Их Монгол Улс байгуулагдсаны 820 жилийн ойн хүрээнд Гадаад харилцааны яамнаас “Зүчийн Улсын зарлиг, албан бичгүүд” номыг монгол хэлнээ орчуулсан бүтээлийг танилцуулах, олон нийтэд түгээх арга хэмжээг 2026 оны наймдугаар сарын 12-ны өдөр зохион байгуулав. Арга хэмжээг Гадаад харилцааны яамны Төрийн нарийн бичгийн дарга Л.Мөнхтүшиг нээж үг хэллээ.Тэрбээр бүтээлийг туурвих, эмхэтгэх, орчуулах, хэвлүүлэхэд оролцсон эрдэмтэн, судлаачдад талархал илэрхийлэв.

    Цаашид Монголын түүх, өв соёлтой холбоотой эх сурвалжийг судлан нийтлэх, олон нийтэд сурталчлан таниулах хамтын ажиллагааг өргөжүүлэхийн ач холбогдлыг онцлов. “Зүчийн улсын зарлиг, албан бичгүүд” номыг эмхэтгэн бүтээсэн Бүгд Найрамдах Турк Улсын монголч эрдэмтэн, профессор Илиас Кемалолу, профессор Айше Мелек Өзиэтгин болон тус бүтээлийг монгол хэлнээ орчуулсан Монгол Улсаас БНТУ-ын Истанбул хотноо суугаа Ерөнхий консул Д.Анхбаяр нар нийт 31 улсад хадгалагдаж буй түүхэн баримт бичиг, эх сурвалжаас бүрдсэн тус номын агуулга, ач холбогдлыг танилцуулав.

   Номыг эмхэтгэсэн талаар санал сэтгэгдлээ хүрэлцэн ирсэн “Монгол судлал: Уламжлал ба орчин үе” сэдэвт олон улсын монголч эрдэмтний XIII Их хуралд оролцож буй эрдэмтэд, БНТУ-аас Монгол Улсад суугаа Элчин сайд Башак Гэнч Юксэл тэргүүтэй төлөөлөгчид болон арга хэмжээнд хүрэлцэн ирсэн зочидтой хуваалцлаа. Их Эзэн Чингис хааны ууган хүү Зүчийн нэрээр нэрлэгдсэн Алтан Орд Улсын төрийн түүхийг баримтжуулсан тус ном нь Зүчийн Улсын үеийн монголчуудын төр, захиргаа, дипломат харилцаа, бичиг соёлын түүхийг судлахад чухал ач холбогдол бүхий эх сурвалж төдийгүй Монгол, Турк болон олон улсын эрдэмтэн, судлаачдын хамтын ажиллагааны үр дүнд бий болсон судалгааны үнэ цэнтэй бүтээл юм.