ThunderZ-ийн “Гэгээн” дуу гарсан цагаасаа хүмүүсийн хайртай уран бүтээлээр нэрлэгдэх болсон билээ. Хүн бүр л Наваан ламтан, Ренчинмядаг бүсгүй хоёрыг энэ насандаа хамтдаа жаргалтай байгаасай хэмээн хүсэж, тус уран бүтээлийг чинь сэтгэлээсээ мэдэрлээ. Тэгвэл тус уран бүтээлд хайртай залуугаасаа харамсалтайгаар хагацаж, насаараа хүлээсэн Ренчинмядаг бүсгүйн дүрд тоглосон Б.Маралгуатай ярилцлаа.

Тэрбээр бидний сайн мэдэх “Хайраар эхэлсэн тэр өдрүүд

Дурсамж болоод үлдэхэд чи

Хайртай гэдэг үг чинь

Дараагийн хүнийнх байсан гэж үү” хэмээх Lemorna дууг дуулсан дуучин, DJ  билээ.

-Таны тоглосон ThunderZ-ийн “Гэгээн” дуу сүүлийн өдрүүдэд тренд болж, олны сонсох дуртай уран бүтээл байлаа шүү дээ. Анх тус клипэнд хэрхэн тоглох болсон юм бэ?

-Би клипний зураг авалт эхэлсний дараа, миний зураг авалт эхлэхийн өмнөх өдөр л холбогдож, Гэгээн дууны клипэнд тоглохоор болсон. Уг нь манай найз тус уран бүтээлд тоглох ёстой байсан юм л даа. Би өөр клипэнд тоглох ёстой байсан хэрэг. Гэхдээ миний гадаад төрх илүү тохирсон учраас намайг сонгосон гэсэн. Миний төрх ямар ч дүрд хувирчихдаг юм шиг санагддаг. Өмнө нь ч гэсэн сэвх зуруулаад монгол хувцастай зураг авалтад орж байсан. Ингэж хувирна гэдэг үнэхээр сонирхолтой санагддаг. Мэргэжлийн жүжигчин биш учраас дүрдээ орно гэдэг бас сонирхолтой, намайг сорьсон ажил байлаа.

-Реппер ThunderZ-тай хамтарч ажиллах ямар байсан бэ?

                -Манай ThunderZ ах чөлөөтэй хүн шиг санагддаг. Өмнө нь нэг удаа клипэнд нь ажиллаж байсан юм. Тэр үед ч өөрийнхөөрөө гоё хүн шиг санагдаж байсан. Яг л нэг зангаараа гоё байж чаддаг хүн юм болов уу.

-“Гэгээн” дууг анх сонсоход ямар санагдсан бэ. Хайртай хүнээсээ хагацаж байгаа эмэгтэйн сэтгэл хөдлөлийг гаргах амаргүй байв уу

                -Надад “Ийм утгатай клипний, ийм дүрд тоглоно” гэж огт хэлээгүй. Зурагт авалт эхлэх бүрд тухайн хэсгийн талаар мэдээлэл өгч, зургаа авхуулсан. Хэрхэн дуусдагийг нь өөрөө сүүлийн хэсгээ авхуулахдаа л мэдсэн. Дууны хувьд бол үнэхээр сайхан уран бүтээл шүү дээ.

-Зохиолоо хэлээгүй нь хэр зөв шийдвэр байсан бэ?

                -Хэлээгүй учраас илүү сонирхолтой байсан. Сална гэдгийг нь мэдсэн бол жаргалтай хэсгийн зургийг сайн авхуулж чадахгүй ч байж мэднэ шүү дээ.

-Дуу нь сонсогчдод хүрч эхэлсэн цагаасаа тренд болж, хүмүүсийн хайртай уран бүтээлээр нэрлэгдэх болсон шүү дээ. Сонсогчид дуртай байгааг мэдрэх ямар санагдсан бэ?

                -Өөрийгөө харах мэдрэмж жаахан ичмээр, тэр сайхан дүрийг сайн гаргаж чадаагүй ч юм шиг санагдсан. Клип миний төсөөлж байснаас ч илүү чанартай, кино шиг болсныг хараад баярласан. Клипийг маань үзсэн, намайг таньсан хүмүүс баяр хүргэж, магтсан учраас од болчихсон юм шиг санагдсан.

 "ГЭГЭЭН" ДУУНЫ КЛИПЭНД ТОГЛОЖ БАЙХДАА THUNDER АХАД ҮНЭХЭЭР ХАЙРТАЙ Ч ЮМ ШИГ БОДИТ МЭДРЭМЖИЙГ АВСАН

-“Гэгээн” дууг стори хийгээгүй, та хоёрын зургийг тавиагүй хүн цөөхөн байх. Тэр олон хүний анхаарал та хоёр дээр төвлөрөх үед ямар мэдрэмж төрөв?

                                -Жаахан ичсэн шүү. Дуу цацагдах үеэр би эмнэлэгт байсан юм. Эмч маань хүртэл “Чи энэ клипэнд тоглосон юм уу” гэж асуугаад байсан учраас жаахан санаа зовж, ичсэн.

-Тус уран бүтээлийн хамгийн хэцүү зураг авалт аль нь байсан бэ?

                -Морьтой хэсэг л хамгийн хэцүү байсан. Би өөрөө мориноосоо айгаад байдаг гэтэл хамгийн чухал зураг авалт, дээрээс нь нар шингэчих гээд цагтай уралдаж авсан зураг авалтаа хийсэн. Жүжигчид дүрдээ орох гэж ярьдаг даа. Тэр мэдрэмжийг багахан ч гэсэн ойлгосон. Жинхэнээсээ миний хайртай хүн үхчихсэн ч юм шиг, ThunderZ ахыг харахаар нээрээ ч хайртай юм шиг санагдаад цаанаасаа л зүрх давчдаад байсан. Зураг авалт дууссаны дараа багийнхан маань “Чи жинхэнээсээ уйлах гэж байсан уу” гэж асуусан.

-Таны хувьд дуучин шүү дээ. Анх яагаад дуу хийж, уран бүтээлч болохоор шийдсэн юм бэ?

                -Цар тахлын хөл хорионы үеэр дуу хийж эхэлсэн. Тэр үед бусад хүмүүсээс илүү амьдралын идэвхтэй өнгөрүүлсэн. Бүхнийг хийж болох юм шиг санагдсан учраас дуу хийж үзэхээр шийдсэн. Хуучин хүмүүс өндөгний сагс тавьж байгаад хоолойгоо бичдэг байсан гэж ярьдаг  шүү дээ. Би тэдэн шиг өндөгний сав босгож тавьж байгаад дуугаа бичиж, өөрөө янзлаад хүмүүст хүргэсэн. Дараа нь Хонгороо надтай холбогдож, хамтрах дуу хийх санал тавьснаар Lemorna дууг гаргасан.  Олон дуу гаргаж амжаагүй ээ. Өөрөө дуучин хэрнээ бусад уран бүтээлчдийн клипэнд тоглох сонирхолтой, гоё юм билээ. Цаашид өөрийнхөө уран бүтээлд анхаарч дуу хийх бодолтой байгаа.

-Дуу, уран бүтээл хийхийн хамгийн сайхан нь юунд байдаг вэ?

                -Lemorna дуу жилийн дараа олны анхааралд орж, хүмүүс сонсож эхэлсэн. Утсаа үзээд сууж байхад миний дуу гараад ирэхээр баярлаж, хүмүүст таалагдаж байгаад нь баярласан. “Дуу хийж болох юм байна, би гайгүй дуулчихдаг юм байна” гэсэн бодол тэндээс л төрсөн. Хоёрдугаар ангиасаа хөгжим тоглосон, сонсгол сайн учраас одоо DJ-ээр ажиллаж байгаа.

-DJ-ээр ажилладаг талаараа дэлгэрэнгүй ярьж болох уу?

                -2025 оны гуравдугаар сараас DJ-ээр ажиллаж эхэлсэн. Албан ёсны сургалтад нь сурч төгсөөд ажиллаж эхэлсэн. Гэхдээ бусад хүмүүсээс илүү хурдан сурч, ажилласан. Зарим хүн “Чи чадвартайдаа биш, царайгаараа DJ болсон” гэж ярьдаг ч санал нийлэхийг хүсдэггүй.

-Таны тавьсан хөгжмийг мэдэрч, бүжиглэж, хөөрч байгаа хүмүүсийн харах DJ байхын хамгийн сайхан мэдрэмж байхдаа?

                -Тэгэлгүй яах вэ, миний тоглож байгаа дууг мэдэрч, ойлгож байгааг харах л хамгийн сайхан шүү дээ.

-Ярилцлага өгсөн танд баярлалаа.

                -“Гэгээн” дууг сонсож, мэдэрч байгаа хүн бүрд баярлалаа.