Пауэрлифтингийн насанд хүрэгчидийн Азийн аварга шалгаруулах тэмцээн шинэ оны өмнө 2025 оны арванхоёрдугаар сарын 8-ны өдөр Турк Улсад болсо билээ. Тус Азийн аваргын эмэгтэйчүүдийн -57 кг-ын жинд хүрэл медаль хүртсэн, спортын мастер Отгонбаярын Урангоотой ярилцлаа. Тэрбээр Азийн аваргын тэмцээнд газраас штанг таталтын төрөлд 162.5 кг-ыг өргөж, хүрэл медалийн эзэн болсон юм.

–Шинэ оны өмнө Турк Улсад болсон Азийн аваргаас хүрэл медаль хүртсэнд баяр хүргэе.

     - Сайн байна уу. Намайг ярилцлагадаа урьсанд баярлалаа.

–Азийн аваргад ямар насны ангилалд, хэдэн килограммын жинд өрсөлдөж хүрэл медаль хүртсэн бэ?

    -2025 оны арванхоёрдугаар сарын 8–12-ны өдрүүдэд Турк Улсад зохион байгуулагдсан насанд хүрэгчид болон мастер ангиллын “classic”, “equipped” пауэрлифтингийн Азийн аварга шалгаруулах тэмцээнд оролцсон. Миний хувьд эмэгтэй насанд хүрэгчдийн ангиллын -57 кг жинд “equipped” төрлөөр өрсөлдсөн.

 –Азийн аварга суулт, хэвтээ шахалт, таталтын гурван төрлөөр явагдсан уу?

       -Тийм ээ, пауэрлифтингийн суулт, хэвтээ шахалт, таталт гэсэн гурван төрлөөр оролцсон.

-Миний дүү өөрийгөө манай уншигчдад танилцуулахгүй юу?

       -Намайг Отгонбаярын Урангоо гэдэг. Би одоо 21 настай.

-Аль аймаг, хотод төрж, өссөн хүүхэд вэ?

       -Би Ховд аймгийн Мөст суманд төрж, өссөн. Ерөнхий боловсролыг дунд сургуулийн 1–12 дугаар ангиа нутагтаа суралцаж төгссөн.

 -Бага нас нь хаана өнгөрөв?

       -Бага нас маань Мөст сумандаа өнгөрсөн. Эцэг эхийнхээ хайр, хүмүүжил дунд өссөндөө их талархдаг.

-Айлын хэд дэх хүүхэд вэ?

       -Манайх ам бүл зургуулаа. Би айлын том охин. Том охины хувьд аав, ээжийнхээ итгэлийг даахыг үргэлж хичээдэг.

 -Танай гэр бүлд, өөрөөс тань өөр спортоор хичээллэдэг хүн бий юу?

      -Тийм ээ, миний дүү жүдо, самбо бөхөөр хичээллэдэг. Аав маань биднийг спортоор хичээллэхийг үргэлж дэмжиж ирсэн.

-Пауэрлифтингээр хичээллэхээс өмнө өөр спортын төрлөөр хичээллэж байсан уу?

     -Дунд сургуулийн 2–6 дугаар ангидаа уран нугаралтаар хичээллэж байсан. Маш их тэвчээр шаардсан, гоо зүйг төлөвшүүлдэг сайхан урлаг. Гэхдээ суманд мэргэжлийн багш байгаагүй тул орхисон.

 -Багадаа хэр хөдөлгөөнтэй охин байсан бэ?

       -Ер нь хөдөлгөөн багатай, ичимхий, гэрээсээ гарах дургүй, нэлээд гэр амьтай хүүхэд байсан.

– Пауэрлифтингийн спортоор хэд дэх жилдээ хичээллэж байгаа вэ?

        -2022 оноос хойш пауэрлифтингээр хичээллэж эхэлсэн. Одоо  дөрөв дэх жилдээ явж байна. Харин 2025 оны хоёр сараас тэмцээн уралдаанд идэвхтэй оролцож эхэлсэн.

–Спортын ямар зэрэг цолтой вэ?

        -2025 оны хоёрдугаар сард “classic” төрлөөр анхны тэмцээндээ оролцож дэд мастер цол хүртсэн. Үүний дараа “equipped” төрлөөр спортын мастер цол хангаж чадсан. Энэ мөч бүрт аав маань л их баярладаг .

-Пауэрлифтингийн анхны багш нь хэн бэ?

        -Анх сургуультайгаа хамгийн ойр заалыг хайж байгаад Монголын пауэрлифтингийн холбооны зааланд бэлтгэлээ эхлүүлж байсан.

–Одоо бэлтгэлээ хаана хэн багшийн удирдлага дор хийж байгаа вэ?

        -Бүх спортод багш, дасгалжуулагч маш чухал. Тиймээс пауэрлифтингийн шилдэг клубуудын нэг болох “Strong” клубийн нэг хэсэг болж, тэндээс маш их зүйл сурч үр шимийг нь хүртэж явна.

 -Яагаад бусад спортоос илүүтэйгээр пауэрлифтингийн спортыг сонирхон хичээллэх болов?

       -Манай авга талынхан ер нь хүч бяртай хүмүүс байсан гэдэг. Өвөө маань бөх хүн байсан. Аливаа зүйл суурь өгөгдөлдөө тулгуурлаж хөгждөг учраас пауэрлифтинг надад тохирсон спорт гэж боддог. Үүнээс гадна аав маань “Юу хэрэгтэй байна, яах уу” гэж байнга асууж, бодитоор дэмждэг байсан нь энэ спортыг сонгоход минь маш том нөлөө болсон.

–Пауэрлифтингийн спортын чухам юу нь чамд илүүтэйгээр таалагдсан бэ?

       -Пауэрлифтинг бол жинхэнэ хүчийг шалгадаг, шударга спорт. Өргөсөн бол өргөсөн, өргөөгүй бол үгүй, бүх зүйл ил тод. Хүчний спорт эмэгтэй хүнд зохихгүй биш. Харин илүү их тэсвэр, сахилга бат суулгадаг спорт гэж боддог.

-Пауэрлифтингээр хичээллэж байхад тань шантарч, мохох үе гарч байсан уу?

       -Бэртэл, гэмтэл авах үед, хичээл ажил давхацах үед шантрах бодол төрдөг.

 –Хэвтээ шахалт, суулт, таталтын аль төрөлд нь илүү сайн бэ?

       -Миний хувьд суултын төрөл илүү.

-Пауэрлифтингийн спортоор хичээллэсэн үеэс хойших томоохон амжилтууддаа сонирхуулахгүй юу?

       -Би уг нь залуучуудын ангиллын тамирчи боловч анх удаа насанд хүрэгчдийн ангилалд, тив, дэлхийн медальтай шилдэг тамирчидтай өрсөлдсөн. Тэр анхны олон улсын тэмцээнээсээ хүрэл медаль хүртсэн. Тэмцээнд 64 кг-аас 57 кг хүртэл жин хасаж орсон нь надад маш том туршлага болсон.

-Сэтгэлд тань хоногшин үлдсэн хамгийн өрсөлдөөнтэй дурсамж үлдээсэн ямар барилдаан байдаг вэ?

       -Хүчний спортод жин хасалт хамгийн хэцүү. Анх -63 кг-д хасаж ордог байсан бол МБАТС-д анх удаа -57 кг-д хасаж ороод медалиас мултарч байсан. Тэр үед өдөрт гурван удаа бэлтгэл хийж, бие сэтгэлээрээ их ядарч байсан. Би өөрийгөө бусдаас илүү хүчтэй гэж боддоггүй. Харин өөрийгөө ялахын төлөө тууштай явж чадсан гэж боддог. Миний замнал хэн нэгэнд урам өгч чадвал, тэр л миний хамгийн том амжилт болно байх даа.

 -Амралт, чөлөөт цагаар юу хийх дуртай вэ?

        -Одоо төгсөх курсийн оюутан учраас зав багатай. Боломж гарвал амрах дуртай. Мөн зүү ороож даалин урлах, цементэн гар урлал хийх сонирхолтой. Хүнсний технологич мэргэжлээр суралцдаг тул шинэ жор турших дуртай.

-Цаашдын зорилго, хүсэл мөрөөдөл гэвэл?

        -2026 оны өсвөр үе, залуучуудын дэлхийн аварга шалгаруулах тэмцээнд оролцохоор зорьж байна. Үүний дараа насанд хүрэгчдийн дэлхийн аваргад эх орноо төлөөлөн оролцох нь миний дараагийн том зорилго. Энэ бүх замд аавынхаа итгэлийг алдахгүй явах нь миний хувьд хамгийн чухал.