Тийболлын Азийн аварга шалгаруулах 17 дахь удаагийн тэмцээн Япон Улсын Токушима мужид зохион байгуулагдсан билээ. Тус тэмцээнд зургаан орны 28 багийн тамирчид өрсөлдсөн аж. Монгол Улсаа төлөөлөн оролцсон “PEAK” баг алтан медаль хүртэж, Азийн аваргын цомын эзэд болжээ. Эх орныхоо нэрийг гаргаж, бахдам амжилт үзүүлсэн авьяаслаг хүүхдүүдээ өнөөдөр УИХ-ын гишүүн Э.Бат-Амгалан хүлээн авч уулзан, баяр хүргэж, амжилт хүссэн байна.

    Тийболлын спорт нь хүүхдийг багаар ажиллах ур чадвар сургаж, харилцаа, сахилга бат, ёс зүйг төлөвшүүлдэг гэдгээрээ онцлогтой. Тиймээс хүүхдийн хөгжилд эерэг нөлөө үзүүлж буй тийболлын спортоор хичээллэх боломж олгох үүднээс олон төрлийн арга хэмжээнүүдийг Баянзүрх дүүргийн удирдлагууд, нийслэлийн төлөөлөгч нартай хамтран зохион байгуулж байгаа юм. Тус дүүрэг цаашид ч хүүхдүүдээ дэмжиж ажиллах болно гэлээ.