НҮБ-ын Цөлжилттэй тэмцэх конвенцын талуудын 17 дугаар бага хурал “UNCCD COP17”-гийн Ногоон бүсийн “Байгаль” (C4) павильонд өчигдөр буюу наймдугаар сарын 24-ний өдөр “Тогтвортой санхүүжилтийн мэдлэг солилцох уулзалт, “Өнө мөнхийн Монгол БХБС”-ийн хөтөлбөрийн туршлага, арга хэмжээ амжилттай болж өндөрлөлөө. Тус уулзалтыг Байгаль орчин, уур амьсгалын өөрчлөлтийн яам, Сангийн яам болон Монголын Байгалийн Өв Сан хамтран зохион байгуулсан юм.

     Тус уулзалтаар “Өнө мөнхийн Монгол” хөтөлбөрийн хүрээнд хэрэгжүүллээ. Арга хэмжээний онцлох илтгэлүүдээс дурдвал БОУАӨЯ-ны ахлах шинжээч Ц.Мөнхбат хөтөлбөрийн санхүүжилтийн загвар, 15 жилийн хугацаанд 198 сая ам.долларын санхүүжилт бүрдүүлэх урт хугацааны зорилтыг танилцуулав.

    Мөн Тогтвортой санхүүжилтийн механизмын зөвлөх багийн гишүүн А.Батбаяр үр дүнд суурилсан санхүүжилтийн шинэ загварыг танилцуулж, төр, орон нутаг, донор, хувийн хэвшлийн санхүүжилтийг уялдуулах талаар онцоллоо. Хөтөлбөрийн зөвлөх С.Амартүвшин ТХГН-ийн нэвтрэх хураамж, байгалийн нөөц ашигласны төлбөр зэрэг судалгааны үр дүнг хуваалцаж, судалгааны байгууллагуудын хамтын ажиллагааны ач холбогдлыг дурдав.

    Үүний дараа А.Батбаяр, С.Амартүвшин, Д.Түвшинжаргал, Б.Эрдэнэбат нарын оролцсон хэлэлцүүлэг өрнөж, их сургуулийн судалгааг бодит бодлого, санхүүгийн шийдэлтэй холбох талаар санал солилцсон юм. Арга хэмжээ төрийн болон судалгааны байгууллагуудын нетворкинг уулзалтаар өндөрлөлөө.