Нийслэлийн Засаг даргын Тамгын газар болон Даян дэлхийн ногоон хөгжлийн институт (GGGI) Улаанбаатар хотын ногоон шилжилт, тогтвортой хөгжлийг дэмжих чиглэлээр Харилцан ойлголцлын санамж бичиг байгууллаа. Санамж бичигт Нийслэлийн Засаг дарга бөгөөд Улаанбаатар хотын Захирагч Б.Пүрэвдагва, "GGGI"-ийн Азийн бүсийн дэд захирал Жасон Лий нар гарын үсэг зурлаа.

    Энэхүү хамтын ажиллагааны хүрээнд Улаанбаатар хотод 250 сая ам.доллар хүртэлх хөрөнгө оруулалт татан төвлөрүүлж, ногоон төсөл, бүтээн байгуулалтад чиглүүлэх урьдчилсан гэрээг "COP17"-ын хотын дарга нарын форумын үеэр үзэглэлээ. “Нийслэлийн өмчит Улаанбаатар хөрөнгө оруулалт, менежмент ҮЦК” ХХК нь сүүлийн жил хагасын хугацаанд "GGGI"-тай хамтран Нийслэлд хэрэгжих боломжтой болжээ.

    Ногоон, тогтвортой төслүүдийг тодорхойлж, Олон Улсын хөрөнгө оруулагч болон хөгжлийн санхүүгийн байгууллагуудын шаардлагад нийцсэн төсөл болгон хөгжүүлэх чиглэлээр ажиллаж ирсэн юм. Цаашид энэхүү хамтын ажиллагааны санхүүжилтийн үндсэн суваг нь манай компанийн итгэмжлэн удирддаг “Нийслэлийн ногоон сан хувийн ХОС" ТЗК байх бөгөөд "GGGI"-тай хамтран хэрэгжүүлэх санхүүжилт, түүнтэй холбоотой зохицуулалтыг тус сангаар дамжуулан хэрэгжүүлэхээр талууд тохиролцлоо.

   Хамтын ажиллагааны хүрээнд цэвэр дулаан хангамж, сэргээгдэх эрчим хүч, батарей хуримтлуур, ногоон барилга, тогтвортой тээвэр, хүлэмжийн хийн ялгарлыг бууруулах болон газрын тогтвортой менежментийн төслүүдийг хөгжүүлэхээр төлөвлөж байна. Энэхүү хамтын ажиллагаа нь Нийслэлийн ногоон сангаар дамжуулан Улаанбаатар хотын ногоон төслүүдэд Олон Улсын хөрөнгө оруулалт, тогтвортой санхүүжилт татах боломжийг өргөжүүлж, төслүүдийг бодит хэрэгжилтэд шилжүүлэх санхүүгийн суурийг бэхжүүлэх ач холбогдолтой боллоо .