уг нь Эрүүл мэндийн сайд Ж.Чинбүрэн халуун намраар “Ханиад томууны үед хүүхдүүдийг эмнэлэгийн коридорт хэвтүүлэхгүй” гээд ам гарч байлаа. Харамсалтай нь,  хэлсэн үгнийх нь шүлс ч хатаж амжаагүй шахам байхад эмнэлгийн коридор эхнээсээ дүүрч, хүйтэн шалан дээр халуурч, бүлээрсэн хүүхдүүд амь нэхэж,  тэвэрсэн эцэг эхчүүд эмнэлгийн байгууллагад хэдэн цагаар дараалалд зогсоод, сандарч явна.        

         Намаржин улстөржиж гүйсэн улстөрчид сая сэхээ авсан аятай, улсын эмнэлэгүүдээр орж, нөхцөл байдалтай танилцаж байгаагаа цахим орчинд мэдээлж, галыг намжаах гэж оролдож байх. Харин халуурч, бөөлждөг хүнд хэлбэрийн ханиад өвлийн бэлтгэлээ хангалттай базаагаагүй, улстөржиж гүйсэн эрх баригч намынхан төдийгүй, Эрүүл мэндийн сайдын ажлыг дор нь шалгаад өглөө.  

      Эрүүл мэндийн сайд Ж.Чинбүрэн одоогийн эрх мэдэлд очихыг тулд байдгаа барьж, мөн ч их зүтгэсэн дээ. Ингэхдээ тэрбээр эрүүл мэндийн салбарынхантайгаа муудаж хүртэл энэ албан тушаалд хүрсэн. Гэвч үнэн хэрэгтээ ингэж дуулиан шуугиан болтлоо албан тушаалд улайрч хүрснээсээ хойш эрүүл мэндийн салбарыг хөл дээр нь босгохоос хэл ам хэрүүл дуулианаараа олны анхаарлыг татаж явна. Тэр тусмаа Эрүүл мэндийн сайд Ж.Чинбүрэн эмийн чанарыг асуудлыг хамгийн их сөхөж, эрх мэдэлд хүрсэн удаатай. Угтаа бол УИХ-аар эмийн сонсгол явуулж хүртэл олны анхаарлыг өөртөө татсан байтал өдгөө  ханиад томууны эд дэгдэлтийн эрчимтэй үед эмийн чанарыг асуудал хурцаар сөхөгдөж, эцэг эхчүүд хариуцлага нэхсээр байна.

       Түүний хувьд эрүүл мэндийн салбарт сайдаар очсноосоо хойш хамгийн их халаа сэлээ хийсэн. Томилгоо хийгээд ажил нь сайжирдаг бол Ж.Чинбүрэнгийн тэргүүлсэн эрүүл мэндийн салбарын хамгийн их сайжрах байлаа, өнгөрсөн хугацаанд.

        Тухайлбал, УИХ-ын гишүүн Ж.Чинбүрэн Эрүүл мэндийн сайдаар томилогдсноосоо хойш СЭМҮТ-ийн захирал Г.Анхболдыг чөлөөлж, өөрийн найз гэгдэх Г.Ууганцэцэгийг томилсон. Улмаар Хавдар судлалын үндэсний төвийн захирлаар М.Адилсайханыг томилогдоод хоёр сар болоо ч үгүй байхад нь сайд болсон даруйдаа чөлөөлж,  клиникийн профессор, эх барих эмэгтэйчүүдийн зөвлөх зэргийн эмч Ц.Батболдыг томилсон.

      Мөн ХӨСҮТ-ийн захирлаар С.Энхболдыг, ЭХЭМҮТ-ийн захирлаар Г.Баттулгыг томилсон гэх мэтчилэнгээр эрүүл мэндийн салбарт байж болох бүх томилгоог хийсэн. Харамсалтай нь халаа сэлгээгээрээ тэргүүлсэн эрүүл мэндийн салбарын нөхцөл байдал дээшлэх нь битгий хэл улам бүр уруудаж байгааг учир мэдэх хүмүүс шүүмжилж байна.

      Цаашлаад, өнгөрсөн хугацаанд Засгийн газрын сайд нараас хамгийн их дуулиан шуугиан тарьсан сайд нарын нэг Эрүүл мэндийн сайд Ж.Чинбүрэн. Хамгийн сүүлчийн хоёрхон жишээг дурдахад салбарынх болж бүтэхгүй асуудлыг шүүмжлсэн УИХ-ын гишүүн Д.Ганмааг Төрийн ордонд дарамталсан хэмээн УИХ-ын гишүүд шүүмжилж байлаа. Удалгүй танхимын сайд нартайгаа гар зөрүүлж, нэгнээ хүнд бэртээсэн гэх дуулианы эзэн болсон. Энэ мэтчилгээр халаа сэлгээгээ, хэл амаараа олны анхааралд байсан Эрүүл мэндийн сайд Ж.Чинбүрэн эрүүл мэндийн салбараа хөл дээр нь болохоос илүү улс төрийн дуулиан шуугианд анхаарсаар салбараа самарч орхисон гэхэд ч хэлсдэхээргүй байна.

       Эцэст нь сануулахад, эрүүл мэндийн салбарт байгаа цөөн хэдэн боловсон хүчнээ улс төрөөс салгахгүй бол тангараг өргөсөн эмч нараа улс төрийн махны машинд оруулж, үнэгүйдүүлж дуусах юм байна. Эзэмшсэн мэргэжлээрээ иргэдийнхээ эрүүл мэндийг хамгаалахаас биш сайд, эсвэл гишүүн болоод эрүүл мэндийн салбарыг хамгаална гэж байхгүй юм байна гэдгийг сүүлийн хэдэн жил хангалттай харлаа. Үнэндээ зангиа зүүж, хослолоор гангарахаас илүү очиртой тэмдэгээ зүүж, цагаан халаад, чагнуур бариад элгээрээ хэвтсэн эрүүл мэндийн салбараа аврах цаг нь болсон юм биш үү, Ж.Чинбүрэн сайд аа.