Байгаль орчин, уур амьсгалын өөрчлөлтийн яам болон Монголын хүнс, хөдөө аж ахуй, байгаль орчны ажилтны үйлдвэрчний эвлэлийг холбооны төлөөллийг БОУАӨЯ-ны сайд Ц.Сандаг-Очир хүлээн авч уулзлаа. Уулзалтаар 2026-2028 онд хэрэгжүүлэх салбарын хамтын хэлэлцээрээ шинэчлэн байгуулав.

   Тус салбарт 87 төрийн байгууллагад 2832 төрийн албан хаагч ажиллаж байна. Нийт албан хаагчдын 53.6 хувь нь эмэгтэй үлдсэн нь эрэгтэй, дундаж цалин 2.84 сая төгрөг байна. Энэ тооны цаана байгаль хамгаалагч, ойн мэргэжилтэн, ус, цаг уур, тусгай хамгаалалттай газар нутаг, сав газрын захиргааны болон төрийн үйлчилгээний олон мянган хүн бий. Салбарын бодлого, хууль, шийдвэр эцсийн дүндээ эдгээр хүмүүсийн хөдөлмөрөөр газар дээрээ хэрэгждэг гэдгийг Ц.Сандаг-Очир сайд онцлов.

   Цалин хангамжийн хувьд тодорхой ахиц гарч байна. Оны эхнээс яам, агентлагийн төрийг захиргааны албан хаагчдын цалинг 15 хувиар нэмэгдүүлсэн. Мөн энэ жилийг төсвийг тодотголоор төрийн үйлчилгээний албан хаагчдын цалинг 50 хувиар нэмэгдүүлэх асуудлыг тусган ажиллаж байгааг онцлон тэмдэглэлээ.