ГАВЬЯАТ ЖҮЖИГЧИН С.БАЛДАНПҮРЭВИЙН БҮТЭЭСЭН ДҮР БҮХЭН СЭТГЭЛД ОЙР

2026-01-22, 67

Сандаг Гэндэн гуайд цэрэгт явсан хүү нь амиа алдсан гэх мэдээг дуулгах хүндхэн даалгаварт буучихлаа. Өдөр шөнөгүй хүүгээ хүлээгээд, халагдаад ирэхэд ханагар том гэрт найр хийнэ гээд гэрийн мод хүртэл зэхэж суугаа хөгшинд яаж хүүгийнх нь өөд болсон тухай хэлэх билээ. Хэдий олон жил айл саахалт явсных даанч тэгж зүрхлэхгүй…

Тэр ч ёсоор тэр шуудангийнханд арай гэж захидлыг буцааж өгнө. Тун саяхан нээлтээ хийсэн “Задлаагүй захиа” киноны жудагтай, жаягтай, түшиг тулгууртай Сандаг хөгшний дүрийг МУГЖ С.Балданпүрэв бүтээжээ. Ойрдоо дэлгэцнээ хараагүй түүнийг харах үзэгчдэд сайхан байна. Бидний хэзээний л танил, “Анхны алхам” киноны тракторчин залуу өдгөө 90 нас хэдийнэ давчихсан уран бүтээлдээ орон гялалзаж явна. Тэрбээр Б.Лхагвасүрэн агсны талаар “Найз маань тэнгэрт байгаа ч би түүнд өртэй. Тиймээс осолд ороод удаагүй ч энэ бүтээлд тоглолоо” хэмээсэн.

Тэрбээр жүжигчин, туслах найруулагч, оператор, зураач, хослол зургийн оператор, алт мөнгөний дархан, мужаан, жолооч гээд мэргэжлийнхээ хүрээнд бүх л төрөлд хүч сорьж ажилласан юм билээ. Сүхбаатар аймгийн Эрдэнэцагаан сумын унаган хүү тэрбээр түүний уран бүтээлийн эхлэл 1963 онд Хүүхэлдэйн театрт зураач, 1965 онд Улсын Хүүхэд Залуучуудын театрт жүжигчин, туслах найруулагч, 1969 оноос "Монгол кино" үйлдвэрийн хослол зургийн цехэд зураач, оператор гээд үргэлжилсэн байдаг. Үзэгчидтэйгээ олон сайхан дүрээр уулзахын өмнө ингэж сууриа тавиад кино урлагийн бусад төрөл, ажлыг ч сайн мэддэг, чадварлаг нэгэн болсон нь өөрийнх нь бүгдэд суралцахыг зорьдог жавхаалаг зан аж.

Олон сайхан дүр бийг ч үзэгчид андахгүй. Тухайлбал, "Анхны алхам" киноны Равдан, "Дайны тухай өгүүллэгүүд"-ийн япон цэрэг, "Талын цуурай"-н эвлэлийн ажилтан, "Эхлэлт" -ийн Гончиг, "Хүний амь" эд шалгагч Болд, "Хатанбаатар" киноны гэдгэр Содном, "Нарны унага" -ын Аварзэд, “Зарлаагүй дайны оршил" японы агтны дарга, "Түгшүүрт шөнө" киноны Зотов гэхчлэн нэрлэж болох юм. Тэрбээр “Би урлагийн сургуульд сурч, жүжигчний мэргэжил эзэмшээгүй. Яах вэ, ерөнхий боловсролын сургууль бол дүүргэсэн. Гэхдээ урлагийн талаар А-аас Я-г хүртэл нь залгуулаагүй гэсэн үг. Харин урлагийн алтан үеийнхэнтэйгээ ажиллаж явсандаа л жүжигчин гэдэг мэргэжил олж авсан. СУИС болоод хувийн, хувьсгалын янз бүрийн сургуульд багшилж, лекц уншиж явлаа” хэмээн ярьсан байдаг.

Түүний энэ олон жил кино урлагт яваа амжилтаас хамгийн тод нь анхны Холливудын кинонд тоглосон жүжигчин гэдэг нь. Энэ тухай “Тэр сайхан тохиолдлыг одоо эргэж ярина гэвэл сонины зай талбай хүрэхгүй байх. Анх зохиолоо ч гүйцэт сайн судалж амжилгүй л явж байлаа. Анх хэдэн сарын өмнө пробонд орж байлаа. Хөгжилтэй орны, ухаандаа Холливудын кинонд тоглохоор явна гэхээс өвгөн миний хоёр хөл бараг л газар хүрэхгүй дэгдэж байснаа санаж байна” гэж ярьсан байдаг. Ингэж түүний бүтээсэн дүр бүхэн үзэгчдийн сэтгэлд ойр, өнөөдөр ч нэхэн үзэхэд өгөөжтэй, суралцах зүйл арвинтай байна.

ГАВЬЯАТ ЖҮЖИГЧИН С.БАЛДАНПҮРЭВИЙН БҮТЭЭСЭН ДҮР БҮХЭН СЭТГЭЛД ОЙР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.