Япондоо битгий хэл дэлхийд борлуулалтаараа тэргүүлдэг “Тоёота” компани “Ланд Крузер-300” тэргүүтэй 10 загварын автомашиныхаа хөдөлгүүрийн асуудлаар өнгөрсөн хэдэн өдөр анхаарлын төвд байлаа. Бүр энэ асуудал газар авсантай холбоотойгоор дэлхийд автомашины борлуулалт, орлогоороо толгой цохидог “Тоёота”-гийн удирдлагууд толгой бөхийлгөж, уучлалт гуйж байв. Тэгвэл үүнтэй холбогдуулан гаднын зарим хэвлэл хөдөлгүүр нь ажиллагааны доголдолтой байж болзошгүй хэмээн мэдээлж буй “Тоёота” компанийн “Ланд Крузер-300” тэргүүтэй автомашины хөдөлгүүр тойрсон асуудлыг тоймлон хүргэе.

-АВТОМАШИНЫХАА ГЭРЧИЛГЭЭНД ХУДАЛ МЭДҮҮЛСЭН ГЭЖ ДҮГНЭЖЭЭ-

Автомашин үйлдвэрлэгч “Тоёота Мотор” компани охин компани “Тоёота Индастриес” компанийнхаа бүтээсэн “Ланд Крузер-300” загварын жийп, “Hilux” загварын ачааны машин зэрэг 10 загварын автомашиныхаа нийлүүлэлт, борлуулалтаа зогсоож байгаа талаараа мэдэгдсэн. Тэгвэл үүнээс өмнө буюу өнгөрсөн 2023 оны сүүлчээр “Тоёота”-гийн охин компани “Дайхацу” дээр автомашины гэрчилгээнд худал мэдүүлсэн байж болзошгүй тухай мэдээлэл гарсан ч төд удалгүй намжиж байж. Харин “Дайхацу”-гийн хэргээс хойш Японы мэргэжлийн байгууллагууд “Тоёота” компаниас үйлдвэрлэсэн автомашинууд дээр нарийн үзлэг, шалгалт хийж, хөдөлгүүр нь асуудалтай байгааг тогтоожээ.

Тодруулбал, дизель мотортой “Ланд Крузер-300” загварын автомашины хөдөлгүүрийн морины хүч үйлдвэрээс заасан хэмжээндээ хүрч байгаа эсэх талаар эхлэн шалгажээ. Харин шалгалтын явцад дээр дурдсан “Тоёота”-гийн 10 загварын автомашины хөдөлгүүр сертификат дээр бичсэн хорт утааны хэмжээнээс илүү хорт утаа ялгаруулдаг болохыг тогтоосон аж. Өөрөөр, “Тоёота”-гийн 10 загварын автомашин гэрчилгээн дээрээ заасан хорт утааны хэмжээнээс хоёр дахин их хорт утаа ялгаруулдаг буюу евро стандартынх байжээ. Үүнтэй холбоотойгоор агаарын бохирдлын эсрэг хатуу хариуцлага тооцдог Японы мэргэжлийн байгууллагуудаас “Тоёота” компани бүрэн шалгалт хийж, Япондоо заасан хэмжээнээс их хорт утаа ялгаруулж байгааг нь зарласан юм байна.

-“ТОЁОТА” КОМПАНИ 840 МЯНГА ГАРУЙ ХӨДӨЛГҮҮРИЙН “АСУУДАЛТАЙ” АВТОМАШИН БОРЛУУЛЖЭЭ-

“Тоёота Индастриес” компанийн үйлдвэрлэсэн 10 загварын автомашин хөдөлгүүрийн асуудлаасаа болж, нийлүүлэлтээ зогсоож буйгаа зарласан мэдэгдлийн үеэр тус компанийн ерөнхийлөгч Коичи Ито “Манай “Тоёота Мотор”-той харилцаа, холбоо дутмаг байдаг. Туршилтын үйл явц, журмын талаар хангалттай зохицуулалт байхгүй” хэмээн мэдээлжээ. “Тоёота Индастриес”-ээс гаргасан мэдээллээр тус компани “Ланд Крузер-300” тэргүүтэй хөдөлгүүрийн гэрчилгээндээ худал мэдүүлсэн 10 загварын 840 мянга гаруй автомашин нийлүүлсэн талаар мэдээлжээ. Уг 10 загварын автомашины зургааг нь “Тоёота” компани зөвхөн дотооддоо борлуулдаг бөгөөд “Тоёота Индастриес”-ээс хөдөлгүүрийн доголдог, эвдрэл, гэмтэл биш тул хэрэглээнд ямар нэгэн асуудал байхгүй гэсэн утгатай мэдэгдэл гаргасан аж. Харин одоогийн байдлаар “Тоёота” компанийг автомашины хөдөлгүүрийн хорт утаа ялгаруулах хэмжээг санаатайгаар дарж бичсэн үү эсвэл хэмжилт, тооцооллын алдаа байсан уу гэдгийг шалгаж байгаа юм байна.

                             Түүнчлэн үйлдвэрлэсэн 10 загварын автомашин нь хөдөлгүүрийн асуудалтай гэж тогтоогдсон “Тоёота Индастриес” компани “Тоёота” группийн 25 орчим хувийг эзэмшдэг бөгөөд автомашинууд нь хөдөлгүүрийн асуудлаас шалтгаалан борлуулалтаа зогсоож байгаа нь “Тоёота” компанийн хувьцаанд шууд нөлөө үзүүлж болзошгүйг Японы зах зээлийн шинжээчид онцолжээ.

-“ЛАНД КРУЗЕР-300”-Г “ХАЛЖ”, ШИНЭ ЦАХИЛГААН ХӨДӨЛГҮҮРТЭЙ “ЛАНД” ҮЙЛДВЭРЛЭХЭЭР БОЛЖЭЭ-

Автомашинууд нь хөдөлгүүрийн асуудлаас болж 10 загварынхаа нийлүүлэлтийг зогсоосон “Тоёота” компанийг санхүүгийн хувьд уналттай нүүр тулахыг шинжээчид хэлж байсан ч гаднын зарим хэвлэлийн мэдээллээр “Тоёота” компанийн орлого энэ жил хэд дахин өсөж магад гэнэ. Тодруулбал, “Тоёота” компанийн туршилт хийж байсан цахилгаан хөдөлгүүрт “Ланд” загварын автомашиныхаа нээлтийг хийх тун дөхөөд байгаа аж. Үүгээр ч зогсохгүй шинэ загварын цахилгаан хөдөлгүүрт жийпнийхээ үйлдвэрт 1.3 тэрбум ам.долларын хөрөнгө оруулалт хийхээ мэдэгдсэн бөгөөд “Тоёота” компани “Ланд Крузер-300”-гийнхаа нийлүүлэлтийг зогсоосон ч шинэ цахилгаан жийпнийхээ нээлтийг хийж, худалдаанд гаргаснаар орлого нь дахин өсөх талаар олон улсын хэвлэлүүд онцолж байна.