Өмнөговь аймгийн ИТХ-ын дарга асан Б.Бадраагийн балаг дуусахгүй нь. Өмнө нь, Ханбогд сумын Засаг дарга Х.Нэхийтийг газрын наймааны хэрэгт хутгаж, хамт шалгагдаж байлаа. Тэгвэл одоо Гурвантэс сумын Засаг дарга Г.Гангамааг газрын наймааны хэрэгтээ хамжигчаар оруулж, хууль хяналтын байгууллагад ээрүүлж эхэлсэн талаар эх сурвалж мэдээллээ.

Өмнөговь аймгийн ИТХ-ын дарга асан Б.Бадрааг хууль хяналтын байгууллагаас шалгаад гурван жил өнгөрлөө. Эцэст нь, баривчилж, цагдан хорих тушаал гарахтай зэрэгцээд тэрбээр БНСУ руу зугтаж, “Шувуу” ажиллагаагаар шүүрүүлэхдээ тулж байсан нэгэн. Тодруулбал, Б.Бадраа, түүний хүү Б.Наранболд, эхнэр Б.Сайханжаргал, Ханбогд сумын Засаг дарга Х.Нэхийт нарыг Цагаан хад суурьшлын бүсэд хууль бусаар газар авч, БНХАУ-ын иргэдэд өндөр үнээр худалдсан гэх хэргээр шалгаж эхэлсэн байдаг.

Б.БАДРААГИЙН ХҮҮ Б.НАРАНБОЛД, ХАНБОГД СУМЫН ЗАСАГ ДАРГА Х.НЭХИЙТ НАРЫГ ХЯТАДУУДАД ГАЗАР ЗАРЖ, МӨНГӨ УГААСАН ХЭРГЭЭР ШАЛГАЖ БАЙЛАА

Хэргийг эргэн сануулбал, хууль хяналтын байгууллагынхан дээрх нэр бүхий хүмүүсийн гэр, албан өрөөнд нэгжлэг хийж, заримыг нь цагдан хорьж байсан. Тухайлбал, Б.Бадраагийн гэрээс 300 сая төгрөг, юань, үнэт эдлэл, галт зэвсэг, сум зэргийг хураасан. Б.Бадрааг Хан-Уул дүүрэгт өндөр зэрэглэлийн олон тооны орон сууц, үл хөдлөх хөрөнгө, өндөр үнэтэй автомашинууд худалдан авч, мөрийтэй тоглож, хууль бусаар олсон мөнгийг хувиргаж, мөнгө угаах гэмт хэрэг үйлдсэн байж болзошгүйг хуулийн байгууллагаас урьдчилсан байдлаар тогтоогоод байсан. Түүнтэй холбоотойгоор түүний 2020 оны хөрөнгө орлогын мэдүүлгийг судалж үзэхэд, “38.400 сая төгрөгийн орлоготой,  хоёр тэрбум, 805 саяар үнэлэгдэх хоёр орон сууцтай, үйлчилгээний зориулалттай нэг оффистой, 38 хурдан удмын морьтой, 55 саяар үнэлэгдэх малтай, гурван төрлийн өмчлөх газартай, 20 сая төгрөгийн үнэт эдлэлтэй, 147 сая төгрөгийн хадгаламжтай, "Эрдэнэт хивс" ХК, "Эрдэнэс таван толгой" ХК, "Эрхэм нар" ХХК, "Говил" ХХК, "Түвшин наран" ХХК," Говийн долгион" ХХК-аас 142 сая төгрөгийн орлого олдог гэдгийг олон нийтэд ил болгосон. Харин 2013 оноос түүний автомашин, орон сууц, эзэмших газрын тоо хэмжээ, орлого хоёр дахин нэмэгдсэн байдаг. Мөн түүний хүү Б.Наранболдыг давхар шалгаж 461 дүгээр хорих ангид цагдан хорьсон. Учир нь, Б.Бадраа хүүгийнхээ нэр дээр  компаниудынхаа үйл ажиллагааг явуулдаг учир хам хэрэгт холбогдож, хуулийн хариуцлага хүлээх нь тодорхой болсон гэж байлаа.

       Тэгвэл улс дамнаж газрын наймаа эрхэлж, хууль бусаар мөнгө олдог, олсон мөнгөөрөө мөрийтэй тоглоом тоглож, мөнгө угаах гэмт хэрэгт давхар холбогдсон байж болзошгүй Б.Бадраа, Б.Наранболд, Х.Нэхийт нарын араас Гурвантэс сумын Засаг дарга Г.Гангамаа орж ирлээ.

ГУРВАНТЭС СУМЫН Г.ГАНГАМАА Б.БАДРААГИЙН “ЗАХИАЛГА”-ААР ХЯТАДУУДАД ГАЗАР ОЛГОЖ, АВЛИГЫН ХЭРЭГТ ХОЛБОГДСОН ТУХАЙГАА ХҮЛЭЭСЭН БОЛОЛТОЙ

    Гурвантэс сумын Засаг дарга Г.Гангамааг хууль хяналтын байгууллагаас шалгаж байгаа гэнэ. Тэрбээр газрын наймааны хэргээр АТГ-ын мөрдөгчдөд хэд хэдэн удаа байцаалт өгсөн талаар эх сурвалж мэдээлэв. Мөн сүүлийн хэдэн сар сумын Засаг даргын ажлаа хийлгүй Улаанбаатар хотод суурьшиж байгаа гэнэ. Үүгээр ч зогсохгүй түүнийг цагдан хорих шийдвэр гарсан ч эрүүл мэндийн шалтгаанаар хойшлуулаад байгаа бололтой.

   Г.Гангамаа Өмнөговь аймгийн ИТХ-ын дарга асан Б.Бадраагийн “захиалга”-аар БНХАУ-ын иргэдэд их хэмжээний газар олгох шийдвэр гаргаж, гарын үсэг зурсан хэрэгт холбогджээ. Ингэхдээ тэрбээр хятадуудаас их хэмжээний авлига авч, бусадтай хуваалцаж, тохиролцсон ч байж болзошгүй нөхцөл байдал илрээд байгаа гэнэ.

      Эх сурвалжийн бидэнд өгсөн мэдээллээр “Гурвантэс суманд хууль бусаар газар авсан БНХАУ-ын иргэдийг ч мөн шалгаж байгаа. Тэд анхандаа захиалагчаа нуун дарагдуулж, мэдэхгүй гэдэг хариулттай байсан ч эцэст сэжүүр олдсон гэнэ лээ. Энэ хэрэгт Өмнөговь аймгийн ИТХ-ын дарга асан Б.Бадраа холбоотой гэсэн. Г.Гангамаа дарга ч үүнийгээ хууль хяналтын байгууллагад мэдүүлээд байгаа бололтой. Хууль бусаар харь улсын иргэдэд газар олгож, хэдэн зуун саяар нь хахууль авсан болзошгүй” гэлээ.

        Монгол Улсын Үндсэн хуульд заналхийлж, улс дамнасан газрын наймаачдыг “толгойлогч” нь Б.Бадраа байж болзошгүй баримтын мөрөөр хууль хяналтын байгууллагынхан ажиллаж байгаа гэнэ. Хамжигчдыг нь ч мөн шалгаж байгаа талаар бид мэдээллээ.