Өнөөдөр Олон улсын Хүүхдийн эрхийг хамгаалах өдөр тохиож байна. Эргэлт.мн мэдээллийн сайтын редакц бяцхан уншигчдадаа Хүүхдийн баярын мэнд хүргэж, эгдүүтэй хөөрхөн дуучин “Энжи” буюу А.Эрдэнэцэцэгтэй уулзуулж байна. “Авьяаслаг монголчууд” шоунд өхөөрдөм бяцхан чоно болж оролцож олны хайрыг булаасан “Энжи” өөрийн бие даасан “Boom, Boom”, “Crush” зэрэг уран бүтээлээ гаргаад буй. “Сайн найз гэж өөрт байгаа зүйлээ хуваалцдаг хүнийг хэлнэ” хэмээн ярих бяцхан Энжигийн ярилцлагыг хүргэж байна.

-Сайн уу Энжи. Хүүхдийн баярын мэнд хүргэе.

    -Сайн. Та сайн байна уу. Маш их баярлалаа.

-Энжигийн хувьд хүүхдийн баярыг хэрхэн өнгөрүүлдэг вэ?

   -Миний хувьд энэ өдөр хүүхдүүдийг баярлуулахаар олон тоглолтод оролцож, ая дуугаа өргөж өнгөрүүлдэг. Хүүхдүүдийг баярлуулсаар байгаад дандаа оройтож гэртээ харьдаг. Тэгээд “Гялс өөрөө баярлая” гээд хурдан баярладаг. Заримдаа хүүхэд гэдгээ мартчихдаг.

-Зуны амралтаа хэрхэн өнгөрөөж байна вэ?

     -Сүүлд “Crush” нэртэй уран бүтээл гаргасан гэдгийг үзэгчид мэдэж байгаа байх. Удахгүй бид шинэ клип гаргахаар бэлдэж байгаа. Намар хичээл эхлэх үеэр цацагдах болов уу.

-Сүүлийн жил гаруй хугацаанд цахимаар хичээлээ үзсэн шүү дээ. Хичээл нь хэр ойлгомжтой байв?

     -Эхэндээ хэцүү байсан. Тэгээд дасаж эхэлсэн. Танхимаар хичээл орохоор жоохон л үймүүлэхээр багш хараад, “Аая” гээд уурладаг. Одоо бол хөдөлсөн ч багш яах ч үгүй. Тэр нь гоё.

-Энжигийн хамгийн сайн найзыг хэн гэдэг вэ?

     -Одоохондоо “сайн найз” гээд онцлох найз байхгүй. Найзууд байгаа хэдий ч  яг жинхэнэ найз мөн эсэхийг нь мэдэхгүй байна.

-Яагаад?

    -Нээрээ надад нэг сайн найз байгаа юм байна. н.Гэгээлэн гээд хамгийн сайн найз минь байна. Манай ангийн хүүхэд, бид хэзээ ч нэгнээсээ хол байж үзээгүй. Бусад найзуудаа хэр сайн найз вэ гэдгийг мэдэхгүй байна аа. Олон найз байх нь бол байгаа. Миний хувьд сайн найз гэж хэцүү үедээ тусламж гуйхад нь “үгүй, чадахгүй” гэж хэлдэггүй хүнийг жинхэнэ найз гэж боддог. Би мөнгөгүй явж байхад миний сайн найз “хоёулаа миний мөнгөөр хоол аваад, хуваагаад идье” гэж хэлдэг.

-А.Эрдэнэцэцэг аль хичээлдээ илүү сонирхолтой вэ?

    -Би биеийн тамир, математикийн хичээлдээ илүү дуртай. Тоо бодох, дасгал хийх сонирхолтой. Мэдээж дуу, хөгжмийн хичээлдээ дуртай л даа.

-Том болоод ямар мэргэжилтэй хүн болох вэ?

    -Би том болоод дэлхийд алдартай, хэн ч харсан таньдаг жүжигчин, дуучин болох хүсэлтэй.

-Дуучин, жүжигчин хоёрын аль нэгийг нь сонгохгүй гэж үү?

    -Хоёуланг нь авч явахыг хичээж байна. Нэг талдаа жүжиглээд, нэг талдаа дуулаад явъя гэж бодож байгаа.

-Гэхдээ одоо ч гэсэн хүмүүс чамайг таньдаг шүү дээ.

   -Тийм л дээ. Гудамжинд хүмүүс таараад “Хамт зургаа авхуулъя” гэж хэлдэг. Эхэндээ бүр манай сургуулийн хүүхдүүд бөөн юм болдог байсан шүү дээ. “Энжи явж байна” гэж шивнэлдээд л. Сүүлдээ олон яваад байхаар тэгэхээ больсон. Бүүр жоохон хүүхэд ирээд “Энжи найзалж болох уу” гэж асууж байсан. Тэгээд би шулуухан “Би чамтай найзлахгүй” гээд хэлчихлээр гомдоод, сэтгэл нь харлана шүү дээ. Тийм болохоор үгүй гэж хэлж чаддаггүй.

-Миний дүү ямар баярт илүү дуртай вэ?

     -Би төрсөн өдөртөө дуртай. Олон бэлэг авна, мөн ээж минь намайг төрүүлсэн учир төрсөн өдөр минь л хамгийн сайхан.

-Энжи ээжтэйгээ адилхан уу?

     -Аав, ээжийн холимог л байх. Хүмүүс аавтайгаа хамт явж байхаар аавтайгаа адилхан гээд, ээжтэйгээ хамт явж байхаар ээжтэйгээ адилхан гэдэг. Миний бодлоор нүд минь ээжтэйгээ адилхан.

-Миний дүү найзууддаа хүүхдийн баярын мэнд хүргэхгүй юу?

    -Үе тэнгийн найзууд, бүх хүүхдүүддээ хүүхдийн баярын мэнд хүргэе. Баяраа сайхан тэмдэглээрэй.

-Ярилцсанд баярлалаа, Энжи. Сайхан баярлаарай.

    -Баярлалаа.